Көдлмш олҗ авхд дөң болхар

20-04-2023, 12:00 | Общество


Мөрн сарин 14-д мана орн-нутгт «Əрəсəн көдлмш. Арһин цаг» гидг көдлмшч ормин яарм бүрдəгдв. Эн өдр цуг регионмудар, тер тоод мана таңһчд эн керг-үүлдврин түрүн девсң болв. Яармд көдлмш хəəҗəх улст тааста эрдмəрн көдлмш олҗ авхд дөң күргсн деерəн, оютнрт болн ах классмудын сурһульчнрт иргчдəн ямаран халхар үүлдхин туст цəəлһвр өггдв. Таңһчин тəвн шаху бүрдəц, селəнə эдл-аху болн онц эзнə ниицəн эн керг-үүлдврт орлцҗ, ут тоодан 300 көдлмшч орм бəəхин тускар медүлв.

Хальмг Таңһчин залврин Ахлачин дарук – таңһчин социальн делгрлтин, күч-көлснə болн көдлмшəр тетклһнə министр Өлзəтин Марина яармд орлцачнриг йөрəһəд, эн керг-үүлдвр көдлмш хəəҗəх улст болн көдлəчнр керглгдҗəх бүрдəцст туста болхиг темдглв. Тиигəд, көдлмш хəəҗəх улс сул көдлмшч ормсин тускар медəд, бүрдəцсин элчнрлə күүндəд, тааста орм бийдəн шүүҗ авсн деерəн, немр сурһуль сурлһна, мергҗлтəн өөдлүллһнə, эврə керг бүрдəлһнə туст сүв-селвг авч чадҗана гиҗ Марина Петровна келв. Көдлмшч ормин яарм хойр девсңгəр бүрдəгдв. Таңһчд бүрдəгдсн түрүн девсңгин керг-үүлдвр давсна хөөн мөчн сард федеральн девсң болхмн, терүнə төлə «Əрəсəн көдлмш» гидг порталын онц халх тогтагдхмн, терүнд мана орн-нутгин цуг регионмудт бəəдг көдлмшч ормсин туск зəңг барлгдхмн.
Яармд орлцачнрт таңһчин сурһуль-эрдмин болн номин министрин дарук Мацга Өлзəт, таңһчин экономикин болн хулд-гүүлгəнə министрин дарук Максима Леонид, КалмГУ-н профессор Мантан Эльза, «Одн» заводын генеральн директор Даргана Байрта йөрəлин үг келҗ, тааста эрдмəрн көдлмш олҗ авч, төрскн һазр-уснаннь делгрлтд тəвцəн орулхиг дурдв. П.Чонкушовин нертə билг-эрдмин колледжин оютнр билг-эрдмəн үзүлҗ, керг-үүлдврт орлцачнрт сəəхн агчм белглв. Келхд, таңһчин дунд шишлң сурһуль-эрдмин бүрдəцс эн керг-үүлдврт шунмһаһар орлцад, ямаран эрдм эдн дасдгин, баһчуд сул цаган тустаһар давулҗ үүл бəрдгин тускар медүлв. Дунд сурһулин ах классмудт сурчах күүкд-көвүд эднə үүлдврəр соньмсҗ, замчин, медицинск көдлəчин, уячин эрдмəр соньмсв. Үлгүрнь, Элст балһсна 17-ч тойгта дунд сурһулин 9-ч «б» классин сурһульчнр Җалкан Софьян болн Локшан Валериян келсəр, эднд эн керг-үүлдвр таасгдв. Эднд медицинск болн билг-эрдмин колледжд сурһдг эрдм соньн болҗ медгдв. Нег үлү билг-эрдмин колледжин оютнр билгəн үзүлснь эднд ик бахмҗ үүдəв.
Яармд орлцсн бүрдəцс болн селəнə эдл-ахус дунд «Одн» завод» болн «Улан хөөч» гидг тохма мал өскдг завод» гидг акционерн ниицəс, «Агроресурс» болн «Начин» гидг ООО, «Калмлес» болн «Балһсна урһмлын эдл-аху» гидг бүрдəцс билə. Үлгүрнь, Яшкулин районд үүлддг «Улан хөөч» гидг эдл-аху эн яармд орлцачнрт механизаторин болн җолачин көдлмш бəəхин тускар медүлхəр ирв. Эдл-ахун ах тооч Набаса Гилəнəн келсəр, эдн тал көдлхəр ирсн улст гер йилһҗ өггдхмн, җалвнь баһ гиснь 21 миңһн арслң болхмн, дəкəд немр мөрə өггднə. Механизатор даавран давулҗ күцəсндəн өвсəр теткгднə, ус зөөдг җолачнрт болхла ниднəкə хурһд өгнə. Ода төл авлһна кем давҗана, тегəд Башантинск колледжин 80 оютн малын хошмудт дамшлт хоршаҗана, көдлмш уга 86 күн цаг зуур көдлмшəр теткгдв. Тер мет хөд кирһлһнə кем болхла эдн бəəрн улсиг цаг зуур көдлмшəр бас теткнə.
«Калмлес» бүрдəцд ода деерəн тавн көдлмшч орм бəəнə. Хаврас авн намр күртл цаг зуур күцəх көдлмшт авсн улс модд суулһна, тедниг хəлəҗ асрна. Урднь бүрдəцин элчнр бас иим керг-үүлдврмүдт орлцдг билə. Көдлмш хəəҗəх улст эдн ямаран үүлдвр күцəдгин, җалвнь ямаран болдгин тускар келҗ өгв. «Одн» заводын һардач Даргана Байртан келсəр, эднд күүкд улсин төлə көдлмш бəəнə. Завод мана таңһчд ор һанцхн промышленн бүрдəц болна, эдн харслтын министерствин даалһвр күцəнə. Көдлəчнр му биш җалв авна, нань чигн социальн харслтын керг-үүлдврмүд бəəнə гиҗ Байрта Сериковна хувалцв.
Яармин йовудт əмтиг көдлмшəр тетклһнə чинртə төрмүдəр «төгрг ширəн» сүүр болв, олн зүсн талвң үүлдв. Тиигəд, «Маркет профессий. Карьера и выпускник», «Территория кадровых решений», «Легоконструирование» болн нань чигн талвңгудт эврə керг бүтəлһнə, эрдмин халхар күцəмҗтəһəр үүлдхин, тааста көдлмш олҗ авхин болн нань чигн төрмүдəр өргн күүндвр болв, мергҗлтнр болн психологуд сурһулин хөөн дарунь көдлмш олҗ авхин туст сүв-севлг өгв.

ДООҖАН Наталья
ЗУРГТ: көдлмшч ормин яарм болҗах кем


Видео