Бурхн Багшин Алтн сүм - хамгин сәәхн хурл

12-10-2021, 13:43 | Общество

Элст балһснд дүңгәҗәх Бурхн Багшин Алтн сүм әмтнә оньг авлгч хамгин сәәхн хурл гиҗ тоолгдв. Автомобильн хаалһсар йовлһна хамгин ик гисн маркет BlaBlaCar Әрәсән тавн региона бурхн шаҗна хурлмудыг йилһлһнә рейтинг кев. Теднә шинҗллтәр Хальмгт бәәдг Бурхн Багшин Алтн сүм Әрәсәд седкл авлгч хамгин сәәхн хурл гиҗ тоолгдад, рейтингин түрүн ормиг эзлв.

«Йириндән бурхн шаҗна хурлмуд әмтнә оньгиг авлдг ке болн өвәрц бәәрн гиҗ тоолгдна. Олн зуульчнр хурлмудын өвәрц архитектуриг, өңгтә ширинь, нәрн кевәр алтыг кеерүллһнд олзлсинь йилһҗ темдглнә. Хурлд орад, седкләрн төвкнсн болҗ амрхдан әмтн дурта. Тиим оюни чидлинь седклин төвшүнә бәәдлд тусхин төлә холд йовад, Азин нутгудт одх кергтә гиҗ әмтнә ик зунь санна. Европд шар шаҗнд шүтдг тавн регион бәәхинь, энд бәәдг улст шаҗна үүлдвр өдр болһни җирһлднь бат орман олсинь кесгнь медхш. Иргчдән иткхин, җирһлин хаалһан ясхин төлә эдн холд бәәдг һазрур темцхш, эврә хурлдан ирәд, зальврад, седкл төвкнүн бәәнә» - гиҗ BlaBlaCar бичҗәнә.
Хальмгин Бурхн Багшин Алтн сүм Әрәсәд болн Европд хамгин сәәхн хурлмудын негнь болҗана. Сүркә сәәхн дүртә эн бәәшң хотл балһсна альк чигн булңгас нүд байрлулҗ үзгднә. Хурл тосхх бәәриг йилһҗ, орминь олҗ әрүслсн Дала ламин гегән әрүн эн үүлдврәрн Хальмгин әмтнд амулң-менд җирһл делдсмн. Хальмгин кеермҗ болсн эн хурл архитектор Сергей Курнеевин төсвәр босхгдсмн. Хальмгин түрүн президент улсин седвәриг дөңнҗ, хурлын тосхлтд ик йовуд өгсмн. Таңһчин әмтн тиигхд ик өргмҗтә седклтәһәр хурлан босхҗ авсмн. Тосхлтын көдлмш тиигхд министрәр көдлҗәсн Виктор Джанжиевин һардврт күцәгдсмн.
Бәәрн әмтнд хурлдан ирлһн йирини йовдл болҗана. Талдан кесг һазрас ирсн әмтиг эн хурлд өдр болһн үзҗ болхмн. Хурлыг һазак бийәснь таасҗ хәләһәд, дотрнь орад, мөргүлин ик хорад Бурхн Багшин көшәд цугтан мөргнә. Өндртән йисн метр эн көшә Әрәсәд болн Европд өндрәрн хойрдгч ормд бәәнә. Бурхн Багшин иим сүркә дүриг Әрәсән ачта зурач, нертә скульптор Владимир Васькин кевлҗ цутхсмн. Нааран орҗ ирсн күн болһнд Бурхн Багшин дүр седкләрн төвкнҗ, цаарандк үүлдврән улм ясрулх седкл зүүлһнә.
Делкәд темдгтә эн һарцин темдглсәр, Хальмгт бас нег соньн бумб бәәнә. Тернь Лагань балһснд тосхгдсн Мәәдр бурхна ик көшә. Эннь Европд хамгин ик бурхн шаҗна көшә болҗана. Иргч цага Бурхн – Мәәдр гегәнә дүртә көшә өндртән 125 метрт дүңгәнә, 30 тонн татна. Шаҗна әрүн тоот, маань бичгдсн цаасд, мөргүлд олзлгддг әрүн тоот, әрүн һазрас авч иргдсн саяд атхм һазр, үнтә чолун болн шаҗна нань чигн тоот көшәд тәвгдсн бәәнә. Бурхн Багшин келиг, цогциг, ухаг әрүн кевәр ниицүлҗ, буйн болтха гиҗ олзлгдсн тоот ода олн-әмтнд церглҗәнә. Үнн цаһан седкләсн босхсн бумбин барун һараснь чиг һарч әмтнд ик өврмҗтә болв. 2020 җилин апрелин 5-д тер әрүн үүлдвр учрснь евәлтә йовдл гиҗ әмтн тоолҗана.
Хальмгин һазрт тиим шаҗна әрүн болсн деерән өврмҗтә сәәхн бумбс бәәхинь делкәд темдгтә һарц үзүлҗ, олн улст медүлснь ик чинртә йовдл.
Рейтингд Бурятин Ринпоче Багша дацан, Туван Церенглинг дацан болн Санкт-Петербургд бәәх буддийск дацан орсмн.
Тиигәд Хальмгин һазрт оюни герл асасн, цуг улс ик баһ уга ни-негн кевәр хамцҗ тосхсн Бурхн Багшин Алтн сүм делкәд темдгтә сәәхн бәәшң болв.

УШКАНА Сувсн

Видео