Диилвр бәрснь ачлгдв

24-04-2021, 16:39 | Общество

Элстд бичкдүдин үүдәлтин бәәшңд 2020-ч җилин ашар «Җилин күн» нертә муниципальн түрүн марһана дииләчнриг йɵрәһәд ачлв. Керг-үүлдвриг Хальмг Таңһчин Правительствин ахлач Юрий Зайцев йɵрәлин үгәр секв. Хальмгин Улсин Хуралын Ахлачин дарук Сергей Сухинин муниципальн кɵдләчнрин сән ɵдрлә йɵрәһәд, марһана бүрдәһәчнрт ханлтан ɵргв. Элст балһсна толһач, ЭГС-ин ахлач Николай Орзаев марһана дииләчнриг темдгләд, иргчдән таңһчиннь цецгәрлтд күн болһн эврәннь тәвцән орулҗ чадхмн гиҗ келв. Элстин һардврин толһач Дмитрий Трапезников балһсна муниципальн кɵдләчнриг байрин ɵдрлә бас йɵрәҗ, марһана дииләчнриг халуһар тосв.

– Элст балhснд олн халхар күцәмҗтәһәр кɵдлдг мергҗлтнриг, билгтǝ сурhульчнриг онц темдглҗ, нердинь олнд медүлхмн, гиҗ Дмитрий Викторович келв. Таңhчин экономикин болн хулд келһнә министр Дмитрий Троицкий бас йɵрǝлин үгән нерәдв.
Балhсна кесг бүрдǝцсин hардачнр, кɵдлǝчнр, багшнр, сурhульчнр эн марhанд орлцхар зɵвǝн ɵгсмн. 2020-ч җилин ашар 16 күн марhанд диилвр бǝрв.
Негдгч девсңд 4 күн йилһрв. «Сурhуль-эрдмин халхар күцәмҗ бәрсн» номинацд 15-ч тойгта СОШ-ин хальмг келнǝ багш, Хальмгин ачта багш, Əрǝсǝн сурhуль-эрдмин күндтǝ кɵдлǝч А. Х. Басхаева, Əрǝсǝн сурhуль-эрдмин күндтǝ кɵдлǝч, педагогическ номин доктор, Хальмг ГУ-н профессор Р. Б. Дякиева ахта ачлгдв. «Баh наста лидер» номинацд 21-ч тойгта дунд сурhулин hардачин дарук, англь келнǝ багш Х. С. Очуров ачлгдсмн. «Элст балhсна иткл» номинацин диилǝч балhсна 12-ч тойгта СОШ-ин 11-ч классин сурhульч, кесг билг-эрдмин марhасин диилǝч, Хальмг Таңhчин Толhачин мɵрǝн лауреат Д. С. Горяева болв. Онц темдглхд, Дельгира марhана диилǝчнр дунд хамгин баh наста орлцач болсмн.
Əрǝсǝн ачта багш, Хальмгин күндтǝ иргн В. М. Полтавская негдгч девсңгин диилǝчнриг йɵрǝҗ, эн марhан тууҗлгч йовдл, күн болhн седклǝн, дуран ɵгч кɵдлх зɵвтǝ, мел иим кевǝр ниигмд тусан күргхнь лавта гиҗ Валентина Михайловна темдглв.
Хойрдгч девсңгин диилǝчнр болснь «Сойлын халхар күцәмҗ бәрсн» – «Родина» сойлын цутхлңгин hардач В. И. Утнасунова мөн.
– Хальмгин келн-улсин телеүзлин ах редактор И. В. Гольдинова «Журналистикин халхар күцәмҗ бәрсндән» ачлгдв.
«Өршәӊгү седкл» («Милосердие») номинацд Элстин Ниигмин палатын гешүн, арhлач О. А. Цохоров дииләч болв.
«Лидер» номинацд «Əрǝсǝн күүкд улсин ниицǝн» ниигмин бүрдǝцин hардач В. Л. Очир-Горяева диилвр бәрв.
– Элст балhсна hардврин баhчудын кергүдǝр болн спортын комитетин ах мергҗлт, таңhчин Улсин Хуралын Ахлачин нɵкд О. Д. Баянов «Баhчудын кергүдǝр болн спортын халхар күцәмҗ бәрв».
Хальмг Таңhчин сойлын ачта кɵдлǝч И. Н. Басангов үг келҗ, цуhараһинь йөрәв.
Һурвдгч девсңгин диилǝчнр дунд коммунальн эдл-ахун халхар күцәмҗ бәрсн – «Энергосервис» бүрдǝцин кɵдлǝч А. В. Чмеревиг темдглх кергтә.
– «Урhа модна эдл-аху» МУП-ин ах агроном, Хальмгин күч-кɵлснǝ ветеран Н. Б. Балиев Элст балhснд сǝн таал бүрдǝлhнǝ халхар күцәмҗ бәрв.
«Кɵлгнә болн хаалhин эдл-ахун халхар күцәмҗ бәрснь» – «Элиста-Автодор» ДРСУ-н ǝңгин hардач С. Н. Расстрига.
Əрǝсǝн ачта тосхач, Хальмгин күндтǝ иргн Н. Ф. Жилин эн девсңгин диилǝчнрт Күндллhнǝ Һашгудынь бǝрүлҗ, цаhан хаалh дурдв.
Дɵрвдгч девсңгин диилǝчнр бас мөрәлгдв.
Эрүл-менд харлhна халхар күцәмҗ бәрсн төләдән – «СПИД-цутхлңгин» диагностическ ǝңгин хальдврта гемǝс эмндг эмч И. Б. Санзырова ачлгдв.
Арhлачин халхар күцәмҗ бәрсн – «Друг степей» ООО-н бүрдәһәч, арhлач Б. А. Мальшаевд, Җилин сǝн йовдл номинацд МВД-н Элстин заллтын ах сержант Ц. В. Лариевд, «Халун зүркн» номинацд «Əрǝсǝн күндтǝ донор», МВД-н ветеран, Əрǝсǝн күч-кɵлснǝ ветеран Б. С. Баклановд бас ачлврмуд бәрүлҗ өггдв.
Хальмгин ачта эмч А. П. Болтыров ǝрүн седклǝсн йɵрǝhǝд, цааранднь чигн Хальмг Таңhчиннь, хотл балhсна делгрлтин төлә кɵдлҗ тǝвцǝн орулад йовтн гиҗ дурдв.
Байрин йовудт Хальмгин олн-ǝмтнǝ артист М. Ким, таңhчин ачта артистк Д. Босхомджиева, артистнр Е. Минаев, Г. Кикеев болн «Веснушки» бичкдүдин бииhин ансамбль билг-эрдмǝрн олыг байрлулв.

КАРСАНА Евгения

Видео