Евразийск экономическ ниицәнд көдлнә

21-08-2021, 17:06 | Общество

Өдгә цагт таңһчин баһчуд орн-нутгин талдан балһсдт йовҗ, ик сурһульд орна. Сурһулян төгсәһәд ик зунь үлдҗ, тендән күч-көлснә хаалһан эклнә. Нурһлҗ Москваһур болн Әрәсән ар үзгт бәәдг балһсд тал темцнә. Тер һазрт бийән сән талас үзүлҗ, седклән тәвҗ көдлнә.
Нег тиим күүкнә тускар бидн келҗ өгхәр бәәнәвидн. Бостан Юлия Көтчнр селәнд 1988-ч җилд төрсмн. 1997-ч җилд эн эк-эцктәһән, ахтаһан Элстүр нүүҗ ирсмн. Энд 17-ч тойгта дунд сурһуль төгсәһәд, 2005-ч җилд Москва балһсна Залврин ик сурһульд орв. Оютн болсн цагт Юлия вузин олн керг-үүлдврмүдт шунмһа кевәр орлцдг билә. Сурһулян сәәнәр сурад 2009-ч җилд «ГУУ-н хамгин сән оютн» гисн марһана «Номин халхар күцәмҗ бәрсн» девсңд йилһрв. 2010-ч җилд ик сурһулян төгсәҗ, мел тер җилд «Центр» нертә керм тосхлһна номин-шинжллтин күрәлңд ирҗ көдлв. 2012-ч җилд интеграционн ниицәнә делгрллтин тускар соңсҗ, Юлия нааран ирҗ, көдлмшт орулдг күүндврт орлцад, бийән сән талас үзүләд, Евразийск экономическ комиссин көдләч болв. Тер цагт ЕАЭС-ин тоод Әрәсә, Беларусь болн Казахстан орсмн. Хөөннь Армения болн Кыргызстан орн-нутгуд немгдв. ЕАЭС-ин тоод орҗадг орн-нутгудын хоорндк хәрлцән, келн-улсин экономикиг цааранднь улм делгрүлҗ, әмтн ни-негн бәәхин туст сән таал тогтаҗ бүрдәлһн – эннь ниицәнә һол күслнь мөн. Баахн мергҗлт Бостан Юлия кесг җилдән үнн-чик седклтәһәр көдлҗ, өдгә цагт ЕАЭС-ин селвгч болҗана. Юлиян келсәр, көдлмшнь йир соньн, кесг балһсдар йовҗ харһлтсин йовудт, олн әмтнлә таньлдҗ, күүндҗ дамшлтан хоршана.
Эврәннь медрлән улм гүүдүлхин төлә 2019-ч җилд эн МГИМО-д экономическ дацңгин магистратурт орҗ сурв. Көдлмшәсн тасрлт угаһар очн кевәр сурсмн. Эн җил улан дипломтаһар МГИМО төгсәһәд магистр болв.
2020-ч җилин чилгчәр Евразийск экономическ ниицәнә делгрллтин халхар көдлмштән сән күцәмҗ бәрсндән Юлия Ханлтын бичгәр ачлгдв.
Юлиян эк Надежда Бадмаевнан келсәр, күүкнь бичкнәсн авн шулун-шудрмг, дунд сурһулян сәәнәр төгсәҗ, хөөннь эврән Москваһур йовҗ ик сурһульд шүүврән амр кевәр өгч сурдг болв. Өдгә цагт эдн өрк-бүләрн Москвад бәәнә. Шидр Бостан Юлия зуни амрлһнд һарад, эк-эцктәһән Элстд ирәд, элгн-садтаһан, үүрмүдтәһән харһад, байртаһар цаган давулв. Дәкәд немхд, күүкн эк-эцкән дахулад Домбай йовҗ сергмҗтәһәр амрв. Бостан Надежда күүкнь ик сурһульта, дурта көдлмштә болдгнь байрта бәәнә. Күн болһнд көдлмшнь тааста болхла эрк биш орн-нутгтан, төрскн һазртан тусан күргхнь лавта, гиҗ эн келнә. Тегәд Юлия цааранднь чигн сән кевәр көдләд, төрскн һазриннь нер дуудулҗ йовтха гиҗ дурдҗанавидн.


КАРСАНА Евгения

Видео