Хальмгин театр – Саха (Якутин) һазрт

01-11-2022, 11:43 | ---

«Ик гастрольмуд» гидг федеральн төсвин кемҗәнд Якутин театр Хальмгт ирәд, эврә нааддан үзүлсн билә. П. А. Ойунскин нертә Саха Академическ театрин наадд Элстд ик тааслт олв. Дарунь Басңга Баатрин нертә Келн-улсин театр Якутьд күрәд хальмг драматическ билг-эрдм ямаран болҗахинь үзүлв. Хальмг театрин гастрольмуд күцәмҗтә болв. Якутин хәләһәчнр хальмг артистнрин нааддыг оньган өгч хәләв.

Әрәсән сойлын министерствин «Ик гастрольмуд» нертә төсвин кемҗәнд Якутскур ирсн Басңга Баатрин нертә театр «Я – Будда», «Араш» болн «Хальмг хүрм» нааддыг якутск хәләһәчнрт үзүлв. Хулһн сарин 14-әс авн 16 күртл болсн Хальмг театрин гастрольмуд якутск хәләһәчнрт тодлгдв. Урднь үзәд уга, соңсад уга соньн тоотла эдн театрин нааддын дөңгәр таньлдв.

«Я – Будда» – гүн номин күчн
Шар шаҗнд шүтдг хальмгудын Бурхн Багш ямаран ик оюни ном әмтнд хәәрлсинь ар үзгт бәәдг хәләһәчнр медҗ авв. Әрәсән европейск әңгд бәәдг республикин билг-эрдмлә эн һазрин әмтнә ик зунь түрүн болҗ таньлдв. «Я – Будда» наадар гастролян эклсн Келн-улсин театр хальмг улсин заң-авцин ул сүүр болгч бурхна номин өр-өвч седкл зүүлһдг, эвин бәәдлд бәәдг, буйнч үүлдвр күцәдг номин күчиг наадарн медүлҗ чадв. Делкән саяд улст омг болн чидл өгдг номд шүтдг келн-улсин билг-эрдм ямаран гүн утхта болҗахинь Хальмг театрин наадн медүлв.
Бурхн Багшин ном делкәд бәәх һурвн ик шаҗна негнь болҗана. Саяд улсин җирһлд нилчән күргдг номин күчиг олнд медүлх күслтәһәр театр эн наадан орс келәр тәвсмн.
Саха Якутин зәңгллһнә агентствд өгсн интервьюд Хальмгин театральн үүлдәчнрин Ниицәнә ахлач Сергей Бурлаченко Келн-улсин театр Якутьд авч ирсн һурвн наадна тускар келәд, «Ик гастрольмудын» чинриг темдглв. Федеральн эн төсвин дөңгәр театрмуд хоорндан харһҗ, нег-негн талан нааддан авч үзүлх арһта болсмн. Келн-улсин театрмудын төлә эннь йир сән дөң болҗана.

«Араш» – үннд үкл уга
Хулһн сарин 15-д хальмг артистнр келн-улсиннь һашута җилмүдин санл болгч наад үзүлв. Дәәнд залусан, көвүдән йовулсн, фронтын төлә цугтан көгшн бичкн уга чидлән әрвллго көдлҗәсн көгшдиг, күүкд улсиг болн бичкдүдиг киитн Сиврүр дегц нүүлһсн цаг нааднд илдкҗ үзүлгднә. Хар гөрәр урвачнр гиҗ туугдсн улсин зовлңгин тускар Якутин һазрин әмтн медҗәсн уга. Тер зовлңта цагиг артистнр иткмҗтә кевәр үзүлв. Наадна йовудт якутск хәләһәчнр хальмг әмтнә ик теслтиг, унтршго омгиг болн иргчдән болн үнн юмн үнндән һархднь итксн күчинь наадна дөңгәр йир сәәнәр медҗ авв.
Нег ик орн-нутгт бәәдг келн-улс кен-негнәннь тууҗиг медҗ авхла, әмтн хоорндк эвин бәәдл улм батрхмн болҗана, гисн тоолвртаһар наад хәләсн әмтн герүрн хәрв.
Келхәс, Басңга Баатрин нертә Келн-улсин театр гастрольдан 47 кү авч одсмн. Наадн болһнд артистнр ик даавртаһар орлцҗ, хальмг улсин билг-эрдмиг сән кевәр үзүлхәр зүтксмн. Хальмг театрин гастрольмуд сойлын җирһлд ик йовдл болсна тускар йөрәлин үгдән келхләрн Якутин сойлын болн оюни делгрлтин министр Юрий Куприянов давҗах 2022-ч җил Якутьд йосндан театральн җил болҗахинь темдглв.

«Хальмг хүрм» – җирһлин үндсн болгч авъясмуд
Тууҗин ут хаалһдан кесг күнд зовлңла харһҗ, урмдан эс геесн әмтн өдгә цагт яһҗ бәәхинь, өвкнрин авъясмудыг яһҗ хадһлҗахинь «Хальмг хүрм» наадн Якутин хәләһәчнрт йилһән сәәнәр медүлв. Кен ахан тевчдг авъясан хадһлад, өрк-бүлд күүнә заң-авц бүрддгинь, тер учрар шин бүл төрлһн ямаран ик чинртә бәәсинь режиссер Борис Манджиев тәвсн эн наадн медүлҗәнә.
Якутин тәәз деер һурвн хонгин туршарт хальмг улсин билг-эрдм цуг халхарн герлтҗ, нааднд ирсн цуг улст улсин сойлын зөөрлә харһсн байр белглв. Наадн болһнд әмтн оларн ирҗ, зал оньдин дүүрң бәәв. Наадн болһна хөөн хәләһәчнр ниргҗ альхан ташад, артистнриг тәәз деерәс тәвлго бәәв.
Гастрольмудын ашиг диглсн керг-үүлдврт Саха (Якутин) сойлын болн оюни делгрлтин министрин дарук Владислав Левочкин Басңга Баатрин нертә Келн-улсин театрин артистнрт Ханлтын бичгүд бәрүлҗ өгв. П. Ойунскин нертә Саха Академическ театрин художествин һардач Андрей Борисов гастрольн репертуар йир сәәнәр диглгдсинь, артистнрин наадн йир иткмҗтә болн билгтә болсинь темдгләд, Хальмг театр якут улсин зүркинь авлв, гиҗ иткүлв.
Басңга Баатрин нертә Келн-улсин театрин генеральн директор Галина Шураева болн театрин художествин һардач Борис Манджиев «Ик гастрольмуд» бүрдәсн үүлдәчнрт, Саха Академическ театрин коллективд, Якутин олн хәләһәчнрт зүркни ханлтан өргәд, иргчдән чигн үүдәгч залһлда бәрҗ үүлдхдән белн бәәхән медүлв.
Байрта харһлтыг хальмг артистнр хальмг бииһән биилҗ, цуглрсн улст ик сергмҗ үүдәв. Мөңк көдә һазрин теңгр дор өргн теегин хурлзсн халун түргн салькн орҗ ирсн болҗ, әмтнә седкл байрар дүүрв.

ХӨӨЧИН Галина

Видео