Бичкдүдин поликлиник секгдв

17-08-2021, 15:13 | Общество

Өцклдүр Элст балсһнд бичкдүдин поликлиник байрин бәәдлд секгдв. Эн өдриг бичкдүд болн эднә эк-эцкнр кесгтән күләҗәсмн. Ода эн өдгә цага ке-сәәхн бәәрнд хотл балһсна болн Целинн района бичкдүдт медицинск туслмҗ күрггдхмн. Энд өдрт 550 күн ирҗ чадҗана, 30 педиатрическ участк үүлдхмн.
Ончта йовдлла Манҗин Валентинан нертә таңһчин бичкдүдин медицинск төвин көдләчнриг болн бичкдүдиг йөрәхәр кесг гиичнр ирв. Хальмг Таңһчин Толһач Хаска Бату, таңһчин правительствин Ахлач Юрий Зайцев, таңһчин эрүл-менд харлһна министр Кикенә Юрий, таңһчин тосхлтын, көлгн-күчнә болн хаалһин министр Җанҗин Виктор, таңһчин бичкдүдин зөв харсдг күцц зөвтә элч Чужан Наталья, онц арһлач Михаил Богатов болн нань чигн дааврта һардачнр байрин керг-үүлдврт орлцв. Бурхн Багшин Алтн сүмин багш Йонтен гелң болн Элстин болн Хальмгин епархин сегләтр эцк Алексий ном умшад, эмнлһнә бүрдәц күцәмҗтәһәр үүлдҗ, бичкдүдин эрүл-менд харлһнд үнн кевәр церглхиг дурдв.
- Эн объект кесг җилдән эдлврт орулгдх гиҗ күләгдсмн. 2008 җиләс авн энд тосхлтын көдлмш эклсмн. Элст балһсна болн Целинн района 37 миңһн күүкн-көвүнд ода энд медицинск туслмҗ күрггдхмн. Шин поликлиник мана хотл балһсиг кеерүлснь лавта. Энд дорас өсч йовх баһ үйд медицинск дөң күргхин төлә цуг таал бәәнә. Эн объект таңһчин әмтнә болн һардврин оньгт билә. Тегәд арһ-чидлән негдүләд, эн төр хаһллһнд тәвцән орулсн, таңһчин цецгәрлтин төлә көдлҗ чаддг улсин ач-тусар поликлиник секгдв. Мана бичкдүдин төлә иим ке-сәәхн, өдгә цага некврлә ирлдцг поликлиник секгдҗәхнь олна байр болҗана, – гиҗ Бату Сергеевич келв.
Бичкдүдин медицинск төвин ах эмч Манҗин Светлана таңһчин һардврт, тосхачнрт, хамдан көдлҗәх үүрмүдтән ик ханлтан өргҗ, поликлиникин эмчнр болн дунд медицинск көдләчнр эврәннь даавран даавртаһар күцәҗ, өөдән чинртә медицинск дөң күргҗ үүлдх гиҗ үгән өгв.
Дарунь Хальмг Таңһчин Толһач Хаска Бату, таңһчин бичкдүдин медицинск төвин ах эмч Манҗин Светлана болн «Җилин сән гисн өрк-бүл» гидг Цугәрәсән марһана таңһчин девсңд «Олн үртә өрк-бүл» гидг номинацд диилвр бәрсн Зудбиновихнә өрк-бүл улан тасм керчв.
Эмнлһнә бүрдәц секлһнд нерәдгдсн керг-үүлдврт «Эволюция» гидг өдгә цага бииһин лабораторин болн «Тюльпанчик» гидг шаңһа ансамблин күүкд-көвүд орлцҗ, билг-эрдмәрн байриг сәәхрүлв. Бичкдүдт таасгддг мультфильмсин болн туульсин дүрмүдин костюм өмссн артистнр бичкн пациентнрин төлә нәр-наад давулснь эднд ик байр үүдәв. Келн-улсин театрин артистнр бичкдүдт «Айболит против Бармалея» гидг наадын тасрха үзүлв. Байрин керг-үүлдврт олн үртә өрк-бүлмүд дунд давулгдсн марһаст диилвр бәрсн элчнр орлцв. Байрин керг-үүлдврт орлцсн бичкдүдт белг бәрүлҗ өггдв, эдниг шикр-балтаһар тоов. Тер өдрин бийднь үдин хөөн түрүн пациентнр шин поликлиникд ирҗ, эмчд бийән үзүлв.

ДАВАН Наталья
А.Зундугинова цоксн зург

Видео