Бат ясврин йовудыг бүрткв

27-04-2023, 09:30 | Общество


Шидр Əрəсəн Залврин һардачин дарук Дмитрий Чернышенко мана таңһчд ирлһнə кемд Хальмг Таңһчин Толһач Хаска Батула хамдан Л.-Г.Очировин нертə Лагань балһсна 3-ч тойгта дунд сурһульд бат ясврин йовудыг хəлəв.

Орн-нутгин Президент Владимир Путинə седвəрəр күцəгдҗəдг «Сурһуль-эрдмин халхин модернизац» нертə федеральн көтлврəр регионмудт сурһулин бүрдəцст сəн таал тогтагдҗана.
2022-ч җилд бат ясвр таңһчин 17 сурһульд күцəгдв. Эн җилд болхла 24 сурһуль федеральн көтлврт орв. Көдлмшəн чинртəһəр болн цаг болзгтнь күцəх кергтə. Мана сурһульчнр сəн таалта бүрдəцст сурх зөвтə, гиҗ таңһчин Толһач Хаска Бату темдглв.
Келхд, мел эн Лаганя сурһулиг Хаска Бату болн Əрəсəн Баатр Лиҗин Мингиян төгсəсн билə.
Тер мет Бату Сергеевич Дмитрий Чернышенкола хамдан В.Анхановин нертə Лаганя ДЮСШ-д одв. Эн спортивн сурһулин ул деер бичкндəн Хаска Бату футболар болн каратэ-киокушинкайəр дамшдг билə.
Багшнрин болн сурһмҗлгчнрин көдлмшинь темдглҗ, Бату Сергеевич дəкнəс эднд ик ханлтан өргв.

ОЛЬДАН Цаһан

Видео