Диилвр бәрсн багшнриг ачлв

04-05-2023, 09:00 | Общество


Давсн басњ өдрлә Элстд, таңһчин залврин герт болсн байрин хургт Әрәсән гегән-герлин министр Сергей Кравцов дииләчнриг ачлв гиҗ бидн бичләвидн. Хойрдгч ормд һарсн призермудт таңһчин Толһач Хаска Бату дипломсинь бәрүлҗ өгв. Тер тоод багшнр дунд Целинн района Троицкое селәнә Г.К. Жуковин нертә дунд сурһулин эсвин багш Любовь Шаманова йилһрв.

Түүнлә хамдан нег сурһульд көдлдг Байрта Оконова педагог-психологудын тоод ончрв. Тиим ончта күцәмҗ бәрсн Жуковин нертә сурһулин коллективиг бидн өөдән ашт күрснләнь йөрәҗәнәвидн. Эн сурһулин талдан багшнр марһана йовудт, түүнә өмн чигн үүрмүдән дөңнәд, теднд сүв-селвгән өгәд диилвр бәрхд ик нилчән күргснь лавта. Йирдән эн марһан сурһульмудын коллективсиг хамцуллһнд, дамшлтарн хувалцлһнд ик нилчән күргнә.
«Багшин дебют» гидг номинацд Элистин техникин лицейин физикин багш Ольга Бадмаева, сурһмҗлачнр дунд Октябрьск района Ик Царң селәнә «Айс» бичкдүдин садын сурһмҗлач Эльза Бамбарыкова йилһрв. «Мастер года-2023» гидг таңһчин марһанд Харти Кануковин нертә Элстин багшин колледжин шишлң кичәлин багш Генриетта Колосова ончрв. Эдниг Бату Сергеевич цуг седкләсн йөрәҗ күцәмҗ дурдв. 2023 җилин марһанд орлцачнр цугтан дииләчнр болҗана, яһад гихлә эдн багшин болн сурһмҗлгчин җиллә мергҗлтән үзүлҗәнә гиҗ таңһчин Толһач темдглв.
Һурвдгч орм эзлсн мергҗлтнриг таңһчин залврин Ахлач Гиляна Босхомджиева йөрәв. Тер тоод Цаһан Амна 2-ч тойгта сурһулин эклц классин багш Людмила Герасименко хамгин һоллгч әңгд, Элстин 2-ч тойгта сурһулин хальмг келнә багш Валентина Семенова «Педагогин дебют» номинацд күцәмҗ бәрв.
Тер мет Элстин 28-ч тойгта «Сар Герл» ДОО-н сурһмҗлач Марина Синяк болн Яшкулин С. В. Санчировин нертә сурһулин педагог-психологч Валентина Бейноева һурвдгч аш үзүлв. И.Н. Эльвартыновин нертә Элстин политехникин колледжин шишлң кичәлин багш Олег Абушинов «2023-ч җилин эрдмч» гидг марһанд йилһрв.

ҖААХАН Бадм
Зургт: Әрәсән гегән-герлин министр Сергей Кравцов марһанд дииләчнрлә

Видео