Зөрсндән күрх санатаһар

14-10-2021, 10:26 | Общество

Ик кезәнәс авн күүкд күн герин һулмтыг хадһлна гиҗ келдг мөн. Күүкн үриг өскәд асрхла, цуг келн-улст сурһмҗ өглһнлә әдл гисн үлгүр бәәдг йоста. Мел эн үлгүрлә ирлцүлҗ, Геннадий Лиджиевич болн Марина Тюмидовна Инджиковихн Виктория ууһн үрндән чик сурһмҗ өгч җирһлин хаалһд орулв. Шидр эн соньн күүкд күүнлә харһад кесгтән күүндвидн.

Баһ Дөрвд нутга Хонч Нур әәмгә цаатн арвна Инҗгә Геннадийин өрк-бүлд ууһн үрн болҗ Виктория күүкн һарв. Ууһн болсн төләдән эн дү күүкн дү көвүн хойртан даңгин үлгүр болхар шундг бәәсмн. Викториян келсәр, эк-эцк хойрнь дунд сурһулин багшнр бәәсмн, экнь болхла сурһулин һардач болҗ олн җилдән көдлсн болдг. Бичкнәснь авн эк-эцкнь, – цаган бичә үрәтн, тустаһар олзлтн, – гиҗ келдг билә. Һундл төрхд, эдн эрт сәәһән хәәһәд, бурхн болв.
Инҗгә Виктория өдр болһн цаган зуралҗ көдлнә. 2020-ч җилд «Хальмг амн-үгин зөөр» төсв үүдәсмн. Эн онлайн төсвин һол күслнь – хальмг амн үгин зөөрин олн үүдәврмүдиг әмтн дунд тархалһн мөн. Энүнд ик-бичкн уга орлцҗ, кесг амн үгин үүдәврмүдиг айслулад умшҗ, чееҗәр келҗ олнд медүлв. Хальмг ик сурһулин профессор, күндтә багш Евдокия Эрендженовна Хабунова төсвин шинҗләч болв. Нанд нөкд болснд, цаган тусхаснд эӊкр багштан дәкнәс ханлтан өргҗәнәв, гиҗ Виктория келнә. Темдглхәс, «Хальмг амн үгин зөөр» төсвин йовудт Бадмин Эрдм көвүнд талын орн-нутгур эмнлһнд йовх арһ учрв.
2021-ч җилин эклцәр «Зурач» нертә бас нег ик төсв Виктория үүдәв. Өвәрц төсвин йовудт билг-эрдм бизнес хойр тоот негдв. Энүнд орлцачнр: зурачнр, артистнр, сойлын мергҗлтнр кесг соньн мастер-класс, харһлтс давулҗана. Шидр Крымд һаха сарин 30-ас авн хулһн сарин 5 күртл «Tavrida-art» форумд эн төсвин баг орлцв. Энд хальмг зурачнрин зургуд олна оньгт тусхаҗ, эврәннь сойлын тускар тодрхаһар келҗ, орлцачнр хоорндан дамшлтарн хувалцв.
Келхәс, һаха сард «Зурач» төсв «Лукойл» ПАО ниигмин болн сойлын халхар давулсн марһанд орлцад, дииләчнрин тоод орв, гиҗ Виктория байрлв. Эн мөрәһәр шүүҗ авсн мөңгәр таӊһчин райодар йовҗ, төсвин йовудла әмтиг таньлдулх зура бас бәәнә.
2019-ч җилд «Wake up» шин социальн төсвин зура төрсмн. Эн төсв олн үртә экнрин төлә бүрдәгдв. Шишлӊ төсв күцәлһнд «Калмыкия» таӊһчин зәӊгллһнә Агентств нөкд болҗана, гиҗ темдглх кергтә. Олн үртә экнрлә психологуд, хувц үүдәҗ һарһдг дизайнермүд, спортын дамшачнр болн талдан кесг мергҗлтнр көдлнә. Экин дүриг өөдән үнлҗ, ниигмд ончта чинринь медүлҗәх эн темдг болҗана. Төсвд орлцач болһна тускар Хальмгин келн-улсин телеүзл шишлӊ соңсхвр белдҗ үзүлв. Ке-сәәхн хувцта, эрүл-мендин бәәдлән батрулсн, байрта-бахта экнр кен-негнәннь оньг авлснь лавта.
Өдгә цагт Инҗгә Виктория арһлач, олна үүлдәч болсн деерән эӊкр аваль болн хойр үртә эк мөн. Ууһн үрнь Басӊ эн җилд дунд сурһулян төгсәһәд оютн болв, Оливия-Хутан күүкнь зурһата, зургуд зурхдан болн англь кел дасхдан дурта. Герин эзн Әвәшкин Эрнцн Басӊга Баатрин нертә келн-улсин театрин артист мөн. Темдглхәс, «Я – Будда» гүн уха медүлҗәх нааднд нернь ончрв. Викториян келсәр, Эрнцн цуг төсвсиг дөӊнҗ, селвгән өгч бас тусан күргнә.
Инҗгә Викториян эк-эцкнь бичкнәснь авн үрдтән хальмг кел, тууҗ, сойл дасхҗ, чик сурһмҗ өгсмн. Тер төләднь Виктория ик сурһулян йилһән сәәнәр төгсәҗ, ода магистрин диссертац бичҗәнә. Хальмг амн үгин зөөрин тускар медрлән цааранднь гүүдүлхин төлә келмрч аав Инҗгә Лиҗин тускар диссертациг бичхәр шиидв.
Тиим кевәр цааранднь чигн олн-әмтнд тааста соньн төсвс үүдәх санатав, гиҗ эн зураһарн хувалцв. Хойр үрән җим хаалһднь орулҗ, Төрскндән туста улсиг өскхәр зүткҗәнә.
КАРСАНА Евгения
Зургт: Инҗгә Виктория болн Хальмг Таңһчин
зурачнр Шинян Николай, Эледжин Нарн,
Паван Александр

Видео