Дулаһар теткхдән белн

28-08-2021, 14:50 | Общество

«Энергосервис» компаньд ирх намрин-үвлин кемд балһсна гермүдиг болн бүрдәцсиг дулаһар тетклһнд котельнсиг белдсиг бүртклһнә керг-үүлдврмүд төгсҗәнә. Хаврин болн зуни сармудт балһсна котельнст ясврин көдлмш кегдв, дулаһар теткдг кергсл шинҗлҗ белдв.

Шидр «М.Горькийин», «Пединститут», «Пионерск», «Стардом», «Ар үзгин» болн «КГУ» гидг котельнс бүрткгдв. Ноха сарин 27-д кесн то-дигәр балһснд бәәдг 27 котельняс 23-д бүртклһнә керг-үүлдврмүд болв. Хотл балһсна һардврин, таңһчин ЖКХ-н болн энергетикин министерствин, Госжилинспекцин болн «Энергосервис» компанин элчнрәс бүрдәгдсн комиссь ноха сарин 31-д үлдсн наадк дөрвн котельнд одад, тенд дулаллһна кемд ямаран белдвр кегдсиг хәләхмн.
Ирх намрин-үвлин цагт әмтнә гермүдиг болн социальн бүрдәцсиг дулаһар тетклһнә кем дааврта болна, тегәд «Энергосервис» компаньд цугинь дигтә-даратаһар белдхд, ясврин көдлмш келһнд ик оньг өггднә. Белдврин керг-үүлдврмүд батлгдсн зураһар күцәгдв. Киитн цагт мана гермүдт дулан болхин төлә компанин көдләчнр көдлмшән тохнятаһар күцәҗ, эвдрсн кергслиг ясҗ, котельн кемтг угаһар үүлдхин төлә цугинь белдв.
«Энергосервис» акционерн ниицәнә 2-ч участкиг сүл долан җилин эргцд Александр Стасенко чадмг кевәр һардҗана. Энүнә келсәр, хаврар болн зунар энд аһу ик көдлмш күцәгдв. Тиигәд, «Пионерск» гидг котельнд таңһчин дотр-дундын кергүдин министерствин өөр олн җилдән олзлгдҗ йовсн турва сольгдад, 80 метр шин турва углҗ тәвгдв. Ахнр Алехинихнә нертә уульнцд 2-ч «А» гер күртл хуучн төмр турван ормд полиэтиленар кесн турва тәвгдв, Городовиковин нертә уульнцд 17-ч тойгта гер күртл бас 120 метр шин турва сольгдв. Тегәд өдгә цага материалар кегдсн турва олн җилдән олзлгдҗ, эн гермүдиг дулаһар теткхмн.
Бас тер мет 2-ч тойгта участкин долан котельнд ус сорлһна, цеврлһнә кергсл болн турвас шинҗлгдв. «Дулаллһна кемд белдвр келһнд мана участкд 60 көдләчәс 40-нь орлцв. Цуһар шин коронавирусн гемәс саглуллһна некврмүд күцәҗ көдлв. Бидн долан котельн теткнәвидн. Мана участкин медлд хотл балһсна төв орна, эннь олн давхр гермүд, предприятьмүд, социальн объектс болна. Оператормуд Банҗин Цаһан, Бадмин Алена болн Ольга Малиева белдврин көдлмшт шунмһаһар орлцҗ, үнн-чик секдлтәһәр болн даавртаһар үүлдв. Слесарьмуд Бакан Максим болн Александр Тарабановский, һаңнач Лоран Павел цуг даалһврмудыг бүрн-бүтнәр күцәҗ, көдлмшән арднь орҗ сәәнәр кев. Цуһар эдн байн дамшлтта болн өөдән мергҗлттә көдләчнр болна. Ирх намрин-үвлин кемд олна гермүдиг болн бүрдәцсиг дулаһар тетклһн дигтә-даратаһар давх гиҗ ицҗәнәвидн. Бидн белдврин көдлмшиг өөдән кемҗәнд күцәввидн», – гиҗ Александр Стасенко темдглв.

ДАВАН Наталья
ЗУРГТ: «Энергосервис» акционерн
ниицәнә 2-ч участкин слесарь
Александр Тарабановский көдлмштән

Видео