Артезианд болсн хург

20-04-2023, 10:30 | Общество


Давсн долан хонгт Артезиан селəнд 1-ч тойгта болн Босчан Зоян нертə сурһульмудын ул деер эн селəнə дегтрин саңгин седвəрəр хар гөрəр туугдсн кемəс авн 80 җил болҗах һашута йовдлд нерəдгдсн хург болв. Зоя Николаевна Босчаеван нертə сурһульд эн керг-үүлдвр давулгдв. Эн йовдлла ирлцүлҗ зургудын һəəхүл бас секгдв. Хальмг зурачнрин зургудла дегц сурһульчнрин зурсн зургуд бас энд үзүлгдв. Эн хургин дегтрин саңгин hардач Евдокия Есенова һардҗ давулв.

Хар гөрəр эврəннь һазр-уснасн 1943-ч җилин бар сарин 28-д туугдсн хальмг келн-улс 13 җилин туршарт кесг миңһəд күүһəн геев. Эн конференцин йовудт бидн тер улсин нер сергəҗ, дорас өсч йовх баһчудт зовлңта цагин тускар медүлҗ күргхəр седҗəнəвидн, гиҗ эн нүр үгдəн келв.
Тер цагт баh наста бəəсн бийнь, үзсəн чееҗдəн хадhлҗ йовдг дөрвн медəтиг эн хургт дуудв. Тернь Мария Басанговна Суманова, Анна Мучиряевна Сактуева, Антонина Хуцаевна Манджиева болн Софья Ацаевна Улюмджиева болв. Медəтə гиснь эдн дунд 95 наста Анна Мучиряевна болв. Элстəс Б.Б. Городовиковин нертə Хальмг ик сурһулин багш, филолог номин кандидат Николай Церенович Манджиев бас ирсн билə. Гиичнрəн күндлəд, ээҗнртəн номтд сурhульчнр цецгүд бəрүлҗ өгв.
Эврəннь илдклдəн Н. Манджиев Советин йосна һардвр яhад тиим сүркə шиидвр авсинь тодрхаһар келҗ өгв. Номт хальмг салдсмуд яhҗ зөрмг йовдл үзүлж, əмəн əрвллго дəəлдҗ йовсна тускар келв. Болв күчəр туулhна шиидвр тер бийнь батлгдад, хальмг улста наадк кесг келн-улс эврəннь төрскн hазр-уснасн күчəр нүүлһгдəд киитн Сиврин һазрт бəəршлсн болдг.
Эврəннь илдклмүдт 1-ч тойгта сурһулин сурһульч Оюна Гаджаева болн эн сурһулин багш В.А. Ностаева, З.Н. Босчаеван нертə сурһулин сурһульч Санл Джинкеев болн багш С.Б. Тюрбеева бас эн төрмүдəр ухан-тоолврарн хувалцв.
Сурһульчнр Анна Сектинова болн Анна Лавгаева хойр эн hашута йовдлд нерəдсн хальмг шүлгчнр Е. Буджаловин болн В. Нуровин шүлгүд айслулҗ умшв.
Хургин чилгчəр З.Н. Босчаеван нертə сурһулин һардач В. Гаряева Элстəс конференцд ирҗ орлцсн Н.Манджиевд Хар Һазра района сурhуль-эрдмин əңгин нерн деерəс Күндллһнə һашг бəрүлҗ өгв.

МАНҖИН Эрднь-həрə

Видео