Баһ цаган тодлад…

28-02-2023, 22:50 | ---

Урдк җилин һаха сард Көтчнрә района Һашун Бурһстын селәнә дунд сурһуль ончта өөнән темдглв. Эндр күртл болхла мана газетин редакцд ханлтта төгсәһәчнрәс бичгүд ирҗәнә. Эн дунд сурһулин төгсәһәч Анатолий Зунов бас тодлврарн хувалцҗана:
– Мана класст 25 күн сурла, цуһар сурһулян сәәнәр сурдг биләвидн. Эднәс үлгүр автн гиҗ багшнр талдан классмудын сурһульчнрт келдг билә. Сурһулян төгсәһәд, цуһар медрлән цааранднь гүүдүлхин төлә ик сурһульд орҗ кесг эрдмәр сурдг болв. Өдгә цагт бидн гертә-малта бөдүн улс болнавидн.

Хамдан сурч йовсн көвүд-күүкдлә хая-хая харһнавидн, юңгад гихлә көдлмштән даргдад харһдг цол уга болна. Тиим харһлтсин йовудт бичкндк цагтан болсн шогта йовдлмудын тускар тодлҗ күүнднәвидн. Тер мет маднла хамдан сурсн Афганистана һазрт цергләд әмнәсн хаһцсн мана үр Бадмин Һәрәг даңгин тодлнавидн. 2022-ч җилин хөн сарин 9-д, Алдр Диилврин Өдрлә бидн энүнә санлынь тевчҗ, футболар марһа давулвидн. Бадмин Һәрә Афганистанд даавртаһар церглҗ, дәәнә зер-зев зөөдг билә. Энүнлә церглҗ йовсн үүрмүднь Чувашин Республикәс Николай Леонтьев, Аһш болн Полтава балһсдас Андрей Гордиенко, Виктор Онищенко хойр Һәрән тускар бүлән үгән келҗ, цаһан седклтә күн бәәсиг темдглдг билә. Һундл төрхд, Бадмин Һәрә тер дәәнд әмнәсн хаһцв. Цергә кергт бийән баатр кевәр үзүлснь төләднь «Цергә ач-тусин төлә» медаляр ачлгдсн болдг.

Эклц классмудас авн мадниг дамшлтта, ик медрлтә багшнр сурһла. Надежда Владимировна Халаева, Нина Санджиевна Музраева, Галина Васильевна Иванова, Надежда Васильевна Мацакова эдн сурһульч болһна заңгинь медҗ, кичәлмүдән соньн кевәр бүрдәдг бәәсмн. Йисдгч класст сурч йовхламдн мана селәнүр биологин баахн багш Вера Авлаева ирв. Эн мана классин һардач болв. Вера Сангаджиевна мадниг дунд сурһулян төгсәтл сурһҗ йовсмн. Эңкр багштаһан Һашун Бурһстын дунд сурһулин 100 җилин өөн темдглсн кемлә харһвидн. Өдгә цагт мана күндтә багш Целинн района Деед Яшкулин санаторн сурһуль-интернатд һучн һар җилдән багшлҗ йовна. Бүлән харһлтын йовудт Вера Сангаджиевна күн болһна җирһлин хаалһин тускар соньмсҗ, кен, альд, ямаран халхар көдлҗ йовхинь бас сурв.

Дорас өсч йовх баһчудыг сурһҗадг мана Вера Сангаджиевна эднд гүн медрл өгчәсн деерән дәкәд болхла «Кен теегт бәәнә? Юн теегт урһна?» нертә соньн дегтр барас һарһв. Бичкдүд мана һазрт ямаран аң-адусн, урһмл бәәсиг медх зөвтә, гиҗ багш келнә.

Дунд сурһулин тускар өдр-сө уга келҗ болна. Тегәд иим харһлтсин хөөн баһ цаган, багшнран, хамдан сурсн үүрмүдән тодлад күүнә седкл байсад бәәнә гиҗ сангдна.

ЗУУНА Анатолий
Зургт: Һашун Бурһстын дунд сурһулин 1985-ч җилин төгсәһәчнр
Санкт-Петербург балһсн

Видео