Ач-тусинь хәрүлҗ бүлән үгән нерәдхмн

02-10-2021, 13:52 | Общество

Сән авъяст тохрсар хулһн сарин 1-д цуг нарт-делкәд медәтнрин Өдр темдглгднә. Эн сән Өдриг мана орн-нутгт 1992-ч җиләс авн темдглдг болв, тегәд җил болһн эн өдр бидн мана аав-ээҗнрин ач-тус хәрүлҗ, белгән нерәдҗ, тедндән золһҗ однавидн. Мана ах үйин улсин җирһлин хаалһ адрута бәәсмн, эдн баһ цагтан дәәнә болн тууврин күчр зовлң дааҗ һарсн улс болҗана.

Кен ахан күндлҗ, кен бичкнән өкәрлҗ бәәхин авъясиг хальмг өрк-бүл болһнд сәәнәр хадһлна. Эк-эцкнь көгшрхләрн отхн көвүнә герт бәәх зөвтә болна. Аав-ээҗнь ачнр-зеенртән хальмг улсин авъяс, заңшал зааҗ, чик сурһмҗ өгдг. Тегәд чигн хальмг өрк-бүлд үйнрин залһлдан бат болдг. Сән өдрин байр болхла цуһар аав-ээҗнртән белгән авад, мендинь медхәр адһдг, цуһар өрк-бүләрн цуглрҗ хамдан нәр-наадан кедг. Болв эндрк мана җирһлд хальдврта гем учрсна ашт ах үйин улсин эрүл-мендин тускар ухалҗ саглх кергтә. Урднь предприять-бүрдәц болһнд ветеранмудан тевчҗ бас харһлт бүрдәдг бәәсмн, ода болхла шикр-балта гертнь күргҗ өгхәс теднлә харһҗ болшго болв.
Сүл цагт медәтнрин эрүл-менд харлһна, эднә җирһлин таал ясруллһна төрмүдт мана орн-нутгт ик оньг өгдг болв. Тиигәд, «Демографь» гидг келн-улсин төсвин медлд «Ах үйин улс» гидг федеральн көтлвр батлгдсн бәәнә. Аав-ээҗнр финансин халхар шин медрл хоршаҗ авхин төлә, компьютер олзлдгиг дасхин төлә шишлң кичәлмүд давулгдна.
Шидр Хальмг Таңһчин социальн делгрлтин, күч-көлснә болн көдлмшәр тетклһнә министерств медәтнрин Өдр угтҗ зургудын марһа зарлв. Терүнд нертә зурачнрин зургудын дүрмүд дураҗ зург цокх кергтә бәәсмн. Тегәд медәтнр терүнд шунмһаһар орлцҗ, ке-сәәхн дүрмүд үзүлҗ, олн-әмтнә тааслт олв. Валентина Сухина, Окна Любовь, Антонина Вдовицкая, Моржан Светлана болн нань чигн медәтнр нарт-делкәд нернь туурсн зурачнрин зург дураҗ дүр тогтав. Сарпан района Шарнут селәнд бәәдг медәт Манҗин Роман болхла хальмг зурач Ольдан Ким зурсн «Теегин эзн» зург дураҗ зурган цокулв, энүнд хойр миңһн һар күн дууһан өгв. Министерствин социальн халхд барлгдсн зургудыг әмтн таасҗ медәтнрт буульмҗта үгмүд бичв. Тиим кевәр эдн марһанд билг-эрдмән үзүлҗ, сән өдриг сергмҗтәһәр давулв.
Бидн мана газетин умшачнриг сән Өдрин байрла йөрәҗәнәвидн, бат эрүл-менд дурдҗ, җирһлин байн дамшлтарн хувалцҗ, ачнр-зеенртән нүдн-амн болҗ йовтн гиҗ дурдҗанавидн.
ДАВАН Наталья

Видео