Дунд сурһульмудт бат ясвр кергтә

12-08-2021, 15:43 | Общество

Орн-нутгин регионмудт бат ясвр керглҗәдг дунд сурһульмудын то-дигмүдиг «Негдсн Әрәсә» парть гегән-герлин министерствд илгәв. Министерств болхла партьла хамдан шинҗләчнрин болн эк-эцкнрин орлцлһтаһар бат ясврин көтлвр хамдан бүрдәх зөвтә.

Ирх хойр җилин эргцд дунд сурһульмудын ик зууднь бат ясвр кегдх зөвтә, энүнә бәрмт цааснь белн бәәнә, гиҗ Әрәсән гегән-герлин министр Сергей Кравцовла болн сурһулин бүрдәцсин һардачнрла давсн харһлтын йовудт Федерацин Советин ахлачин негдгч дарук, партин Генсоветин сегләтр Андрей Турчак темдглв. Харһлт ноха сарин эклцәр «Негдсн Әрәсә» партин ул деер болв.
Бат ясвр кегдх дунд сурһульмудын хамгин түрүн то-диг батлгдв. Бюджетын төсвиг шинәс хәләҗ, шинҗлҗ, 2022-ч җилин болн 2023-2024-ч жилмүдин зурад эн көтлврт чиклвр орулх кергтә, гиҗ Андрей Турчак келв. «Негдсн Әрәсән» региональн әңгүдин сегләтрмүд сурһуль-эрдмин министерствслә хамдан көдлмшин багмуд бүрдәһәд, бат ясврин йовудыг онц оньгтан автха гиҗ эн дурдв.
Сурһульмудын һардачнр болн эк-эцкнрин комитетмүд эн көтлвр яһҗ тохрагдҗахинь эрк биш медх зөвтә, нег чигн объект эднә һар тәвлһн угаһар батлгдх зөв уга. Селәдт бәәдг дунд сурһульмудыг шин кергсләр теткх кергтә, гиҗ Андрей Турчак темдглв.
Үлгүрлхд, Псковск мүҗин Родина поселкин дунд сурһульд бат ясвр кегдснә хөөн ФОКОТ тосхгдмн. Энд спортивн комплекс көдлхмн, эннь бичкдүдин садмудт бас нилчән күргхмн. Эн сурһулин бүрдәц 1907-ч җилд секгдв, хораснь өдгә цагин санитарн болн түүмр саглуллһна некврмүдлә ирлцҗәхш. Дәкәд эрмдгтә бичкдүдт сән таал бүрдәх кергтә, гиҗ эн сурһулин һардач Сергей Воронин зәңглв.
«Негдсн Әрәсән» Хальмг региональн әңгин ахлач Анатолий Козачкон келсәр, таңһчин сурһульмудар ноха сарин 5-ас авн сурһулин шин җилд яһҗ белдсинь экләд хәләҗәнә. Партин шунмһа гешүд болн эк-эцкнрин ниицәс эн керг-үүлдврт бас орлцҗана. Федеральн Төв эн туст дөң-тусан күргҗәхнь темдгтә, гиҗ Анатолий Васильевич келв.
Бат ясврта шин хораст ирәд көдлснь баахн багшнрт урмд өгнә. Селәдт ирҗ көдлдг багшнрин тонь өсх гиҗ сангдна. Лузск района Лальск поселкин дунд сурһуль ясврин көтлврин түрүн тоод орв. Энд түрүләд инженерн коммуникац болн терзмүд сольх кергтә. Партин көтлвр эн туст маднд тусан күргхднь ицҗәнәвидн, гиҗ бүрдәцин һардач Андрей Зарубин темдглв.
Бат ясврин бәрмт цаасд белдлһнд онц оньган тусхатн гиҗ Андрей Турчак регионмудын толһачнрт даалһв, иргч хойр-һурвн җилмүдин бюджетдән чиклвр орултн, гиҗ эн неквр тәвв.
2022-ч җиләс авн орн-нутгин 1500 дунд сурһульмудт бат ясвр кегдхмн, энүг «Негдсн Әрәсә» партин нилчәр күцәҗ чадхвидн. Тавн җилин эргцд 7211 сурһулин бүрдәц ясгдхмн, гиҗ федеральн министр Сергей Кравцов зәңглв.
«Негдсн Әрәсән» депутатнр регионмудын бүрдәцсәр шинҗллт кеҗ, бат ясвр кергтәһинь герчлв. Цуг арһ-чидлән олзлҗ, хамдан Президентин даалһвриг цаглань күцәхмн, гиҗ Сергей Кравцов дурдв.

Белдснь КАРСАНА Евгения

Видео