«Көк теңгсин айс» Лаганя һазриг кеерүлх

28-08-2021, 14:25 | Общество

Эн долан хонгт Хальмг Таңһчин Толһач Хаска Бату, таңһчин правительствин Ахлач Юрий Зайцев, вице-премьер Босхмҗин Гилән, таңһчин ЖКХ-н болн энергетикин министрин үүл дааҗадг Мангута Виктория, таңһчин тосхлтын, көлгн-күчнә болн хаалһин эдл-ахун министрин үүл дааҗадг Антон Рубанов болн Лаганя района муниципальн бүрдәцин толһач Очра Очр Нижний Новгород балһснд болсн «Җирһлин төлә таал: балһсн болн усн» гидг V-ч Цугәрәсән форумд орлцв.

Таңһчин Толһач пленарн сүүрт орлцв, терүнд бичкн балһсдт болн тууҗлгч селәдт сән кец-таал тогталһна сән гисн төсвсин Цугәрәсән марһана аш медгдв. Лагань балһсна паркд сән таал тогталһна «Көк теңгсин айс» гидг төсв Әрәсән 73 субъектас орҗ ирсн 307 эрлһ дундас 160 дииләчин тоод орв. Эн төсв бәәдл-җирһлд тохралһнд Әрәсән тосхлтын болн жилищн-коммунальн эдл-ахун министерствин грант йилһгдв. Темдглхәс, эн җил Цугәрәсән марһана саң 10 җува арслң күртл икдв, тегәд марһанд диилвр бәрсн төсвс күцәлһнд 30-с авн 100 сай арслң күртл йилһгдхмн.
Эн паркин төсвәр бичкдүдиг асрҗах өрк-бүлмүд, спортсменмүд, ах үйин улс, баһчуд цаган сергмҗтәһәр давулхин төлә салу-салу орм бүрдәгдҗ сән таал тогтагдхмн. Тер мет бәәрн арһлачнрин төлә орм йилһгдсн бәәнә. Нааран ирх әмтнә төлә әәмшг уга бәәдл теткхин төлә видеохәләвр кегдхмн, сөөднь болхла олн зүсн шам герл өгхм. Төсвлә ирлцәтәһәр паркд олн зүсн модд суулһгдхмн, йовһар йовдг улсин болн велосипед унҗ амрдг әмтнә төлә шишлң орм йилһгдхмн. Бадм цецгтә боодг болн фонтан эн паркин кеермҗ болхмн. Дәкәд Көк теңгсин көвәд амрхар ирсн улсин тускар ухалад, энд пристань тосхгдхмн. Байрин нәр-наад давулхин төлә энд тәәз углҗ тәвгдх, бичкдүд нааддг талвң, спортивн комплекс бас тосхгдх.
– Лаганя улс эн төсв белдлһнд шунмһаһар орлцсна болн района һардвр терүг дигтә-даратаһар тогтасна ашт эн марһанд диилвр бәргдв. Тегәд төсв белдсн цагт бәәрн әмтн болн райодын муниципальн бүрдәцсин толһачнр селәнә бәәдл-җирһлд хамцу үүлдснь болн чикәр цуг некврмүд күцәснь ик чинр зүүнә, – гиҗ таңһчин Толһач темдглв.
Форумин көдлмшин йовудт таңһчин Толһач «Дом.РФ» акционерн ниицәнә генеральн директор Виталий Муткола харһҗ күүндв. Харһлтд Элстин барун үзгт эҗго һазрин комплексн делгрлтин төр босхгдв. Тер мет Хаска Бату урбанистикин Московск төвин директормудын хүүвин ахлач Сергей Капковла харһв, эдн мана таңһчин хотл балһсна делгрлтин тускар күүндв.
– Әрәсән правительствин Ахлач Михаил Мишустин пленарн сүүрт темдглсәр, объектмуд тосхлһна болн тенд сән кец-таал тогталһна цагт хамцу үүлдх кергтә, эврәннь кергтән седклән өгч, региондан дуран өгч көдлх кергтә. Энтн бәәсн һазран делгрүлхд дөң болна, таңһчин цецгәрлтин төлә инвестормудыг соньмсулхд туслх, – гиҗ Бату Сергеевич немв.

