Селәнә сурһулин ончта өөн

01-04-2023, 08:12 | Общество

Яшкулин района Чилгр селәнә дунд сурһуль таңһчд түрүн болҗ секгдсн сурһуль-эрдмин бүрдәцсин тоод орна. Хальмг Таңһчин архивд заагдсар эн сурһуль 1893-ч җилд секгдсмн. Сурһуль-эрдмин эн бүрдәц буйнч седклтә улсин болн Епархиальн училищин советин Хальмг Заллтын нилчәр тосхгдла. Түрүн сурһульчнрин тоод 20 күн билә: 17 хальмг, һурвн орс сурһульч мөн. Хальмг кел, авъяс-заңшал сәәнәр меддг Павел Бордычевский түрүн багшар көдлв. 1898-ч җилд сурһульчнрин то өсәд, тенд 28 күн сурдг болв. Хүвсхлин хөөн бүрдәц әәмгин дунд сурһульд хүврв. Әәдрхнә гимназь төгсәсн Александра Залубьева энүг һардв.

1919-ч җилд сурһулин хораст фронтас бууҗ ирсн шавтсн улан цергчнриг бәәлһв. Тер күнд цагт сурһуль-эрдмин йовудыг бүрдәдг дегтрмүд, даслурмуд уга билә. Тер бийнь сурһуль хаагдсн уга.
1920-ч җилин Ик Цоохра нутгин архивд дәәнә цагт сурһулин йовудыг зогсалго давулсн багш Александра Залубьевад өггдсн Ханлтын бичг хадһлгдҗана. 1921-ч җилд Чилгрт хойр сурһуль секгдв, багтамҗнь тәвн болн һучн тавн күн болв. Тенд Хабланов С.П., Долгин И.А., Орлов В.И., Насунов Э.А. багшлв.
Һучдгч җилмүдт сурһульчнрин тонь өсәд, сурһулин материальн-техническ улнь батрв. Нааран хальмг келнә багшнр ирҗ, көвүд-күүкдт төрскн кел дасхдг болв.
Төрскән харсгч Алдр дәәнә өмн тенд Бадушев М.П., Добронравов А.В., Дорджиев Б.Б., Ковалева В.Н., Хайруллина З.Г. болн талдан багшнр көдллә, сурһулиг Минкеев О.М. һардҗ йовла.

(полную версию статьи можно посмотреть в бумажной версии выпуска № 34 (18873) 4 апреля 2023 года, ВТОРНИК)

САҢҺҖ-ҺӘРӘН Хоңһр,
Чилгр селәнә Л.А.Филимонован нертә дунд сурһулин һардач

Видео