Таңһчд дөң күргх болв

25-04-2023, 17:19 | Общество

Шидр Хальмг Таңһчд Əрəсəн Залврин һардачин дарук Дмитрий Чернышенко ирв.

Түрүлəд эн «Джунгар» нертə бəəшңд одв. Тенд Дмитрий Николаевич Əрəсəн спортын Министерствин 100 җилин өөнд нерəдсн хоккейин турнир секлһнд орлцв. Əрəсəн Залврин болн Хальмг Таңһчин Толһачин нилчəр Элстд мөсн бəəшң тосхгдад, бəəрн улст хоккей нааддг арһ учрв. Мана орн-нутгт хоккей олн-əмтн дунд тааслт олсн наадн болна. Тегəд эн эв-арһиг олзлад, Əрəсəн Президент Владимир Путин 2030-ч җил күртл орн-нутгин иргнмүдиг 70 процентд күргүлəд спортд орлцулх даалһвр күцəлһнд тəвцəн орулҗ чадҗанат, гиҗ вице-премьер келв.
Темдглхəс, хойр җилин туршарт таңһчин улс дунд мөсн бəəшң тааслт олҗ, тенд үвлин спортивн наадд давдг болв. Тер мет вице-премьер Д.Чернышенко мана таңһчд спорт делгрүллһнə туст ямаран төсвс күцəгдҗəхиг шинҗлҗ, Элст балһснд фиджитал-төв тосхгдх һазринь одҗ хəлəв. «Бизнес-спринт» федеральн төсв күцəлһнд мана таңһчд 78 сай арслң йилһгдв.
Түүнə хөөн Дмитрий Николаевич «Ойрат-Арена» спортын белдлһнə таңһчин төвд «Мы такие как все, только сильнее» нертə таңһчин параспартакиадыг секлһнə керг-үүлдврт орлцв. Энүнə келсəр, спортсменмүд-паралимпийцнр олнд үлгүр болна. Əрəсəн Залвр таднд урдк кевəрн дөңгəн күргəд бəəхмн. Орн-нутгин Президент Владимир Путинə даалһсар, цааранднь чигн тана төлə цуг таал тогтагдхмн. «Мы такие как все, только сильнее» нертə турнир спортивн бүрдəцсин хоорнд хəрлцə батрулхд болн спорт делгрүллһнд тусан күргҗəхиг Д.Чернышенко темдглв.
Терүнəс нань «Ойрат-Арена» төвд талвңд Хальмг Таңһчин болн «Газпромбанк» АО-н хоорнд Элстд спортивн комплекс тосхлһна төлə өгъялҗ авлһна туст бооцан батлгдв.
Шин комплексн төв тосхгдҗ, мана таңһчд спорт делгрүллһнд тəвцəн эрк биш орулхмн. Эннь нег онц төр болҗана. Эн төсв күцəлһнд 4,2 тербум арслң керглгдҗəнə. Эн мөңгн төсвин бəрмт цаас белдлһнд, шаңһас зөвшəл авлһнд болн тосхлтд һарһгдхмн, гиҗ таңһчин Толһач Хаска Бату цəəлһҗ келв.
Эн туст Хальмг Таңһчин спортын министр Константин Батыров фиджитал-спортын Цугəрəсəн Федерацин президент Дмитрий Григорьевла мана таңһчд региональн əңг секлһнə төлə бооца батлсн болдг. Тосхгдх фиджитал-төв шишлң кергслəр теткгдхмн.
Əрəсəн вице-премьер Д.Чернышенко Б.Б. Городовиковин нертə Хальмг ик сурһульд бас одв. Тенд эн номин лабораторьмуд, селəнə эдл-ахун малын һəəхүл хəлəҗ, номин-үүлдврин региональн төвин эд-тавр үнлв. Вузд 7,5 миңһн һар оютн, тедн дунд Китай, Куба, Иран, Сирия, Африкин болн СНГ-н орн-нутгудын элчнр сурна. 2023-ч җилəс авн Б.Б.Городовиковин нертə КалмГУ «Приоритет-2030» көтлврт орсмн. Талдан орн-нутгудас ирəд, хальмг вузд сурчадг оютнрт Дмитрий Николаевич онц оньган тусхав. Бенин, Уганда, Кот-д’Ивуар, Узбекистан болн нань чигн орн-нутгудын элчнрлə күүндҗ, эдн яһад Əрəсəд ик сурһульд сурхар шиидсəрнь соньмсв. Тер мет оютнр эврə күслəн вице-премьерт келв. Дəкəд болхла Дмитрий Чернышенко Əрəсəн сурһуль-эрдмин болн номин министерствд «Курчатовин күрəлң» НИЦ-д Б.Б.Городовиковин нертə Хальмг ик сурһулин ул деер үүлдҗəдг лабораторьт тохм ясруллһна болн генетикин шинҗллтин халхар хамцу көдлмш күцəх даалһвр өгв.
Зуульчллһн экономик делгрүллһнə нег онц əңгнь болдг. Əрəсəн регионмудт модульн отельмуд тосхлһнд нəəмн тербум арслң йилһгдхмн. Зуульчллһ делгрүллһнə төсвсиг Д.Чернышенко бас шинҗлҗ хəлəв.
Əрəсəн Президент В.Путин регионмудт зуульчллһна инфраструктур делгрүллһнд онц оньган тусхахиг даалһсн билə, гиҗ вице-премьер темдглв. Дмитрий Николаевич экономик делгрүллһнə Əрəсəн министерствд таңһчин зуульчллһна халхд цуг халхар дөңгəн күргхиг даалһв.
Таңһчд гиичллһнə йовудт Д.Чернышенко Бурхн Багшин Алтн Сүмд болн Казанск кафедральн чонҗд бас одв.
2022-ч җилд зəңгллһнə болн залһлдана халхар шунмһаһар көдлдг субъектст онц оньг өгдг болв. Эн туст Хальмг Таңһч тəвсн зураһан күцəв, гиҗ темдглх кергтə. Одахн орн-нутгин Президент «ГосТех» то-дигин кев-янзиг олзллһна туст шишлң зəрлг батлсн билə. Регионмуд болхла энүг 2024-ч җилин туула сарин 1-əс авн эклəд күцəх зөвтə. Харһлтын йовудт таңһчин то-дигин министр Алексей Этеев 2022-ч җилд электронн бəəдлд хүврүлгдсн тоот 100 процентд күрв гиҗ келв.
Федеральн Төвин дөңгəр эн туст цааранднь күцəмҗтəһəр көдлхвидн, гиҗ таңһчин Толһач Хаска Бату ашлв.

КАРСАНА Евгения

Видео