Бәәрн улс болн гиичнр энд амрх
КҮҮКӘН Нарн, Хальмг Таңһчин правительствин Ахлачин дарук:
– Мана таңһчин селәдт болн балһсдт сән кец-таал тогталһн энтн чинртә төр болҗана. Сүл цагин эргцд эн халхд бидн аһу ик көдлмш кесн бәәнәвидн. Лагань Цугәрәсән марһанд диилвр бәрснь Көк теңгсин көвәд бәәдг балһсна делгрлтд туслхнь маһд уга. Сән кец-таал тогтах ормд ода балһсна бәәрн улс, нааран ирсн гиичнр цуглрҗ цаган сергмҗтәһәр давулсн деерән энд арһлачнр эврәннь кегдлмүдән хулдҗ, туслмҗан күргҗ үүлдхмн. Лагань Цугәрәсән марһанд орлцхиг Хальмг Таңһчин Толһач Хаска Бату дөңнснд ханлтан өргҗәнәв. Эн марһанд күцәмҗтәһәр орлцхин туст Бату Сергеевичин өгсн даалһврмуд болн некврмүд күцәгдв, аштнь Лагань дииләчнрин тоод орв.
МАНГУТА Виктория, Хальмг Таңһчин жилищн-коммунальн эдл-ахун болн энергетикин министрин үүл дааҗадг:
– Бичкн балһсдт болн тууҗлгч селәдт сән кец-таал тогталһна төсвсин Цугәрәсән марһанд диилвр бәрснь мана таңһчин төлә ончта болн темдгтә йовдл болҗана. Мана таңһчд зуг хойр бичкн балһсн бәәнә, эннь Лагань болн Городовиковск. 2018 җиләс авн эдн сән кец-таал тогталһна төсвсин марһанд орлцҗана. Городовиковск балһсн 2019 җилд дииләчнрин тоод орв, эднә төсв күцәмҗтәһәр күцәгдв. Эн җил Лагань диилвр бәрв. Эднә белдсн төсв йир соньн, чинртә, өөдән кемҗәтә болснь маһд уга, тер төләд марһана комиссь терүг үнлв. Эн төсв күцәлһн района һардврт ик урмд өгхнь лавта. Эн төсвин һол күслнь мана селәдин болн балһсдын әмтнә төлә сән кец-таал тогталһн, эднә бәәдл-җирһлин кемҗә өөдлүллһн болҗана.
ОЧРА Авдотья, Лаганя района Олна палатын ахлач, Хальмг Таңһчин ачта багш, күч-көлснә ветеран:
– Мана таңһчин делегац шидр Нижний Новгород балһснд «Җирһлин төлә таал: балһсн болн усн» гидг V-ч Цугәрәсән форумд орлцсна тускар олнд зәңгллһнә эв-арһсас соңслав. Тегәд терүнд мана Лагань балһснд сән кец-таал тогталһна «Көк теңгсин айс» гидг төсв диилвр бәрснь ик байр-бахмҗ үүдәв. Мана балһсн өдр ирвәс сәәхрәд бәәхнь темдглх кергтә. Балһсна сән кец-таал тогталһна көтлврәр Ленинә нертә паркд ясвр кегдсн билә, тенд бәәрн улс амрхдан дурта. Ирх җилд болхла Көк теңгсин көвәд бәәдг паркд өдгә цага некврлә ирлцдг ке-сәәхн парк кегдхмн. Мана бичкн балһсн ямаран сәәхн болхинь, бичкдүд болн медәтнр амрхин төлә ямаран таал тогтагдхинь, бадм цецгүдин боодг кегдхинь тер төсвин зурад үзчкәд, ирх җилд көдлмш эклхиг теңкән уга күләҗәнәв. Мана района болн балһсна баһ наста толһачнр седвәртә, шин хәләцтә, өдгә цага һардачнр болҗахнь темдгтә, эдн бәәсн һазриннь цецгәрлтин төлә цааранднь чигн күцәмҗтәһәр үүлдҗ йовтха гиҗ дурдҗанав.
ДООҖАН Наталья

Руководитель исполкома Общероссийского народного фронта в РК, депутат Народного хурала (парламента) РК Мергульчиев Баатр Сергеевич: «Көк теңгсин айс» Лаганя һазриг кеерүлх
- В первую очередь хотелось бы поздравить с долгожданной победой Лагани во всероссийском конкурсе. Наконец-то приморский город попал в число победителей и получателей гранта для благоустройства общественной территории.
Безусловно, это положительно отразится на комфортной городской среде Лагани. А значит и на жизни самих лаганцев. Самое главное, чтобы муниципалитет добросовестно реализовал данный проект «Мелодия Каспия», успешно и вовремя его завершив.

ЗУРГТ: Әрәсән тосхлтын болн ЖКХ-н министр Ирек Файзуллин, Лаганя РМО-н толһач Очра Очр, Хальмг Таңһчин Толһач Хаска Бату болн Әрәсән тосхлтын болн ЖКХ-н министрин дарук Максим Егоров

Видео