ОРН-НУТГИН ИК БАЙР

15-06-2021, 16:47 | Общество

Мөчн сарин 12-т Әрәсән Өдр темдглгдв. 1990-ч җилин эн өдрлә РСФСР-ин улсин депутатнрин түрүн чуулһн үлмә уга Әрәсән туск декларац батлсмн. Терүнд цуг онр-нутгин һазрт Әрәсән Конституц һол орм эзлҗәнә гиҗ зарлгдсмн.

Мана орн-нутгт Әрәсән Өдр өргнәр давулгдна. Эн өдрлә сойлын болн спортивн халхар олн зүсн керг-үүлдвр давна.
Мана таңһчд Әрәсән Өдрин байрт нерәдсн керг-үүлдвр Элст балһсна Диилврин талвңд болна. Тенд таңһчин билг-эрдмин кѳдләчнр цуглрсн улсиг эврәннь эрдмәрн байрулна.
Орн-нутгин байр олн келн-улсиг негдүлнә. Кеерүлсн Элст балһсна һол талвңд сойлын халхар кесг hәәхүл бүрдәгднә. Энд келн-улсин хот-хол амсад, теднә ду-би һәәхҗ болхмн.
Нидн коронавирусас көлтә байр өргнәр темдглгдсн уга, Хальмг Таңһчин Толһач Хаска Бату өдрин бийднь арвн дѳрвтә хөрн көвүн-күүкнд Әрәсән паспортмуд байрин бәәдлд бәрүлҗ өглә.
Эн җил Əрәсән Өдрин ѳмн ѳргнд кесг керг-үүлдвр давсмн. Н. Пальмовин нертә Келн-улсин музейд «Мир без границ» зург цокачнрин болн зурач О. Кикеевин 80 җилин ѳѳнд нерәдсн шишлӊ хойр hәәхүл секгдв. П. Чонкушовин нертә билг-эрдмин колледжд «Айархаан» Якутин этно-багин концерт давсмн, Б.Басанговин нертә Келн-улсин театрт болхла, «Донбасс» дууна болн бииhин академическ ансамбль билг-эрдмәрн хәләhәчнриг байрлулв.

БЕМБИН Очр

Видео