Чик сурһмҗ өгхәр шунна

07-10-2021, 10:04 | Общество

«Калмыкия» таңһчин зәңгллһнә агентствд «Чайка» студийин АНО-н мергҗлтнр Буйнта Манжеевала болн Елена Армановала брифинг болв.

Эн студь һурвн җил шаху үүлдҗәнә. Студин һол күслнь дорас өсч йовх мана үйнрин болн эднә эк-эцкнрин хоорндк хәрлцә тогтахин төлә психологическ дөң күрглһн мөн.
Ноха сард коммерческ болн правительственн биш бүрдәцс дунд давулгдсн марһанд «Чайка» студь дииләчнрин тоод орҗ, таңһчин субсидь шүүҗ авсмн. Марһанд 62 орлцачас хөрн зурһань диилвр бәрәд, мөрә авв.
«Чайка» студин мергҗлтнр Хальмг Таңһчд эк-эцкнрин гегән-герлин экосистем бүрдәлһнә төрәр төсв харсв. Эн ик төсвиг сурһулин җилин йовудт хаһлхар зуралҗанавидн, гиҗ студин психолог Елена Арманова келв. Студьт эк-эцкнр ирәд, үрдтән чик сурһмҗ өгхин туст кесг керг-үүлдврт орлцҗ, мергҗлтнрәс шишлң селвг авч чадхмн.
Онц темдглхд, студин мергҗлтнр Хальмг Таңһчин правительствлә, сурһуль-эрдмин болн номин, баһчудын болн спортын, күч-көлснә болн социальн делгрлтин министерствслә залһлда бәрҗ шунҗ көдлнә. Эк-эцкнрт сән таал бүрдәхин төлә студьт дегтрин шишлң саң бәәнә: энд 400 даву дегтр хадһлгдна. Келхәс, шүүҗ авсн мөңгәр студьт өдгә цагин кергсл хулдҗ авгдв, эннь алс зәәһин эв-арһар олн зүсн төрмүдәр вебинар давулх арһ өгнә. Иргчдән You-tube каналар дамҗулад, эврәннь көдлмшән давулх зура бәәнә, гиҗ Буйнта Манжеева келв. Төсв күцәлһнә йовудт эк-эцкнрин төлә 45 харһлт давулхар бәәнә.
Ах үйән, эк-эцкән күндллһн мана һол керг болҗана, эн тоотыг арвтнрт медүлх кергтә, гиҗ Елена Александровна хувалцв. Хулһн сарин 23-д болх эк-эцкнрин семинарт (Ленинә нертә уульнц, 305-ч тойгта герт) ирж орлцж чаджанат, гиж Буйнта Николаевна үрвр кев.
КАРСАНА Евгения

Видео