Мал асрхла – амн тоста

02-09-2021, 10:02 | Общество

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр 220 өрк-бүлд социальн бооцана халхар шаңһас дөң күрггдв. Җирһлин күнд таалд туссн улст көдлмш олҗ авхд, эврә дөңцл эдл-аху бүрдәхд болн нань чигн керг-төр хаһлхд дөң күргҗ, мөңгн йилһгдв. Ут тоодан эн кергт 32 сай арслң олзлгдв. Социальн бооцан гиснь энтн баһ тетквртә өрк-бүллә батлгдсн бооцан болҗана. Эн көтлврт сарин теҗәлин олз-орунь таңһчд батлгдсн баһ гисн кемҗәһәс баһ болҗах өрк-бүлмүд орлцҗ чадҗана. Социальн бооцаһар иргн эврәннь керг бүтәлһнд 250 миңһн арслң күртл, эврә дөңцл эдл-аху бүрдәлһнд 100 миңһн арслң күртл, көдлмш олҗ авхд 44 миңһн арслң күртл болн җирһлин күнд таалас һархд 66 миңһн арслң күртл авхмн.
Яшалтан района Эсто-Алтай селәнд бәәдг олн үртә Ванькаевихнә өрк-бүл эн көтлврт орлцад, эврә дөңцл эдл-аху бүрдәхәр шиидв. Герин эзн эн көтлврин тускар медәд, терүнд орлцхар седв. Эдн района әмтнә социальн харслтын цергллтд одад, социальн бооца батлхин тускар медүлв. Җирһлин күнд таалд туссн һурвн үртә өрк-бүллә социальн бооцан батлгдад, эн кергт мөңгн йилһгдв. Ведомствс хоорндк комиссин шиидврәр эднд 100000 арслң йилһгдв, 2022-ч җилин мөчн сарин 30 күртл социальн бооцан батлгдв. Терүгәрн эдн хойр үкр хулдҗ авв.
– Мана күүкд үкр хулдҗ авхиг сурв. Күн болһн бичкндк цаган тодлхларн шиңкн саасн үс сандг болх. Бидн бичкндән үс уухдан йир дурта биләвидн, тегәд мана үрд бас өдр болһн үс ууҗ, үстә зүүтә хот-хоолта болхин тускар ухалад, хойр үкр хулдҗ авхар шиидвидн. Келхд, үкртә болсна хөөн мана өрк-бүлин олз-ору икдв, үлү үсиг бидн хулдад, мөңг хоршаҗ авдг болвидн. Үсән цокад, өрм, тос, ээзгә кенәвидн. Бичкдүдин цогц-махмуд болн эрүл-менд бат болхин төлә сән чинртә хот-хол кергтә, – гиҗ герин эзн Александр Батрович келнә.
Шаңһас йилһгдсн мөңгәр Ванькаевихн хойр үкр хулдҗ авч, теднд Зорька болн Марта гидг нерд өгв. Һурвн үрнь эднә өрк-бүлд хойр үкр бәәхд йир байрта бәәнә, эдн чадсарн нөкд болна.
Ванькан Александрин келсәр, социальн бооцан эднд күнд таалас һархд дөң болв. «Бидн эдл-ахуһан делгрүлх санатавидн. Тавн сар хооран күүкн төрҗ һарв, тегәд мал асрҗ өрк-бүлән теҗәх кергтә. Мана өрк-бүлин төлә социальн бооцан йирин мөңгн биш, энтн мана җирһлин шин халх гиҗ келҗ болҗана. Ода мана җирһл эрк биш ясрх», – гиҗ герин эзн темдглв.
ДООҖАН Наталья

Видео