Ветеранмудын госпиталин тускар

15-07-2021, 14:37 | ---

Одахн Хальмг Таңһчин правительствин Ахлач Юрий Зайцев давулсн селвлцәнд Элстд ветеранмудын госпиталь болн терүнә медлд гериатрийин болн реабилитацин төв тосхлһна төр хәләгдв. Селвлцәнд вице-премьермүд Шурһчин Очр, Босхмҗин Гилян, Ивана Светлана, йосна органмудын һардачнр, төсвин бүрдәцин элчнр орлцв.
Социальн чинртә объект 2020-2024-ч җилмүдт Хальмг Таңһчин социальн-экономическ делгрлтин онц көтлврин медлд тосхгдхмн. Түрүләд амбулаторн-поликлиническ корпус эдлврт орулгдхмн. Терүнд өөдән чинртә технологическ медицинск кергсл углҗ тәвгдхмн, эннь томограф, рентген, УЗИ болн ЭКГ-аппаратмуд болн нань чигн. Тер мет эклц девсңд медицинск корпусин үүлдврт эрк биш кергтә инженерн сүлҗән, коммуникацс тосхлһн күцәгдхмн гиҗ зуралгдҗана.
– Түрүн девсң болн амбулаторн-поликлиническ корпус хамгин түрүнд эдлврт орулгдҗ олзлгдх зөвтә. Эмнлһнә, һардврин болн эдл-ахун салврмуд болн талдан бәәр тосхгдҗах цагла эдлврт орулгдсн корпуст ах үйин улс кергтә медицинск туслмҗ авч чадхмн, – гиҗ Юрий Викторович келв.
Төсвин-һаруһин бәрмт цаас белдҗәх бүрдәц эн объектин тосхлт бүрткҗәх цуг негдлтслә хамцу үүлдҗ, архитектурн-зураллһна шиидврмүдиг хамдан батлна. Ветеранмудын госпиталь болн терүнә медлд үүлдх гериатрийин болн реабилитацин төв өдгә цага некврлә ирлцдг медицинск бүрдәц болхмн.
Мана зәңгч

Ветеранмудын госпиталин тускар

Видео