Багшнрт – өөдəн ачлврмуд

29-04-2023, 10:00 | Общество


Давсн пүрвə өдрлə Əрəсəн гегəн-герлин министр Сергей Кравцов Элстүр көдлмшин халхар ирв. Хамгин түрүнд гегəн-герлин министр Хальмг Таңһчин Толһач Хаска Батула хамдан гвардин майор С.В.Санчировин нертə Яшкулин дунд сурһульд одҗ, тенд нидн күцəгдсн бат ясвринь үнлв. Хөөннь Элстин Н.Г. Сергиенкон нертə 3-ч тойгта сурһульд ирсмн. Сурһульчнр күндтə гиичнрт мана орн-нутгт нерəдсн бииһəн үзүлв, Əрəсəн тугмудыг эдн байрин йовудт делскəд, төрскнч хəлəцəн медүлв. Эклц классин бичкдүд бас байрин керг-үүлдврт орлцв.

Дарунь гиичнр нидн бат кевəр ясгдсн хуучн бəəриг болн шинəс тосхгдсн немр бəəшңгиг һəəхв. Сурһулин һардач Александр Ким цəəлһвр өгв. Бурхн багшин номд болн философьд нерəдсн кичəлд күндтə гиичнр орлцв. Кичəлин хөөн сурһульчнр Сергей Кравцовд көгҗмин белгəн нерəдҗ домбр цокад хальмг улсин айсмуд күңкнүлв.
Цааранднь Сергей Кравцов болн Хаска Бату багшнрла болн сурһульмудын һардачнрла харһв.
– Багшин эрдм хол үүлдвртə эрдм гиҗ шүлгч Роберт Рождественский тана күч-көлснə тускар келв, – гиҗ Сергей Сергеевич эврə йөрəлин үгəн эклв. – Яһад гихлə тадн иргчдəн таңһчдан тусан күргх бичкүдиг болн арвтнриг өскчəнəт. Тадниг цааснла залһдата көдлмшəс, олн зүсн тооца өглһнəс сулдххар бачм үүлдвр күцəҗəнəвидн. Цааранднь чигн тиим көдлмш кегдх. Багшин тоомсринь өөдлүлхин төлə бидн бас кесг тоот күцəх зөвтəвидн.
Таңһчин Толһач Бату Сергеевич багшнрт ик килмҗəн тусхаҗана, Хальмг Таңһчин, сурһуль-эрдмин салврин күчн цааранднь чигн өсəд-өргҗəд йовтха!» – гиһəд Сергей Сергеевич үгəн товчлв.
Таңһчин Толһач Хаска Бату эврə үгдəн бас багшнриг йөрəв. «Мана таңһчд багш хамгин күндтə, тоомсрта мергҗлт мөн. Багшнриг Əрəсəн Президент болн орн-нутгин залвр, гегəн-герлин министерств дөңнҗəнə. Давсн җилд мана таңһчд 17 сурһулин бəəшңд бат ясвр кегдв, тиим йовудта көдлмш күцəгдснь ик байрта-бахта йовдл мөн. Эн җил сурһулин 24 гер шинрүлгдх, тиим кемҗəтə ясврин үүлдвр урднь күцəгдəд уга билə. Тернь мана таңһчин сурһуль-эрдмин делгрлтд ик нилчəн күргҗəхнь лавта», – гиҗ Бату Сергеевич темдглв.
Цааранднь нүүрлгч багшнриг Əрəсəн гегəн-герлин министр Сергей Кравцов ачлв. Тер тоод Əрəсəн ачта багшин өөдəн нер зүүлһҗəх иткл цаасиг болн темдгиг Элстин олн салврта гимназин химийин багш Бадмин Антонинад министр бəрүлҗ өгв.
