Сойлын тууҗиг тодлулхин төлә

01-04-2023, 08:14 | Общество

Хальмг улсин сойлын тууҗ соньн мөн. Урн үгин зөөр, ду, би, көгҗм үйәс үйд келгдҗ әмтиг залһҗ йовсмн. Давсн цагин үнн тоотыг тууль-түүкдән, дуундан орулад, мана өвкнр хөөтк үйнртән үлдәсмн. Урдк болн өдгә цагиг залһҗах улсин һол үндсн болдг сойлын хамцулгч чинрин туск, хальмг сойлын делгрлтин зун җилә тууҗиг үзүлгч дегтриг Хальмг Таңһчин сойлын ачта көдләч Иван Басангов эврә нөкднртәһән белдсмн. Дегтрин презентац шидр А. Амур-Санана нертә Келн-улсин дегтрин саңд болв.

Улсин үй болһн эврә цагин бәәдлән, учрсн йовдлмудан болн баатрмудыг тодлулсн дууһан болн тууль-түүкдән тер зөөрт немрән орулҗ йовсмн. Тер хол цага дуунд орсн әмтн тиигәд улсин санлд үлдәд, өдгә цага баһчудт үлгүр болна. Муурсн, зовсн цагтан мана өвкнр, аавнр-ээҗнр, эк-эцкнр дууһан дуулад, бурхндан мөргәд, «Җаңһран» соңсад, чидл авсн болҗ, өдр-бүрин үүлдвртән ордг бәәсмн. Цуг эн тоот Иван Басанговин дегтрин презентацин йовудт сангдв.
Таңһчин йосна, сойлын болн олна үүлдәч Иван Нимгирович Басангов Хальмг автономин 100 җилин өөнд нерәдәд, «Хальмгин сойл. Делгрлтин девсңгүд. 1920 – 2020» («Культура Калмыкии. Этапы развития. 1920 -2020») гиҗ нерәдгдсн дегтр барт белдҗ һарһсмн. Тиигәд хальмгудын ончта өөнд улсин тууҗиг, улсин амулң-менд җирһлин төлә әмән әрвллго дәәлдсн, таңһчан босхҗ авхар гүҗрсн әмтнә күч-көлсиг болн залу-зөргиг тодлулсн деерән сойлын халхар эн 100 җилин туршарт ямаран ик көдлмш кегдсинь үзүлхәр Иван Нимгирович ик көдлмш кесн болдг. Дегтрт орсн олн материал белдлһнд таңһчин сойлын цуг бүрдәцс, үүдәгч коллективс орлцсмн.

(полную версию статьи можно посмотреть в бумажной версии выпуска № 34 (18873) 4 апреля 2023 года, ВТОРНИК)

ҖИРҺЛИН Кермн

Видео