Сурһульчнр спортар соньмсхин төлә

28-08-2021, 14:55 | Общество

Шидр Элст балһсна һардврин толһач Дмитрий Трапезников 4-ч болн 23-ч тойгудта сурһульмудт тосхгдҗадг спортивн стадиона йовудыг бүрткв. Эн сурһульмудт күүкд-көвүд цогц-махмудан батрулҗ, чик авг-бәрцәр бәәхин, спортар соньмсхин төлә футбольн, баскетбольн болн волейбольн талвңгуд, воркаут тосхгдхмн. Тер мет бичкдүд сул цаган тустаһар болн сергҗмтәһәр давулхин төлә шишлң орм бүрдәгдхмн.

Хотл балһсна 23-ч тойгта сурһульд ода баскетбольн болн волейбольн талвңгин төлә шишлң девскр углҗ тәвхин төлә белдврин көдлмш кегдҗәнә. Гүүдг хаалһс кехин төлә үүрмг чолу асхҗ бас шишлң девскр углҗ тәвхмн. Дарунь футбол нааддг орм кегдхмн. Спортивн комплексиг эргнднь хашалхин төлә шин хаша-хаац тәвгдхмн.
Шин сурһулин җил эклхәс урд энд гемтә-шалтгта бичкдүдин төлә сән таал тогтагдҗ, пандус тосххмн. Бүртклһнә керг-үүлдврин йовудт илдкгдсн дуту-дундс дарунь чиклх даалһвр өггдв. Тиигәд, балһсна һардврин заллтсин көдләчнрт тосхлтын көдлмшин диг-дара дигллһнә, сурһулин өмн олн зүсн урһмл суулһна туст неквр тәвгдв.
23-ч тойгта сурһульд ода деерән 900 шаху сурһульч сурчана, дәкәд Элстин эн захд иим спортивн комплекс дәкҗ уга, тегәд объектиг сән чинртәһәр болн әмтн цогц-махмудан сән таалд батрулхин төлә цугинь кех кергтә гиҗ Дмитрий Трапезников темдглв.
Балһсна 4-ч тойгта сурһульд спортивн комплексин тосхлт одахн гилтә эклв. Эн объект «Хевел» гидг компаня дөң-тусар бәәдл-җирһлд тохрагдҗана. Энд бас футбольн, баскетбольн болн волейбольн талвң, гүүдг хаалһ тосхгдхмн. Бас тер мет инвестормудын мөңгәр сурһулин эргндк һазрт воркаут болн бичкдүд нааддг талвң тосхх төр хаһлгдҗана. Ода деерән энд футбол нааддг орм белдҗәнә, гүүдг хаалһ тосхх ул тогтагдҗана.
Хотл балһсна һардврин толһачин даалһврар сурһулин өөр урһҗадг модд эд-бод келһнә, эрмдгтә бичкдүдин төлә пандус тосхлһна, хаша-хаациг шинрүлҗ ширдлһнә төрмүд хаһлгдхмн. Спортивн комплексин тосхлтын көдлмш үвл эклтл төгсхмн гиҗ зуралгдҗана.
Мана зәңгч

Видео