Эмнлһнә туст бәәдлиг ясрулхар

31-07-2021, 10:44 | Общество

Түрүн медицинск дөң күрглһнә чинриг ясруллһна төлә региональн эмчнр «Негдсн Әрәсә» партин олна көтлврт сүв-селвгүдән орулв. Шидр партин стратегическ сессьт регионмудын эрүл-менд харлһна көдләчнр орулсн сүв-селвгүд хәләгдҗ, әмтиг эмәр, селән һазрт үүлддг эмнлһсиг мергҗлтнрәр, баахн көдләчнриг гер-бүүрәр тетклһнә төрмүдәр күүндвр болв. Терүнд Әрәсән орн-нутгин хүүвин депутат Александр Якубовский, РФ-н эрүл-менд харлһна министрин 1-ч дарук Виктор Фисенко, «Коммунаркд» бәәдг эмнлһнә ах эмч Денис Проценко, Аһш балһсна медицинск ик сурһулин һардач Владимир Шкарин, Иркутск мүҗин бичкдүдин клиническ эмнлһнә ах эмч Юрий Козлов, гүлгн гемәс хөрлһнә Новосибирск диспансерин ах эмч Олег Иванинский, GMS Hospital клиникин һардач Башанкан Бадм орлцв.


Харһлтд әмтнд түрүн медицинск дөң күрглһнә халхд сольвр орулх кергтә гиҗ темдглгдв. Терүнә төлә эрк биш медицинск даатхлһна системд мөңг йилһҗ өглһиг сольх, өдгә цага IT эв-арһс өргнәр олзлх, селән һазрт көдлх эрүл-менд харлһна көдләчнриг белдх, бичкдүдт шишлң медицинск дөң күрглһнә регионмуд хоорндк төв бүрдәх кергтә гиҗ күүндврт орлцачнр темдглдв. Келхд, селән һазрт мергҗлтнр эс күртҗәхин туск төр олн-әмтнә көтлврт орулгдҗах сүв-селвгүд дунд чинртә һурвн төрмүдин тоод орна гиҗ темдглгдв.
Нертә эмч Башанкан Бадмин тоолврар, мергҗлтнрин сурһулин кемҗә өөдлүллһнә, теднә җалвин төрмүдт оньг тусхах кергтә. Тер мет ФОМС, эрүл-менд харлһна министерств хоорндк нөкцлтин халхд хаһлх төрмүд бәәнә.
Эрүл-менд харлһна министерствд «Негдсн Әрәсә» партин олн-әмтнә көтлврт орулгдсн сүв-селвгүдиг дөңнәд, эмәр тетклһнә, ФАП тосхлһиг гүүдүллһнә, түрүн медицинск дөң күрглһнә чинриг ясруллһна туст хамцу үүлдхдән белн бәәхиг Виктор Фисенко темдглв. «Негдсн Әрәсә» партин региональн әңгүдин дөң-тусар цуг эн чинртә төрмүд хаһлгдх зөвтә гиҗ сүүрт келгдв. Олн-әмтнә көтлврт сүв-селвг оруллһнд орн-нутгин иргн болһн орлцҗ чадҗана, терүнә төлә NP.ER.RU сайтд эврәннь ухан-тоолвран медүлҗ болхмн.
Белдснь БАТАН Сәәхлә

Видео