Бичкндән эмч болхар шиидлә

19-06-2021, 16:22 | Общество

Маңһдур мана орн-нутгт эрүл-менд харлһна көдләчин сән өдр темдглгдҗәнә. Эн эрдм шүүҗ авсн улсин ач-тус хәрүлҗ, кеҗәх көдлмшнь олнд туста болн кергтә болдгиг бидн үнлҗ бүлән үгән нерәднәвидн. Нег үлү ода мана җирһлд коронавирусн гем учрсна хөөн эрүл-менд харлһна көдләчнрин ач-тусиг үнлҗ болшго болв. Эдн түрүн зергләнд әәмшгтә гемәс хөрлһнә кергт орлцҗ, күн болһнд дөңгән күргҗ, әм аврлһнд церглҗәнә. Сән өдр угтҗ бидн П.Жемчуевин нертә таңһчин эмнлһнә консультативн поликлиник һардҗах Әрәсән эрүл-менд харлһна йилһән сән көдләч Пандина Татьянала харһҗ күүндвидн.

Татьяна Алексеевнан келсәр, эн бичкнәсн авн эмч болхв гиҗ шиидв. Тегәд сурһулян төгсәснә дару эн Куйбышевск мединститутд орв. Энүгән төгсәһәд, эн җилдән таңһчин эмнлһнд интернатурт бәәҗ, күч-көлснә хаалһан эклв. Хөөннь эн һурвн җилдән Сарпан района эмнлһнд терапевт болҗ көдләд, гемтә улст түргн дөң күрглһнә, гемин уршгиг дарунь олҗ авч чик эмнлһ келһнә туст байн дамшлт хоршав. Тер цагт района эмнлһиг Дорҗин Василий һардҗ йовсмн, тегәд терүнә хәләврт баахн эмч дассн медрлән батрулад төлҗв. Района әмтн талдан эмнлһст одхла, эмч гемиг чикәр илдкҗ кергтә эмнлһ танд кеҗ гиҗ келдг бәәсмн. Баахн болв чигн Татьяна Алексеевна көдлмшән ик даавртаһар болн үнн кевәр күцәдг төләднь талдан эмнлһсин эмчнр энүнә мергҗлтиг өөдәнәр үнлдг билә. 1991-1993-ч җилмүдт Татьяна Алексеевна Москва балһснд 2-ч мединститутд ординатурт сурв. Энүнд номин халхар үүлдх үрвр кесн бийнь баахн эмч төрскн таңһчдан көдлхәр шиидв.
– Ординатур төгсәснә хөөн би 1993-ч җилд таңһчин эмнлһнд ирләв. Гемтә улсиг орулҗ авдг, консультативн-диагностическ болн терапевтическ әңгүдт көдлүв. Мөңгән өгсн улст медицинск туслмҗ күрглһнә әңгин үүлдвриг бүрдәҗ, кергтә бәрмт цаас белдлһнә көдлмшиг чигн бас күцәләв. 2019-ч җиләс авн болхла консультативн поликлиникиг һардҗ йовнав. Һучн һар җилдән эн эмнлһнд көдлҗәнәв. Босхмҗин Изольда, Манҗин Вера, Баяна Мария болн нань чигн ах үүрмүд нанла байн дамшлтарн хувалцҗ, медсән зааҗ, сүв-селвг өгч, мини төлҗлтд ик тәвцән орулснд би ик ханлтта бәәнәв. Таңһчин эрүл-менд харлһна министерствин, ФОМС-ин көдләчнрлә хамдан көдлмшч багин ханьд таңһчин райодын эмнлһсәр йовҗ, терапевтическ цергллтин үүлдвриг бүртклһнә, селәнә улст дөң күрглһнә халхар бас дамшлт хоршаснь нанд туста болв. Ода мана эмнлһнд телемедицин өргнәр олзлгдна, тегәд федеральн клиникүдин эмчнрлә ямр нег төрәр селвлцҗ гемтә улст дөң күргх арһ бәәнә. Ростовск мединститутын профессор Юрий Шатохинла бат залһлда бәрҗ, олн-зүсн төрәр селвлцнәвидн. Нег үлү пандемий учрсн кемд өдгә цага эв-арһс олзлҗ алс-зәәһин кевәр селвлцҗ болхнь тааста,- гиҗ Татьяна Алексеевна келнә.
Ода консультативн поликлиникд 28 эмч, 37 дунд медицинск көдләч көдлнә. Цуһар эдн Пандина Татьянан һардврт ни-негн, ниитәһәр үүлдҗ, таңһчин улст дөң күргҗәнә. Энд таңһчин селәдәс ирсн болн Элстин улст дөң күргнә. Пандемий учрсн болв чигн эдн үүлдврән зогсасн уга. Поликлиникин көдләчнр госпитальмудт көдлв, кесгнь коронавирусн гемәр бас гемтв. Эндр Татьяна Алексеевна бийнь баахн эмчнрлә дамшлтарн хувалцҗ, эмнлһ келһнә туст сүв-селвгән өгнә. Цаһан седклтә, сәәхн заңта, әмтнлә үүрсг, ик санан уга болдг төләднь Пандина Татьяна хамдан көдлҗәх үүрмүд дундан күндллһ олв. Өцклдүр эрүл-менд харлһна көдләчин Өдрт нерәдсн байрин хургт һучн һар җилдән эн эмнлһнд көдлҗ йовдг Татьяна Алексеевна Пандиновад Хальмг Таңһчин ачта эмчин нерн зүүлһгдв. Хамдан көдлҗәх үүрмүднь болн эн җилмүдин эргцд дөңгән күргсн улс өөдән ачлвр авснлань энүг йөрәв.

ДАВАН Наталья
А.Зундугинован цоксн зург

Видео