Тааста эрдмнь җирһлин керг болв

21-02-2023, 18:42 | Общество

Социальн көдләч медәтә, эрмдгтә, һанцарн бәәдг улст, олн үртә өрк-бүлмүдт дөң күргнә. Иим эрдмәр көдлхин төлә хамгин түрүнд өр-өвч седклтә, әмтнлә тевчңгү, һольшг, тесвртә болх кергтә. Зуг тиим авг-бәрцтә күн эн халхд көдлҗ, әмтнд туста болҗ чадхмн. Хар Һазра района әмтнә социальн теткврин комплексн төвин социальн көдләч Дорҗин Надежда тиим улсин негнь болна. Надежда Нарановна социальн халхд 1996-ч җиләс авн үнн-чик седклтәһәр көдлҗ, һанцарн бәәдг медәтнрт болн гемтә-шалтгта улст килмҗән тусхаҗ, арднь орҗ хәләҗәнә. Эн җилмүдин эргцд күүкд күн энүнә хәләврт бәәдг медәтнрлә өөрхн элгн-садн мет болв.
Района КЦСОН-а һардач Харцхан Байртан келсәр, Надежда Нарановна һучн шаху җилдән Адг селәнд социальн көдләчәр көдлҗәнә. Эн көдлмштән ик дааврта, эрдмдән итклтә, үнн-чик хәләцтә, у-өргн седклтә, әмтн дунд күндллһ болн тоомср олсн күн болна. Олн җилин эргцд эн төрскн селәндән медәтнрт болн эрмдгтә улст дөңгән күргҗ, һарлдсн үрнлә әдл тедниг сәәнәр хәләнә. Медәт болһнд эн седкләрн зовҗ, тас уга болад гемтснь цагт өдр-сө гиҗ тооллго ирхдән белн болна. Медәтә болн гемтә-шалтгта улс эврә авг-бәрцтә, заңта болна, тегәд социальн көдләч күн болһнд нәәһинь олҗ, неквринь учртан авч көдлнә.

Дорҗин Надежда Адг селәнд дунд сурһуль төгсәснә дару цаг зуур Селәнә советд тоочар көдлв. Района әмтнә социальн харслтын әңгд медәтнриг хәләҗ дөңгән күргдг социальн көдләчнрин цергллт бүрдәгдхлә Надежда Нарановна эн көдлмшт орв. Тер цагт Адг селәнд ах үйин улс дала билә, тедн дунд дәәнд орлцачнр, һанцарн бәәдг аав-ээҗнр бәәсмн. Дорҗин Надежда болн Саңһҗин Валентина социальн көдләчнр болҗ, тавад кү хәләдг болв. Тиигхд газ орулгдад уга бәәсмн, тегәд беш түлх, мод болн нүүрс белдх, герт ус орулх, нань чигн күнд көдлмш кех кергтә болдмн. Эндр болхла әмтнә гермүдт газ болн усн бәәнә, тегәд үвлин цагт дулан, кирән болн ааһ-саван уһахд бас цуг таал тогтагдв. Социальн көдләчнр медәтнрт хот-хол, эм хулдҗ авна, гер дотркин хурана, жилищн-коммунальн туслмҗин мөңгинь өгнә, нань чигн керг күцәнә. Көдлмшән кеһәд, ямр нег даалһвринь күцәснә хөөн эдн медәтнрлә күүндәд, эднә тодлврмудынь соңсҗ, ю-бис күүндҗ, цәәһән ууҗ, сенр хот болһҗ цаган давулна.

– Мини хәләврт олн җилдән Булһн Шитляевна болн Ноһан Шитляевна Будыевихн билә, эгч-дү хойр хамдан бәәсмн. Һундл төрхд, эдн насан барв. Эдн мини авалин элгн-садн билә, тегәд Сиврин туск тодлврарн хувалцҗ, мана өвкнр ямаран зовлң үзсинь тодлҗ, ода күүкдтән болн ачнр-зеенртән келҗ өгнәв. Пандемийин өмн мана селәнә Сойлын герт олн зүсн керг-үүлдвр болдг билә, мана көгшд терүнд орлцхдан дурлдмн. Ода болхла эдн олн-әмтн цуглрдг һазрт одхасн саглна, тегәд ямр нег сән өдр болхла, бичкн болв чигн белгән нерәдҗ эдниг байрлулхар шуннав, – гиҗ Надежда Нарановна келнә.

