Гемтсн улсин то баһрҗана

05-08-2021, 12:43 | ---

Сүл хонгт дәкәд 114 күн эн хальдврта гемәр гемтснь илдкгдв. Тиигәд пандемий эклсн цагас авн мана таңһчд 25390 күн эн гемәр гемтв, теднәснь 21976 күн эдгв.
Ода таңһчин госпитальмудт 839 күн эмнлһ авчана. Гемнь күнд кевәр давҗадг 30 күүнәс 15-нь ИВЛ-аппаратд бәәнә. Һундл төрхд, 489 күн эн гемәс иштә сәәһән хәәв. Ода 8 района эмнлһнд госпиталь үүлдҗәнә. Тиигәд, Яшкулин эмнлһнд 63 күн, Приютна – 39, Көтчнрә – 48, Яшалтан – 50, Лаганя – 29, Октябрьск – 24, Ик Буурла – 25 болн Хар Һазра районд 13 күн эмнлһ авчана.
Сүл өдрмүдт райодын эмнлһсин улд үүлдҗәдг госпитальмудт эмнлһ авчах улсин то невчк баһрв. Мана таңһчд хаслһна диг-даран цааранднь утдулгдснас иштә санитарн некврмүд күцәлһиг болн олна һазриг эд-бод келһиг чаңһаҗана. Хулд гүүлгәнә объектст, әмт зөөдг олна көлгнд цуһар санитарн некврмүд күцәх зөвтә. Хотл балһснд олн-әмтн цуглрдг һазрт санитарн эд-бод кегдҗәнә. Коронавирусн гемәс саглуллһна туст тәрлһ авх кергтәһинь дәкн нег тодлулгдҗана.

КАРСАНА Евгения

Видео