Эврә кергән бүрдәв

29-04-2023, 12:04 | Общество

Дурн бәәхлә ямр чигн керг күцәгднә гиҗ келгддг. Сүл цагт олн-әмтн социальн бооцана көтлврт орлцҗ, шаңһас дөң авч эврә кергән бүрдәдг болв.

Энүнә тускар 2022-ч җилин эклцәр ниигмин сүлҗәнд соңсҗ Көтчнр селәнд бәәдг Виктория Махалеева социальн бооца батлҗ хумс ясҗ кеерүлдг хора секв. Урднь эн энд-тенд көдләд, зуг көдлмшнь икәр таасгддго билә. Һурвн үртә Викторияг кесг бүрдәцст авхар седдмн биш, юңгад гихлә бичкн һурвн күүкнь даңгин царцад, гемнәд бәәхлә көдлмшән дутадг бәәсмн. Көтчнрә социальн харслһна цергллтд ирхлә, социальн бооца батлхин төлә тенд көдлдг мергҗлтнр тодрхаһар цәәлһҗ, ямаран бәрмт цаасн керглгдҗәхинь келҗ өгв, терүгинь ахр цагин болзгт цуглулад бооца батлснь тер, гиҗ баахн бер темдглв. Өдгә цагт күүкд улс ик-бичкн уга хумсан ширдәд, сәәхрүләд ясна. Эн учрас эврә селәндән иим хора секхәр Виктория шиидв. Шаңһас авсн мөңгәр эн селәнә төвд хора нәәмәдлҗ, Элст балһснд шишлң лавкд кергсл хулдҗ авв. В. Махалеева 2015-ч җилд хумсна эрдмчин сурһуль төгсәһәд, өөрхн улстан, үүрмүдтән маникюр кедг билә. Эндр болхла баһчуд чигн, медәтә улс чигн Виктория тал ирнә.
Эврә кергән бүрдәснәс авн нег җил давв, кергнь сән кевәр күцәгдҗәнә. Викториян келсәр, шаңһа бүрдәцд көдлхлә өдрин дуусн тенд бәәх кергтә, ода болхла цаган эврән дигләд, өрәл өдртән эс гиҗ ора күртл көдлхән эврән шииднә. Олн үртә экд эннь йир зокаста болн тааста болна. Өдр болһн хулдҗ авдг эдл-уушт мөңгн күрнә, хойр көдлмшч һар бәәхлә ямаран чигн керг күнд биш болҗ медгднә. Дурн бәәхлә көдлмш альд болв чигн олгдх. Күн болһн эврәннь заян-хөвин эзн болдг гиҗ келгддг. Иргчдән эн ик бәәрнд көдлхәр зуралҗана, цаг зуур давад медгдх. Онц темдглхәс, ода Виктория авальтаһан дөрвдгч үрән күләҗәнә. Күүнәс юм күләлго, эврән босад, өмәрән зүткҗ көдлх кергтә, гиҗ Виктория Махалеева келнә.
Эн туст таңһчин Толһач Хаска Бату социальн бооцана көтлврт нег һазра мана улс шунмһаһар орлцҗахиг даңгин темдглнә. Бату Сергеевичин келсәр, олн-әмтн социальн бооца олзлҗ бәәдл-җирһлән ясрулв. Тегәд олн улсин үлгүрәр баһ тетквртә өрк-бүлмүдин элчнр эн көтлврт орлцҗ, эврә кергән бүрдәҗ чадҗахнь сән йовдл гих кергтә.

КАРСАНА Евгения

Видео