«Первомайский» эдл-аху селәнд бәәдг медәтнриг, олн үртә өрк-бүлмүдиг сәәнәр дөңннә. Тиигәд, сән авъяст тохрсар, бар сарин 28-д, Диилврин Өдр болн ямр нег байр угтҗ, медәтнрт мах, энд кеҗ һарһдг махна зүүтә хот-хол, боднцг, талдан темс, нань хот-хол авч ирнә. Келхд, селәнд сән өдмг болһна, тернь 15 арслң күрнә. Надежда Нарановнан келсәр, долан хонгт һурвн өдрт өдмг болһна, тегәд медәтнр халун өдмг авч ирхиг сурна. Селәнд олна дамшлтын эмчин офис тосхгдҗана. Медицинск эгч Саңһҗин Надежда энд олн җилдән көдлҗәнә, тегәд социальн көдләч энүнлә бат залһлда бәрҗ, медәтнрт дөң кергтә болхла терүг дарунь дуудна.
Ода энүнә хәләврт Габдулинихнә, Цернәхнә, Горяшкиевихнә өрк-бүлмүд бәәнә. Медәтнр нурһлҗ һанцарн бәәнә, күүкднь өсәд-босад талдан һазрт йовна. Насн-җирһлиннь туршарт үнн кевәр көдләд, отг-әәмгтән күндтә улс болсн медәтнр эндр чигн олнд туста болхар зүткдгнь бахмҗта. Одахн эдн шишлң цергә керг-үүлдврт орлцҗадг нег һазра улст бичг бичҗ, Төрскән харсачин Өдрлә йөрәв, дулан өөмс өлгв. Района КЦСОН-а көдләчнр бийснь бас эн буйнч седклтә кергт орлцҗ, цергчнрт дулан хувц-хунр, хот-хол белдҗ, демән күргв.

Дорҗин Надежда бийән хөвтә күүнд тоолна. Эн тааста эрдмәрн олн җилдән көдлҗ, әмтнд тусан күргҗ йовна, күүкднь өсәд-босад бас бийән дааҗ йовна. Көвүн-бертәһән бәәдг найн һурвта экнь Екатерина Боктаевна күүкн-күргндән дару-дарунь ирҗ, дорас өсч йовх җич-зеенчнртән белгән нерәднә. Басан Босхомджиевич авальтаһан эдн дөч һар җилдән ниитәһәр, кен-негнәннь седкл медҗ, байр-зовлңган әдл хувалцҗ бәәнә. Эдн һурвн үрндән чик сурһмҗ өгәд, эндр ачнр-зеенриннь кишгт багтҗ, тедндән ицгтә түшг болна. Ууһн Александр көвүнь Лаганя болн Хар Һазра райодт ГИБДД-н әңг һардна, эн һурвн үртә, отхн Савр көвүнь эцктәһән төрскн селәндән көдлҗәнә. Эн греко-римск бөк бәрлдәнә спортын мастер болна, таңһчин бәәтхә, Әрәсән марһаст диилвр бәрҗ нер һарсмн, Савр 4 үртә эцк болна. Ор һанцхн Ирина күүкнь Садовое селәнд өрк-бүләрн бәәнә, авальтаһан хойр үрән асрҗана. Эднә өнр-өсклң өрк-бүл эк-эцкиннь герт цуглрхдан дурта, Надежда Нарановна цугтаһинь сенр хот-хоолар тоона.

– Нег җилдән социальн көдләч болҗ көдлчкәд һарнав гиҗ би түрүләд санлав. Болв хөрн долан җил нег агчм кевтә давв, эн көдлмшм мини җирһлин һол керг болв. Эврәннь аав-ээҗнр угаһар нег өдр чигн бәәҗ чадхшв. Амрлһнд һарсн цагтан бидн Валентина Сангаджиевнала нег-негән соляд, медәтнрән хәләвр угаһар үлдәхшвидн. Эн җилмүдин эргцд бидн заңгинь болн авг-бәрцинь сәәнәр медәд, нег-негндән иҗлдәд, өөрхн улс болвидн. Һанцарн үлдсн көгшдин ач-тус хәрүлҗ килмҗән тусхаҗ сәәнәр хәләх зөвтә болнавидн. Эдн җирһлиннь хаалһдан кесг зовлң үзсн болв чигн цаһан седклтә, төрскн һазр-усндан дурта, өвкнриннь авъяс-сойл хадһлҗ йовх улс болна. Мана көдлмш күнд болв чигн бидн мана аав-ээҗнрәс үлгүр авч, сәәнинь өргәд, дотран зальврҗ бәәнәвидн, – гиҗ Надежда Нарановна келнә.

ДООҖАН Наталья
ЗУРГТ: социальн көдләч Дорҗин Надежда Саңһҗин Геннадийин герин һазакиг цеврлҗәнә

Видео