Очра Номтын санлд нерәдҗ

19-10-2021, 15:48 | Общество

Төрскн дуулвр дууһан хадһлн...

Алтн залата Бумбин нутгт
Буурлдан бийд домбр җиңнҗ.
Нуувчин санлд нанд медгддг
Айс теегин аһу дүүргв.

Тер шарвтр һарин хурһд
Чивхс, цалм олзлсн мет.
Һашун әркәр дөрвн үзгт
Цацл цацҗ герләр сарултулҗ.

Эмәлд дәкәд йовх күн
Хаалһиг утцншң утар төөмдмн.
Төрскн дуулвр дууһан хадһлн
Давсн цагин заль бөкәлгон

Урһмлын хамтхасиг уңгнь хаталгон
Дәкнәс седкләрн үүмҗ җаңһрчин
Цуг бөлгүдән дуулсн дунь.
Олн җилмүдт һазр деер
Оддын герләр солңтрҗ герлтнә.

Орчулснь Хатуһа Николай
1994-ч җил


Хулһн сарин 12-д Очра Номтын нертә Элстин 8-ч тойгта дунд сурһульд «Очра Номт: җирһл болн хөв» гидг балһсна номин хург давулгдв. Эн хург нертә гегәрүләч Очра Номтын 135-ч җилин өөнд нерәдгдсн билә. Хургт Хальмг ик сурһулин профессор Дәкин Раиса, «Хальмг үнн» газетин ах редактор Бембин Евгений, Элст балһсна сурһуль-эрдмин Заллтын методист Аравҗин Валентина, А.Амр-Санана нертә дегтрин саңгин көдләч Һәрән Майя, хальмг келнә багшнр болн балһсна сурһульчнр орлцсмн.
Хургин өмн 8-ч тойгта дунд сурһулин багш Окуна Светлана болн 9-ч классин сурһульч Очра Диана цуг гиичнриг Очра Номтын нертә музейд хадһлгдҗадг экспонатмудла таньлдулв. Хургт орлцачнр «Очра Номтын намтр», «Җаңһр» дуулврин судлл», «Очра Номтын ач-туснь», «Хальмг утх-зокъялд үзүлгдсн Очра Номтын дүр» төрмүдәр илдклмүдән кев.
Бембин Евгений нүр үгдән Очра Номтын кесн ач-тусин тускар эрк биш баһчудт медүлх кергтә гиҗ темдглв. Хальмг ик сурһулин профессор Дәкин Раиса «Очра Номт – Хальмг Таңһчин барин сүүр тәвгч» гидг илдклән соңсхв. «Очра Номт XIX-XX-ч зун җилмүдин хальмг улсин дундас хамгин нертә сегәтә күн мөн. Түүнә тускар келхлә, «хамгин түрүн», «сүүр тәвгч», «бүрдәч» гидг үгмүд заядар һарч ирнә. Тедү мет хальмг улсин хамгин түрүн газетиг бас Очра Номт лхарамба Боован Бадмта хоюрн «Өөрдин зәңг» гидг нерәдлһтәһәр 1917-ч җилин үкр сарин 5-д барас һарһсмн. 1922-ч җилд Очра Номт «Өөрдин зәңг» гидг олна-политикин седкүл барлна» – гиҗ Раиса Батнасуновна темдглв.
Номин конференцд сурһульчнр бас эврә бичсн илдклмүдән умшад, Очра Номтын намтр, әмдрлин тускар, энүнә зе күүкн Улана Нимә-ээҗин болн түүнә бүрдәсн саңгин тускар кесг илдклмүдән медүлв.

ВАЛЕТАН Эльза,
Очра Номтын нертә 8-ч тойгта дунд сурһулин багш
Зургтнь: Элстин дунд
школмудын сурһульчнр
болн багшнр

Видео