Сойлын бүрдәцсиг дөңнх

31-08-2021, 14:52 | Общество

Хальмг Таңһчин правительствин Ахлачин дарук Ирина Шварцман Хальмгин сойлын болн билг-эрдмин халхар сурһуль-эрдмин бүрдәцсин һардачнрла селвлцә давулв. Эндр билг-эрдмин сурһульмудт федеральн болн региональн кемҗәнд ик оньг өггдҗәнә. «Сойл» гидг келн-улсин төсвин медлд теднә материальн-техническ ул батруллһна, көгҗмин зевсгүдәр, сурһулин дөңцлмүдәр болн кергсләр тетклһнә төрмүд хаһлгдҗана.
«Бичкдүдин билг-эрдмин сурһульмудт көдлдг багшнрин чинриг өөдлүлх кергтә. Сурһульмудт мана бичкдүдин төлә сән таал бас тогтах кергтә, цуг эн төрмүд чинртә болҗана», – гиҗ вице-премьер темдглв.
2021-ч җилд «Сойл» гидг келн-улсин төсвин медлд Троицкое селәнд бичкдүдин билг-эрдмин сурһулин бәәрнд бат ясвр кегдҗәнә. Ода деерән хореографическ болн концертн залмудт шин бәәрн тосхгдв, эргндк һазриг ахулҗ сән кец-таал тогтаҗана. Тер мет көгҗмин зевсгүд, шишлң кергсл, өлг-эд болн оргтехник хулдҗ авгдхмн. Эн объект 2021-ч җилин чилгч күртл эдлврт орулгдхмн. 2022-ч җилд болхла Баһ Дөрвдә районд бичкдүдин билг-эрдмин сурһульд бас ясврин көдлмш кегдхмн гиҗ зуралгдҗана.
Селвлцәнд 2020-2021-ч җилмүдт билг-эрдмин сурһульмудын үүлдврин аш диглгдв, теднә делгрлтин төрмүдәр өргн күүндвр болв, П.Чонкушовин нертә билг-эрдмин колледжд баһчудыг орулҗ авлһна тускар келгдв. Тер мет бичкдүдин билг-эрдмин сурһульмудын үүлдвр олзта-туста болхин төлә сурһуль-эрдмин заллтын медләс сойлын заллтын медлд оруллһна туск төр босхгдв. Селвлцәнә аштнь С-Г.Доржина нертә 1-ч тойгта көгҗмин сурһулин багш Ольга Банановад «Хальмг Таңһчин сойлын ачта көдләч» гидг өөдән нерн зүүлһгдв. Таңһчин сойлын халхд олн җилдән үнн-чик седклтәһәр көдлҗ йовх төләднь Ольга Дмитриевнад вице-премьер Ирина Шварцман ханлтан өргҗ, өөдән ачлврин темдг бәрүлҗ өгв.
Мана зәңгч

Видео