Эврән кесн кегдлмүд ончта

17-08-2021, 15:33 | Общество

Кен-негнднь олн зүсн белгүд белглнә: үнтә-кимд, ик-бичкн, кесг өңгтә болн соньн материалар кегдсн белгүд болн нань чигн.
Бичкнәсн авн Дорҗин Данара эврә һарарн юм кехдән дурта, эдин тасрхасар наадһастан бүшмүд уйдг билә.
Өсәд-босад талдан материалар кегдлмүд кедг болв. Нег дәкҗ дунд сурһульдан сурч йовсн цагтан цааснас бичкн кегдлмүд кех дурм күрв, гиҗ Данара келнә. Хөөннь җил ирвәс эн керг улм таасгдад, шишлң дегтрмүд болн седкүл хулдҗ авад, тенд соньн кегдлмүдин тускар умшад, хәләһәд, эрдмән цааранднь гүүдүлв. Даслурмудтан сәәхн һадр, белг тәвдг бичкн орац, сиик-билцг тәвдг бичкн хәәрцг кедг болв. Дорҗин Данаран келсәр, дурн болн цол бәәхлә, күн болһн олн зүсн кегдлмүд кеҗ чадхмн. Седклән тәвҗ кесн кегдл нерәдәд белглхлә эрк биш таасгдх. Арвн хойртадан арвн дөрвтәдән эврә мөңгн уга болсн учрас гертән бәәсн материалмудар эврә һарарн белг кеҗ болхмн, мел иим кевәр би үүрмүдтән белгүд кеҗ белглләв, эннь үнтәд тоолгдна, гиҗ Данара темдглнә.
Өдгә цагт дорас өсч йовх үйнр интернетын эв-арһ олзлад, өдр-сө уга компьютерт болн телефодан наадад сууна. Энүг уурахин төлә бичкнәснь авн үрдтән соньн юм үзүлх кергтә, үлгүрләд келхлә, кегдлмүд кедг дасххла, интернетд суудг цол уга болхмн, гиҗ Данара Саналовна баахн экнрт селвгән өгчәнә. Үрн болһниг ямаран чигн кергәр соньмсулҗ болхмн.
Байрин, ончта өдрмүд учрхла кесг материалар кегдлмүд кенәв, ик зууднь нимгн цаас, хату цаас, эд-утц, шил олзлад кенәв. Өрк-бүлән шинкн өндәлһҗәдг баһчудт хүрмин нәәртнь улан әрктә шилнь болн уудг ааһ-савнь эдәр ораҗ, деернь сәәхн цецгүд наалдулҗ сәәхрүлнәв. Дәкәд болхла демин мөңг тәвдг бичкн авдр, хүрмин йөрәл бичдг сәәхн дегтр болн «скрапбукинг» эв-арһар открытк кеҗ һарһнав. Келхд, шин җилин байрин өмн цуг әмтн герән сәәхрүлдг авъяста, би болхла һацурт өлгдг олн-зүсн наадһас кенәв. Сурһулин җилин йовудт көвүн күүкн хойртм кегдлмүд кедг даалһвр бас өггднә, энүгинь хамдан күцәнәвидн, гиж Дорҗин Данара келнә.

КАРСАНА Евгения

Видео