– Əрəсəн гегəн-герлин министерств сурһульмудын бат ясвр кехин төлə ик кемҗəтə үүлдвр күцəҗəнə. Тернь ик чинр зүүнə. Элстин олн салврта гимназь ода бас бат ясвр келһнə төсвд орла, энд би 35 җилдəн көдлҗəнəв. Эндр би бас гимназьд одад, тосхачнрла көдлмшин йовудын тускар күүндлəв. Һазак болн дотак олн зүсн көдлмшиг эдн бат ясврин кемҗəнд күцəҗəнə. Тиим кевəр гимназьд тооһин технологин таалыг ясрулх арһ өггдҗəнə, олн зүсн өдгə цагин кергслиг энд олзлҗ болҗана. Тиим сəн таал үүдəҗəхин, мини багшин үүлдвриг тиигҗ өөдəнəр үнлснə төлə гегəн-герлин министр Сергей Кравцовд, Хальмг Таңһчин Толһач Хаска Батуд, сурһуль-эрдмин болн номин министр Ангира Булганд ханлтан өргхəр седлəв, – гиҗ Антонина Борисовна келв.
«Əрəсəн сурһуль-эрдмин салврин күндтə көдлəч» гидг өөдəн нерн Элстин 17-ч дунд сурһулин талын келнə багш Бабан Марияд болн Элстин 3-ч тойгта дунд сурһулин эклц классин багш Эдлякин Элеонорад зүүлһснə туск иткл цаасиг Сергей Кравцов бəрүлҗ өгв. Тер мет бичкдүдиг болн баһчудыг сурһмҗллһна салврт Əрəсəн күндтə көдлəчин нерн Элстин 3-ч тойгта дунд сурһулин хальмг келнə болн утх-зокъялын багш Убышан Галинад зүүлһгдв. «Мана сурһулин багшнрин коллективиг, ачлвр авсн үүрмүдəн йөрəҗəнəв. Кесн кергтн уралан йовтха! Төрскн келндəн дуртав, хальмг келнə сəн медрлиг сурһульчнртан өгхəр шуннав», – гиҗ Галина Васильевна байрарн хувалцв.
– Федеральн кемҗəнд ода төрскн келнə багшнрин марһан бас болна. Хальмг келнə багшнр энд бас йилһрəд бəəх гиҗ бат ицгтə бəəнəв, тана нерн чигн теднə тоод орад бəəхнь лавта, – гиҗ Сергей Кравцов багшиг йөрəв.
Əрəсəн гегəн-герлин министерствин Күндллһнə һашгар 17-ч тойгта дунд сурһулин хальмг келнə болн утх-зокъялын багш Баджан Саглр, 3-ч тойгта дунд сурһулин физикин багш Ковязинə Наталья ачлгдв. «Эрдмдəн итклтə болсна төлə» гидг темдгəр 3-ч тойгта дунд сурһулин эклц классин багш Лиҗин Наталья ачлгдв.
Цааранднь Хаска Бату таңһчин ачлвриг багшнрт бəрүлҗ өгв. Тер тоод «Хальмг Таңһчин ачта багш» гидг өөдəн нерн зүүлһгдснə туск иткл цаасн болн темдг 3-ч тойгта дунд сурһулин талын келнə багш Очра Антонинад бəрүлҗ өггдв. Тер мет Хальмг Таңһчин Ханлтын һашгар 3-ч тойгта дунд сурһулин хальмг келнə болн утх-зокъялын багш Мөңкнасна Надежда болн хальмг келнə болн утх-зокъялын багш Һəрəн Нина ачлгдв. Бату Сергеевич эднд ик ханлтан өргҗ күцəмҗ дурдв.
Байрин хургт цуглрсн багшнрт сурһульчнр наадна тасрха, ду-бииһəн үзүлҗ, билгтə күүкд-көвүд энд өсчəхинь иткүлв. Ачлвр бəрүлҗ өгснə хөөн министр Сергей Кравцов болн таңһчин Толһач Хаска Бату сурһулин спортын талвңгиг хəлəв. Түүнə чинринь министр Сергей Кравцов өөдəнəр үнлв.
Хальмг Таңһчин залврин Ахлач Босхмҗин Гилəн, таңһчин залврин Ахлачин негдгч дарук Цернə Эрднь, таңһчин сурһуль-эрдмин болн номин министр Ангира Булган, Хальмг ик сурһулин һардач Салан Бадм болн йосна нань чигн элчнр эн керг-үүлдврт орлцв.

ТҮРВƏН Һуна

Видео