Академик Эрдниевин алдр кергнь

20-04-2023, 12:30 | Общество


Элстин 23-ч тойгта сурһулин бәәшңгин өөр академик Пүрвә Эрдниевин бумб байрин бәәдлд секгдв.

– Мана 23-ч тойгта сурһульд академик Пүрвә Мучкаевич Эрдниев кесг дәкҗ ирлә, энд УДЕ-н технологийд нерәдсн нарт-делкән болн Цугәрәсән кесг конференц бүрдәҗ номтнрла болн багшнрла дамшлтарн хувалцҗала, мана сурһулин багшнриг эн көдлмшт орлцулҗала, УДЕ олзллһна туск кичәлмүдт ирҗ заавран, селвгән өгчәлә, – гиҗ сурһулин һардач Полина Сангаджиева байрин керг-үүлдвриг нүр үгәр секв.
Мөрн сарин 16-д академик Эрдниевин бумбиг байрин бәәдлд секв. Эн керг-үүлдврт сурһулин багшнр болн сурһульчнр, Элст балһсна болн таңһчин сурһуль-эрдмин министерствин һардврин, хотл балһсна депутатнрин Хургин элчнр цуглрв.
Академик Эрдниевин бумбиг нертә хальмг скульптор Никита Амолданович Санджиев үүдәсмн, күрл мөңгнәс терүг скульптор Сергей Коробейников цутхсмн.
– Эн байрин керг-үүлдврт талдан райодас багшнр ирв, тегәд өдр хурта, салькта бәәсн болв чигн бумб секлһнә хооран саагдсн уга. Тиигчкәд өрк-бүлләнь селвлцәд туслң эн өдр академик Эрдниевд болн түүнә алдр кергт нерәдсн шин үүдәврлә олн улсиг таньлдулхар седләвидн, яһад гихлә мөрн сарин 16- д Пүрвә Мучкаевич сәәһән хәәсмн, - гиҗ Дмитрий Довгополов темдглв.
Академик Эрдниевин туск тодлврарн көвүнь, профессор Баатр Эрдниев, хувалцв. Сиврин тууврин күнд цагт чигн Пүрвә Мучкаевич Барнаул балһсна багшин күрәлңгиг йилһән сәәнәр төгсәлә, тер цагт баһ наста багш УДЕ-н технологин ул-сүүринь экләд үүдәҗәсмн. Тер цагт Барнаулын күрәлњд эвакуацд Ленинградын номтнр көдлҗәсмн, баһ наста багшт эдн кесг селвгән, эсвин халхар гүн медрл өгчәсмн.
Тууврин цагла Барнаулд Әрәсән гегән-герлин министрин дарук, номт Алексей Маркушевич ирсмн, тенд геометрйәр селәнә сурһулин багш Эрдниев бичсн шинҗллтлә таньлдад, Пүрвә Мучкаевичд аспирантурт орх цаасан өгв. Тиигҗ күнд-күчр цагла чигн академик Эрдниев медрлән гүүдүлҗ УДЕ-н технологиг үүдәлһнә кергән экләд, терүг төгсіәҗ күцәсмн. Тиигҗ ик күслдән күрч, нерән туурулсмн.
Түүнә бәәдл-җирһл баһчудт сән үлгүр болҗана. Ода 23-ч тойгта сурһулин багшнр УДЕ-н технологиг эсвин, географин, химийин, орс келнә болн нань чигн кичәлмүдт өргнәр олзлҗ сурһульчнртан бат медрл өгчәнә, тегәд чигн тедн дунд Әрәсән олимпиадмудын дииләчнр болн призермуд йовна.
Түүнә үүдәсн технологиг кесг кичәлин төлә олзлҗ болхмн, гүн медрл өгсн деерән, кесг төриг хамцулҗ эсв болн нань чигн кичәл даслһна цагиг әрвлх арһ өгчәнә.

ТҮРВӘН Һуна

Видео