Селəнд эмнлһнə гер секгдв

20-04-2023, 11:30 | Общество


Баһ Дөрвдə района Тундутово селəнд олна дамшлтын эмчин офис (ОВОП) байрин бəəдлд секгдв. Эн «Эрүл-менд харлһн» гидг келн-улсин төсвин түрүн медицинск дөң күрглһнə халхиг делгрүллһнə региональн көтлврин медлд тосхгдв. Сəлəнə əмтнə байр хувалцхар Хальмг Таңһчин Засгин Ахлачин дарук – таңһчин социальн делгрлтин, күч-көлснə болн көдлмшəр тетклһнə министр Өлзəтин Марина болн таңһчин эрүл-менд харлһна министрин дарук Нохан Мария ирəд, шин офис секлһнə керг-үүлдврт орлцв.

Урднь эмчин офис нойн Тундутовин цагт тосхгдсн хуучн герт бəəршлдг бəəсмн. «Эрүл-менд харлһн» гидг келн-улсин төсвин медлд энд нидн тосхлтын көдлмш эклсн билə. Шин офист эмчин, тəрлһ болн физио эмнлһ келһнə, гемтə улсин эрүл-менд шинҗлдг, кергсл болн нань чигн тоот эд-бод кедг шишлң хорас бəəнə. Бəəрн автономн кевəр дулаһар теткгдхмн, тегəд үвлднь энд дулан болхмн. Тер мет бəəрн дотр усн орулгдсн бəəнə, тегəд эмнлһ авхин төлə цуг таал тогтагдв.
Баһ Дөрвдə района эмнлһнə ах эмч Сулука Евгениян келсəр, ОВОП-д эмч Каарун Надежда, медицинск эгчнр Гайдука Нина болн Поляка Виктория көдлнə. Надежда Сергеевна Аһш балһснд медицинск ик сурһуль төгсəснə хөөн «Земск эмч» гидг көтлврт орлцад, района эмнлһнд күч-көлснə хаалһан эклсмн. Баахн эмч терапевт болҗ, района эмнлһнə поликлиникд көдлв. Хөөннь эн шишлң немр сурһуль сурад, мергҗлтəн өөдлүлв, тегəд ода олна дамшлтын эмч болҗ Тундутово селəнд көдлҗəнə. Баахн эмч күн болһнд килмҗəн тусхаҗ, көдлмшəн даавртаһар болн үнн кевəр күцəхəр шунна. Селəнə əмтнə болн эрүл-менд харлһна көдлəчнрин төлə иим сəəхн шин офис тосхҗ өдгə цага таал тогтаснь көдлмшəн улм сəəнəр күцəхд урмд өгв гиҗ Каарун Надежда байрта бəəнə.
- Ода селəнə əмтн района эмнлһнд одлго гертəн кергтə тəрлһ, физио-эмнлһ авч чадҗана. Өдрəр үүлддг стационарт бəəрн улс кергтə шинҗллт кеҗ, эмнлһ авч, эрүл-мендəн батрулҗ авхин төлə цуг таал тогтагдв. Энд УВЧ, сорнц (магнит) болн нань чигн шишлң кергсл углҗ тəвгдв. Эмч түрүн дөң күргҗ дарунь гемин уршгинь йилһҗ авхин төлə энд ЭКГ, цусна шикрин кемҗə илдкҗ авдг кергсл углҗ тəвгдв. Эн селəнд күсдундур миңһн күн бəəнə, теднə тоод 241 бичкн орна. Ик-бичкн уга эрүл-менд харлһнакөдлəчнрин оньгт бəəҗ, ахр цагин эргцд түрүн дөң авхнь ик байр үүдəнə. «Эрүлменд харлһн» гидг келн-улсин төсвин медлд мана района əмтнə төлə шин болн өдгə цага бүрдəцс тосхгдҗахинь цуһар өөдəнəр үнлҗəнə, – гиҗ Евгения Босхомджиевна темдглв.
Олна дамшлтын эмчин офис секлһнə байрт бəəрн улс орлцад, ирсн гиичнрт билг-эрдмəн үзүлҗ, эн өдр темдгтə болҗахиг медүлв. Бəəрн улсин нерн деерəс Любовь Некрасова ханлтан өргҗ, тосхлтын йовудыг эдн үзҗ, шин эмнлһн эдлврт орулгдхиг теңкəн уга күлəсн билə гив. «Мана эмнлһн ке-сəəхн, өдгə цага некврлə ирлцнə, түрүн дөң күргхин төлə кергсл бəəнə, дотрнь дулан, цевр, һазаһаснь чигн эн үзмҗтə. Энүг бəəрн улсин тускар ухалҗ, маднд сəн таал тогтах болн бидн гертəн сəн чинртə эмнлһ дарунь авч чадхин тускар санад тосхв. Бидн маш байрта бəəнəвидн», – гиҗ нег һазра улс байрта бəəнə.
Келхд, Тундутово селəнд цөөкн җил хооран сойлын Герт капитальн ясвр кегдсн билə. Давсн җилд дунд сурһульд бат ясвр кегдв, шин парк тосхгдв, ода болхла олна дамшлтын эмчин офис эдлврт орулгдв. Тегəд селəнə əмтнə җирһлин таал җил ирвəс ясрад йовхнь эднд ик байр-бахмҗта болна.

ДООҖАН Наталья
ЗУРГТ: Тундутово селəнд секгдсн шин төв

Видео