Эдгсн улс ханлтан өргнә

07-10-2021, 10:12 | Общество

Хальмг Таңһчд үүлдг Әрәсән дотр-дундын МСЧ-н ФКУЗ-ин медико-санитарн әңгин эмнлһнд Лариса Петровна Абрамова хөрн җил даву седклән тәвҗ көдлнә. Ямаран чигн эрдм әмтнд кергтә болн чинртә, медицинск эгчин көдлмш бас өвәрцтә, гиҗ эн келнә.

1998-ч җилд МВД-н МСЧ-н эмнлһнд Лариса Петровна дамшлтта мергҗлт болад ирсмн.
Гемтә улсиг орулҗ болн бичүлҗ авлһн, эмчин бичсн цаасар эм өглһн болн нань чигн кесг тоотыг медицинск эгч күцәнә. Көдлмш нанд йир тааста, энтн мини җирһлд онц орман эзлсн мөн. Эмнлһнд туссн әмтн нанд элгн-садн мет, хамдан көдлдг улс болхла мини өрк-бүл болҗ медгднә, гиҗ Лариса Абрамова келнә.
Таңһчд коронавирусн гем илдкгдсн цагас авн медицинск көдлмш хүврәд бәәв гиҗ келх кергтә. Эн гемәр гемтсн улсин тонь икдәд, эмчнр болн медицинск эгчнр шишлң хувц өмсдг болв. Гемтсн әмтнд шулун гидгәр тәрлһ болн нань чигн көдлмш күцәнә. Полицин көдләчнр дунд талдан регионмудт болсн дәәнд орлцсн улсин тонь баһ биш, зуг зәрмнь ода чигн тәрлһ кехәсн әәнә, гиҗ эн инәнә.
Көдлмшин дарани селгәнә хөөн Лариса Абрамоваг гертнь көвүнь күләнә. Арвн дөрвтә үрнь герән ахулҗ, ааһ-сав уһаҗ, шимтә хот белдҗ экән байрлулна. Келхд, Лариса гер дотрк көдлмшиг кехдән дурта, ясвр эврән кеһәд патьран шинрүлв. Кесн ясврнь көвүнднь йир таасгдв, эн экән даңгин магтҗ буульна .
Онц темдглхд, сул цаган Лариса Петровна соньн кевәр давулна. Эн ээрсн утцар, шаврар болн чолуһар олн зүсн кегдлмүд кенә. Кесн кегдлмүдән эн өөрхн улстан болн үүрмүдтән белглнә. Зәрм кегдлмүдән эдгсн улст бас белглнә, эдн белгән гертән хадһлҗ, Лариса Абрамовад бүлән үгән нерәдҗ ханлтан өргнә.

САСКА Марина,
таңһчин МВД-н барин цергллт

Видео