Баһ наста артистнрин наадд соньмсулв

13-04-2023, 10:25 | Общество


Басңга Баатрин нертә Келн-улсин драматическ театр баһ наста артистнриг белдлһнд тасрхан уга оньган өгнә. Москван болн нань чигн театральн ик сурһульд баһ наста артистрнриг белдлһнд театрин һардвр даңгин килмҗән һарһна. Дөрвн җил хооран таңһчас билгтә баһчуд Б. Щукинә нертә театральн күрәлңд орҗ сурсмн. Нәәмн хальмг артист театрин коллективин ханьд немгдхмн.

Ода артистнрин дарани баг Щукинск театральн сурһульд сурад, таңһчурн ирхдән белн бәәхән үзүлҗәнә. Актерск эрдм дассн баһчуд мөрн сарин 4-6-д белдҗ авч ирсн һурвн наадан театрин тәәз деер үзүлв. Хойрдгч өдр наад үзүлсн кемд театрт Хальмг Таңһчин Толһач Хаска Бату болн таңһчин сойлын болн зуульчллһна министр Түрвән Саглр ирҗ орлцв. Басңга Баатрин нертә театр иргч селгә белдлһәр Щукинск театральн күрәлңлә залһлда бәрәд йир кергтә көдлмш кеҗәхинь таңһчин Толһач темдглв.
Иигәд мөрн сарин 4-әс авн экләд, өдрт хойр дәкҗ эн студин орлцата керг-үүлдврмүд болҗав. Түрүн өдр үдин хөөн билгтнрт сурһмҗ өглһнд театрин нилч ямаран болдгин туск мастер-класс болв. Эн керг-үүлдвриг Ирина Анатольевна Пахомова һардҗ давулв. Асхн 6 часла театрин хәләһәчнр «Нег теңгр дор» («Под одним небом») гидг наадыг хәләв.
Олн келн-улсин элчнр тәәз деер һарч ирнә. Кесг һазрас ирсн күүкд-көвүд кен чигн эврә җирһлтә, эврә хөв-кишгтә, эврә зөвүр-зовлңта, эврә тууҗта. Ямаран соньн гиһит! Чирә-зүсәрн әдл биш эн баһчуд җирһлин хаалһар йовад, Москвад харһҗ ирнә. Сурһуль сурхар, көдлмш кехәр, кишгән хәәһәд чигн ирсн эдн җирһлдән нег дәкҗ болвчн энд күүнә күн болҗахан, талдан өңг-зүстә гиҗ бацлһнла, нүднь талдан болснд дурго болсн йовдлла харһна. Тегәд иим ик балһснд өнчрсн седклтә бәәнә. Тиигәд «Нег теңгр дор» гидг нертә наадыг ухалад, хамдан белдәд, эн күрәлңгин дөрвдгч курсин оютнр Елена Викторовна Одинцован һардврт тәвсинь элстихн оньган өгч хәләв. Нег теңгр дор нег һазрт бәәх әмтн хоорндан ямаран салу хәләцтә болдгинь, эс гиҗ нег-негән медлцдг өөрхн болдгиг әмтн эврә җирһлдән үзнә. Ода эн төриг баһ наста артистнр тәәз деер үзүлснь соньн гих кергтә.
Хальмг көвүн Баатр Москвад ирәд, энд балһснла яһҗ таньлдснь, энд бәәх орман яһҗ олснь, кедү олн тоотла эн харһснь наадна һол учр-утхинь тогтана. Эн һол халхинь дахулҗ, наадк күүкд-көвүдлә Москван җирһлд учрсн тоотыг артистнр үзүлҗ чадв. Ик орн-нутгт бәәх олн келнулсин элчнр Москвад ямаран кевәр бәәхнь, юунд оньган өгсинь, ямаран хаалһар йовсинь баһ наста артистнр итклтәһәр, үзсн-зовсн, санамрдсн эс гиҗ дегәд бийдән итксинь болн седкл - ухаһинь авлсинь, җирһлд батрхд туслсн тоотыг үзүлсинь хәләһәчнрин оньг авлв.
Мөрн сарин 5-д дарани мастер-класст әмтн цуглрв. Елена Викторовна Одинцован һардврт тәәз деер нааднд боодҗ ухаллһн ямаран чинртә болдгиг ирсн әмтн медҗ авв.
Асхар «Нег сардан деревньд» гидг наадн үзүлгдв. Күүнә җирһлд учрдг дурн ямаран олн халхта болдгинь, байр болн кишг дурдсн деерән дааҗ болшго ик зовлң болдгинь дүрмүдин дөңгәр баһчуд үзүлҗ чадв. Режиссер Ирина Пахомован һардврт эдн иткмҗтә дүрмүд бүрдәв. Шогта йовдлмуд болн йир сәәхн көгҗм наадыг эвтә кевәр кеерүлв.
Мөрн сарин 6-д тәәз деер артист яһҗ көндрҗ, ямаран үүлдвр күцәҗ дүрмүд бүрдәдгинь Владимир Анатольевич Сажинә һардврт артистнр үзүлв.
Тер өдрин асхар әмтн «Чулимскд нидн зунар» гидг наадыг хәләв. Олнд темдгтә драматург Александр Вампиловин наадыг әмтн соньмсҗ күләҗәлә. Әмтнә җирһлд хамгин чинртә болдг төрмүдин тускар Вампилов амрар келҗ медүлдг төләд энүнә наадд әмтнә тааслт олна. Күүнә ухан-седклиг болн заң-авциг сән меддг төләдән Вампилов әмтнә оньг авлдг наад бичсн болдг. Наадн үзүлгдҗәх дүрмүдиг әмтн таньсн болҗ хәләнә. Җирһлд учрдг тоот нааднд орсмн. Дурн, урвлһн, чик седкләр бәәлһн, хаҗһр тоотын туст ямаран хәләц бәрхмн, эн болн нань чигн төрмүд кениг эс үүмүлнә. Эн дүрмүдиг тәәз деер театральн күрәлң төгсәҗәх оютнр элстин хәләһәчнрт үзүлв.
Иигәд һурвн хонгин туршарт театрин тәәз деер баһ наста артистнр соньн һурвн наад үзүлв. Насарн әдл биш, күцәҗәх үүләрн олн-зүсн хәләһәчнрлә харһҗ, артистнр дөрвн җилдән дассн тоотан үзүләд, билг-эрдмин хаалһд орв. Тиигәд хаврин сәәхн сард Хальмг театр дарани шин селгәһән ямаран белдвр авсинь медҗ авв.

ҖИРҺЛИН Кермн

Видео