Теегин әрүн зөөрән хадһлый!

04-05-2023, 10:00 | Общество


Мөрн сарин 30-д арвдгч Бамб цецгин наадм төгсхдән өөрдәд ирв. Элст балһсна Диилврин талвңд энүнд нерәдсн байрин концерт болв.

Сара хонгт давсн наадм «Җаңһр» хальмг алдр баатрльг дуулврт нерәдгдсмн. Мөрн сарин йовудт таңһчин район болһнд хаврин сәәхн байрт нерәдсн керг-үүлдврмүд бүрдәгдв. Тенд района муниципальн бүрдәц болһн соньн, өвәрц көтлврәрн гиичнриг болн зуульчнриг байрлулв.
Тодлхас, Хар Һазра районд ирсн гиичнр «Адг – Бумбин орн» нертә зуульчллһна маршрутар йовҗ, оошк өңгтә нур, алтн элс болн шачах булгин ус үзв.
Тер мет Лаганя районд болхла Бамб цецгин наадмин йовудт көглҗрһн шовудын түрүн наадм давсмн. Керг-үүлдврт орн-нутгин кесг региона элчнр орлцв. Бүрдәгдсн һәәхүлд ик-бичкн уга орлцҗ, кесг өңгтә көглҗрһн шовуг үзсн болдг.
Хальмг Таңһчин хамгин ар үзгин Октябрьск района Ик Царң поселкд мөрн сарин 22-т Бамб цецгин наадм бас давсмн. Эн района СМО-син, бүрдәцсин элчнрт «РисФест» нертә түрүн гастрономическ марһанд орлцдг саам учрв. Күч-көлснә коллективс тутрһин зүүтә һучн шаху шимтә, сенр хот белдв. Ончрсн орлцачнр мөңгнә мөрәсәр темдглгдсн билә. Терүнәс нань таңһчин талдан райодт бас олн соньн керг-үүлдвр бүрдәгдҗ, олн-әмтиг байрлулв.
Элст балһснд болхла мөрн сарин амрлһна өдрмүд болһн бүрдәгдсн талвңгудт бас соньн керг-үүлдврмүд болв. Бәәрн улсин болн зуульчнрин дунд «Махан Фест» нертә наадм тааслт олв. Энүнә йовудт гиичнр хальмг махнас кеҗ һарһсн олн зүсн хот амсв. Элстин хөрн ресторана элчнр «Марко Поло» эко-паркин һазрт таңһчин гиичнриг шимтә хотар тоов. Тер мет Элст балһсна төвд бүрдәгдсн талвңгудт «Шүлгләнә өдрмүд» марһанд шүлгүд айслулҗ умшв, көгҗмч Виктор Цойин дуд дуулҗ, хаврин йиртмҗин зургуд зурҗ, олн мастер-класст орлцдг гиичнрт болн бәәрн улст саам учрсн билә. Диилврин талвңгин тәәз деер таңһчин нертә олн коллективс байрин концертмүдән өгв.
Нарн өдрлә Элстд өрүн эртәс авн кесг талвң цааранднь көдлв. Өдрин туршарт болхла «Эволюция» нертә бииһин багин концерт болв, «Өөрднр» шаңһа бииһин театр, таңһчин Келн-улсин оркестр билг-эрдмәрн олыг бас байрлулв. Тер мет Элстин төвд «KAI MODELS» агентствд болн «Теегин сәәхләс» нертә төсвд орлцачнр балһсна лавкст хулдҗадг өдгә цагин хувц үзүлв.
Онц темдглхд, Сарпулин крайин Благодарный балһснас ирсн артистнр таңһчин улст бас билг-эрдмән үзүлв. Тодлхд, 1943-ч җилд эннь селән бәәсмн, энүг 110-ч мөртә хальмг онц дивизин цергчнр немшин хортнас сулдхсн билә. Тегәд маднла хам-хоша бәәдг сарпулихн ирҗ, Бамб цецгин наадмин сүл өдрин керг-үүлдврмүдт орлцв.
Асхн зурһан часла Диилврин талвңгин тәәз деер Бамб цецгин наадмиг төгсәҗәх концерт болв. Хур асхрад орв чигн әмтн норад керг-үүлдвриг чилтл зогсад хәләв.
Концерт догшн лууһин болн Нарн бичкн көвүнә туск домгар эклв. Нарн нертә бичкн баатр лууһин бәрәнд бәәсн торһа шовуг сулдхв. Түүнә хөөн хальмг тег серҗ, йоста хавр ирв. Хаврт цуһар байрлад, еңсг дууһан дуулҗ, бииһән биилҗ нәәрән давулв. Байрин концертд таңһчин бииһин коллективс, Хальмг Таңһчин ачта артистнр Кутлан Мукубенов, Гилән Бембеева, Диана Босхомджиева орлцв. Темдглхд, Эрднь Канкаев болн Руслан Дуляев үүдәсн Бамб цецгин наадмин частриг К.Мукубенов болн Д.Босхомджиева хойр түрүн болҗ хәләһәчнрт соңсулв.
Иим кевәр 2023-ч җилин Бамб цецгин наадм Хальмг Таңһчин Толһач Хаска Батун зәрлгәс иштә сара хонгт давсмн. Наадмд орлцхар Москва, Санкт-Петербург, Краснодар, Анапа, Архангельск, Владивосток балһсдас, Якутия, Дагестан,Тыва республикүдәс болн талдан регионмудас олн зуульчнр ирсн билә. Җил ирвәс мана таңһчин сойлар, авъяс-заңшалар олнәмтн соньмсҗ, нааран ирхәр зүткнә. Ирх җилд болх Бамб цецгин наадмд олн гиичнрән дәкнәс тосхвидн.

КАРСАНА Евгения

Видео