Хаврин болн күч-көлснә байр

Сегодня, 15:29 | Общество

Хөн сарин 1-д мана орн-нутгт хаврин болн күч-көлснә байр темдглнә. Сән авъяст тохрсар, Әрәсән балһсдт болн селәдт байрин керг-үүлдврмүд бүрдәгдҗ, әмтн хамдан сергмҗтәһәр амрна. Әрәсән Президентин зәрлгәр мана орн-нутгт улсин ниицлтин җил болҗахас иштә эн сән өдр хойр дам чинртә болв. Олн келн-улс ниицлтән медүлҗ, хаврин байриг хамдан темдглҗ, билг-эрдмән үзүлхмн.
Урднь Советин Союзин цагт эн сән өдр күч-көлсчнрин ниицлтин Өдр гиҗ темдглгддг бәәсмн, тегәд хамдан көдлҗәдг улс эн өдр балһсна эс гиҗ селәнә төв уульнцар йовҗ, көдләчнрин зөв харслһна, бүрдәцст сән таал тогталһна төрмүд босхдг бәәсмн. Сән өдр угтҗ селәд-балһсдт субботникүд бүрдәгдҗ, күч-көлсч коллективс сән кец-таал тогтаҗ, хог-богас эргндк һазриг ахулҗана. Мана орн-нутгт хөн сарин байриг амрлһна өдрмүд гиҗ зарлгдна, тегәд кесгнь талдан һазрт бәәдг элгн-садндан гиичлҗ одна, үүрмүдтәһән зуульчлҗ эн өдрмүдиг хамдан давулхар шунна. Зәрм улс болхла эврәннь сад-һарудтан көдлҗ, модд суулһҗ, цаган тустаһар давулна. Эн җил бидн хөн сарин 1-әс авн 3 күртл амрхвидн, тегәд эн өдрмүдиг олзта-тустаһар давулх арһ учрҗана.
Мана таңһчд эн өдр бас байрта-бахмҗтаһар темдглгдҗ, олн зүсн нәр, марһан бүрдәгднә. Тиигәд, Көтчнрә района Ергенинский селәнд җил болһн мөрнә урлдан, спортын марһас болна. Хальмг Таңһчин профсоюзин федерац эн өдр бас байрин хургуд болн харһлтс бүрдәҗ, төрскн һазриннь делгрлтд ач-тусан күргсн күч-көлсчнриг ачлна. Эндр Орс Келн-улсин театрт байрин хург болн таңһчин билгтнрин концерт болхмн.

Мана зәңгч

Видео