Ке-сәәхн хувцнь цугтаднь зокмҗта

05-10-2021, 10:21 | Общество

Баһ Дөрвд селәнд бәәдг Пүрвән Вера одахн района әмтнә социальн харслтын цергллтлә социальн бооца батлад, хувц-хунр уйдг ателье секв. Урднь эн гер деерән әмтнә сурврар ямр нег хувц-хунринь ясҗ, халаслҗ, уйҗ туслмҗ күргдг билә. Һартан өөтә күүкд күн хатхмр хатхдг эрдм дасч авх болн эврә керг бүтәх сана зүүҗ йовсмн. Болв эврә ателье секхин төлә мөңгн кергтә бәәсмн, тегәд көдлмш уга улс социальн бооца батлҗ шаңһас дем авч чадхиг медәд, Вера Николаевна сансн санаһан күцәв.

Баһ Дөрвдә района муниципальн бүрдәцин һардврин экономистнр энүнд бизнес-зура тогталһнд дөң-тусан күргв. Социальн бооцана халхар Пүрвән Верад эврә керг бүтәлһнд 250 миңһн арслң йилһгдв. Района алвна цергллтд арһлач болҗ тоод зогсад, эн үүлдврән эклв. Хам-хоша бәәдг Аһш балһснд одад, күүкд күн йилһгдсн мөңгәр хувц-хунр уйдг болн хатхмр кедг кергсл хулдҗ авв. Тенд олн зүсн эд, товч, нань чигн кергтә тоот хулдҗ авнав гиҗ арһлач хувалцв.
- Би бичкнәсн авн юм уйнав. Эк-эцкм һартан өөтә улс билә. Бидн экмдн болн ээҗм уйсн хувц өмсдг биләвидн. Эцкм болхла орс беш тәвдг, модар урлдг эрдмтә билә, бәрсән кедмн, хара суудмн биш. Бидн Астраханск мүҗин Черноярск района Поды селәнд бәәдг биләвидн, тегәд орс улсас эцкм олн зүсн эрдм дасч авсмн. Сурһулян төгсәснә хөөн би КБО-д сурлав, хөөннь Хальмг ик сурһульд көдлн бәәҗ эрдм дасв. Олн җилдән Ик Царң болн Баһ Дөрвд селәдт технологин багшар көдлҗ йовлав, бичкдүдин үүдәлтин төвд һарин эрдмин кружок давулдг биләв. Тегәд насн-җирһлиннь туршарт һарин эрдмәр соньмсҗ, бичкдүдт юм уйдг дасхлав. Келхд, Баһ Дөрвдә «Хамдан» баһчудын төвд күүкдлә ке-сәәхн бүшмүдин коллекц уйсн биләвидн. Тедн долан зүсн өңгтә билә, бүшмүд болһн бадм цецг, бамб цецг, теегин ноһа үзүлнә, – гиҗ Вера Николаевна келв.
Ода Пүрвән Вера Баһ Дөрвд селәнд нег бәәр нәәмәдлҗ авад, ателье секв. Бәәрн күүкд улс энд ке-сәәхн хувц уюлна. Келхд, Вера Николаевна эврә эд, утц олзлҗ уйдг, хатхмр хатхдг болв чигн белн кегдлин үннь ик биш. Тиигәд, бүшмүд 2 миңһн арслң, костюм 3,5 миңһн арслң күрнә. Күүкд улс биидән зокмҗта, тааста, цогц-махмудтнь таалта хувц уюлхар шунна. Дәкәд Вера Николаевна кегдл болһниг адһм угаһар, тохнятаһар болн сән чинртәһәр уйдгиг эдн меднә. Одахн Ик Царң селәнә бичкдүдин садын келн-улсин багин сурһмҗлач күүкд-көвүдт әдл җиләтк уйхиг сурв. Тегәд кех-күцәх көдлмш бәәнә, бичк-бичкнәр олз орҗана, тегәд кергнь сәәнәр делгрх гисн нәәлвр бәәнә.
Вера Николаевнан келсәр, Мергн көвүнь эврә керг бүтәхд бас омг өгв. Баахн көвүн түрүн селвгч болн нөкд болҗ, ямаран хувц-хунр өдгә цагт олн-әмтнд таасгдҗахиг, ямаран эв-арһ олзлҗ кеерүлхиг зааҗ өгнә. Мергн Элстд нег кафед көдлнә, тегәд экнь көвүндән келн-улсин авг-бәрцтәһәр хувц уйҗ өгв. Хамдан көдлҗәх үүрмүднь терүг таасад, бас бийдән тиим хувц уюлв. Ода эдн цуһар әдл хувцта, эннь эдн тал ирсн улсин оньг авлна.
– Ода деерән би һанцарн көдлҗәнәв. Нәәмәдлсн бәәрн бичкн, хатхмр хатхдг кергсл олзлад угав. Харм төрхд, ода сән уячнр ховр болҗана, тегәд нөкдиг олҗ авхд амр биш. Би кегдл болһниг сән чинртәһәр уйхар зүткнәв, нерән өөдән бәрх кергтә. Көдлмш уга улсин төлә иим социальн бооца батлҗ шаңһас мөңг йилһҗ өгчәхнь йир сән. Ода би бийән дааһад, эврәннь кергән делгрүлҗәнәв, алвна мөңгән орулҗ өгнәв. Урднь эврә керг бүтәҗ, өдгә цага сән кергсл хулдҗ авч чадхв гиҗ сандго биләв. Көдлмшәр тетклһнә төр иим кевәр хаһлгдҗахнь темдгтә. Мини медсәр, кесг күн эврә керг бүтәҗ чадв, дөңцл эдл-аху бүрдәв. Социальн бооцан нанд ик урмд өгв, би дурта керг күцәҗ олзтаһар үүлдҗәнәв, – гиҗ күүкд күн келҗ, таңһчин социальн делгрлтин, күч-көлснә болн көдлмшәр тетклһнә министерствд, района социальн харслтын төвин көдләчнрт ханлтан өргв.
ДООҖАН Наталья
ЗУРГТ: Пүрвән Вера көдлмштән

Видео