Сурһмҗлачнриг йөрәв

30-09-2021, 08:49 | Общество

Шидр мана орн-нутгт сурһмҗлачин сән Өдр темдглв. Хальмг Таңһчин Улсин Хуралын (Парламентин) Ахлачин дарук Сергей Сухинин Элст балһсна 5-ч тойгта «Березка» бичкдүдин садын көдләчнрлә харһад, сән өдрләнь эдниг йөрәв.

Бичкдүдин садт дорас өсч йовх күүкд-көвүд билг-эрдмән делгрүлнә, эргндк делкәлә таньлдна, ах улсиг күндлдгиг, хоорндан ниитә бәәхиг дасна, гиҗ Сергей Александрович темдглв. Күндтә гиич Улсин Хуралын депутатнрин нерн деерәс сурһмҗлачнрт ханлтан өргҗ, эдн көдлмшән ик даавртаһар, үнн-чик седклтәһәр күцәҗәхиг үнлв. Бичкдүдин садт олн җилдән көдлҗәх зәрм сурһмҗлачнрт Хальмг Таңһчин Улсин Хуралын (Парламентин) Ахлачин Ханлтын бичг бәрүлҗ өггдв.
Мана таңһчд сурһульд орад уга бичкдүдин бүрдәцс сән делгрлт авчана гиҗ келх кергтә. Таңһчд шин бичкдүдин садмуд, немр бәәрн тосхгдҗана, бичкдүдин садмудт өдгә цага некврлә ирлцдг сән таал тогтагдҗана. Тиигәд, эн җил Элст балһсна 5-ч тойгта «Березка» бичкдүдин садт «Демографь» гидг келн-улсин төсвин медлд немр бәәрн тосхгдв, тенд 40 орм бүрдәгдв. Дәкәд энд бичкдүдин төлә шин талвңгуд секгдв.

Мана зәңгч
ЗУРГТ: Хальмг Таңһчин Улсин Хуралын (Парламентин) Ахлачин дарук
Сергей Сухинин бичкдүдин садын көдләчнриг ачлҗах кем

Видео