Тәрлһнә тускар цәәлһх кергтә

14-10-2021, 09:37 | Общество

Эн долан хонгин эклцәр Хальмг Таңһчин Толһач Хаска Бату шин коронавирусн хальдврта гемәс саглуллһна тәрлһ келһнә төрәр селвлцә давулв. Терүнд таңһчин күцәгч йосна органмудын һардачнр болн райодын муниципальн бүрдәцсин толһачнр орлцв.
– 2020-ч җиләс авн бидн COVID-19 гемин пандемийлә ноолда кеҗәнәвидн. Шинҗләчнрин темдглсәр, эн хальдврта гемиг диилхин төлә ор һанцхн эв-арһ бәәнә, энтн саглуллһна тәрлһ келһн болҗана. Тәрлһ кесн күн гемтсн цагт гемнь гиигнәр давна, энүнә эрүл-мендд эн ик харшлтан күргхш, – гиҗ таңһчин Толһач темдглв.
Таңһчин эрүл-менд харлһна министрин дарук Оксана Курдюкова саглуллһна тәрлһ келһнә керг ямаран йовудтаһар давҗахин тускар тооцаһан өгч, вакцин бәәрн әмтнд күртхин төлә ямаран керг-үүлдврмүд күцәгдснә тускар зәңглв. Таңһчд әмтн тәрлһ авхин төлә цуг таал тогтагдв. Ода деерән 14 эмнлһнә бүрдәц, 15 мобильн бригад болн тәрлһ келнә 72 пункт үүлдҗәнә.
Хаска Батун темдглсәр, әмтн дунд тәрлһн туста болҗахин тускар цәәлһврин көдлмш күцәх кергтә. Таңһчин бүрдәцсин, ведомствсин һардачнр хамгин түрүнд тәрлһ кеҗ бийснь олнд үлгүр болх зөвтә гиҗ Бату Сергеевич келв.
Селвлцәнд Хальмг Таңһчар үүлддг ах федеральн инспектор Александр Беляев, таңһчин правительствин Ахлач Юрий Зайцев, энүнә дарукс, таңһчин Толһачин һардврин көдләчнр орлцв.
Мана зәңгч

Видео