Эрмдгтә бичкдүдин төрмүд хәләгдв

19-10-2021, 16:04 | ---

Одахн Хальмг Таңһчин Улсин Хуралын (Парламентин) сурһуль-эрдмин, эрүл-менд харлһна, сойлын, баһчудын политикин, социальн харслтын болн спортын комитетин сүүрт гемтә-шалтгта бичкдүдин социальн теткврин төрмүд хәләгдв. Сүүриг комитетин ахлач Салан Бадм һардҗ давулв. Терүнд вице-спикермүд Сергей Сухинин болн Нуура Николай, таңһчин Улсин Хуралд (Парламентд) Хальмг Таңһчин Толһачин элч Манҗин Араш, таңһчин бичкдүдин зөв харслһна элч Чужан Наталья орлцв.

Мана таңһчд эрмдгтә бичкдүдт сурһуль-эрдмин, эрүл-менд харлһна халхар ямаран таалд туслмҗ күргҗәхин тускар сүүрт орлцсн таңһчин сурһуль-эрдмин болн номин министрин үүл дааҗадг Татьяна Питкиева, социальн делгрлтин, күч-көлснә болн көдлмшәр тетклһнә министр Өлзәтин Марина, гемтә-шалтгта бичкдүдин эк-эцкнрин Цугәрәсән бүрдәцин региональн әңгин Заллтын ахлачин үүл дааҗадг Ольга Сердюкова зәңгллһ кев.
Хойр частан болсн күүндврин йовудт сүүрт орлцачнр гемтә-шалтгта бичкдүд ямаран таалд сурһуль сурдгин, эднд медицинск дөң күргдгин, эрмдгтә күүкд-көвүдлә көдлдг шишлң мергҗлтнриг белдлһнә тускар ухан-тоолврарн хувалцв. Тер мет сүүрт психолого-педагогическ, медицинск болн социальн дөң күрглһнә реабилитационн Төвин үүлдврин тускар күүндвр болв. Харм төрхд, Төв эврә бәәрн уга, эднд гемтә-шалтгта бичкдүдлә шишлң кичәл давулдг мергҗлтнр керглгдҗәнә. Комитетин сүүрин ашар эн Төв бәәр нәәмәдлҗ авчахин туст тогтсн өриг даңцалһнд немр мөңг йилһҗ өглһнә төр хаһлхиг таңһчин правительствд селвг орулв. Сүл цагт эрмдгтә бичкдүдин то өсчәхәс иштә реабилитационн Төвд эднә төлә сән таал тогталһна, мергҗлтнрәр тетклһнә төр хаһлх кергтә гиҗ сүүрт шиидгдв.

ДАВАН Сәәхлә

Видео