Сергей Кравцов: «Багшин эрдмәс күндтәнь һазр деер уга»

04-05-2023, 11:00 | Общество


Әрәсән гегән - герлин министр Сергей Кравцов хойр өдртән Хальмг Таңһчд бәәв. Түрүн өдрин йовудын тускар бидн тодрхаһар бичләвидн. Хойрдгч өдрин эргцд күндтә гиичд Бурхн Багшин Алтн сүм болн Элстин орс чонҗ үзүлв.

Дәкәд министр Орс келн-улсин гимназьд одв, энд Сергей Кравцовиг, Хальмг Таңһчин Толһач Бату Хасиковиг сурһулин һардвр байрта-бахтаһар тосв. Күндтә гиичнр школын хашад модд суулһв. Дарунь эдн Орс келн-улсин гимназин немр һурвн давхр гер тосхлһна йовудыг хәләв.
Эн тосхлт давсн җилин бар сарла экллә, болв эн җилин һаха сарин эклцәр Медрлин өдрин өмн өргнд шин объект дуусгдх зөвтә. Энүг эдлврт орулхла, 250 орм сурһульд немгдх. «Тосхлтын йовудыг түргдулљҗ дөңнлһнә керг-үүлдвриг икдүләд бәәхвидн, федеральн йосн эн төсв күцәлһнд ик оньган өгчәнә, түүнд бидн ханлтан өргҗәнәвидн», – гиҗ таңһчин Толһач Бату Хасиков заав. Эн төсв Элстд болн райодт яһҗ күцәгдҗәхин туст Бату Сергеевич тасрхан уга бүртклһ кенә, эврән объектст ирҗ көдлмшин йовудыг хәләнә. Түүнә ашт 17 сурһуль давсн җилд шинрүлгдлә, эн җил бас 24 сурһульд бат ясвр күцәгдх.
Гимназьд бәәснә хөөн Сергей Кравцов болн Бату Хасиков «Хальмг Таңһчин 2023-ч җилин багш» болн региона СПО- н багшнрт нерәдсн «2023-ч җилин эрдмч» гидг марһасин аш дигллһнд орлцв.
Таңһчин залврин герт цуглрсн багшнрт, сурһмҗлачнрт нерәдсн ахр үгән РФ-н гегән-герлин министр Сергей Кравцов келв. «Би түрүн болҗ региона җилин багшин марһанд орлцҗанав. Ода Элстд ашнь диглгдҗәнә. Удл уга бидн дииләчнрлә багшин долан хонгин керг-үүлдврт Москвад хулһн сард харһхвидн. Тана таңһчин марһана дииләч Әрәсән багшнрин марһана дииләч чигн болад бәәхмн. Болв эрк биш Хальмг Таңһчан тенд нертәһәр элчлх гиҗ бат ицгтә бәәнәв.
Би таңһчин цуг багшнрт ханлтан өргҗәнәв, эн җил багшин болн сурһмҗлгчин җил гиҗ зарлгдснла йөрәҗәнәв. Бидн Элстин 3-ч тойгта сәәхн сурһульд одад ирвидн, багшнрла күүндвидн. Тана таңһчд сурһульэрдм делгрлт авад бәәнә, Бату Сергеевич эврән эн салврт ик оньган өгнә, тер тоод сурһульмудын шин бәәшңгүд тосхлһнд, теднә бат ясвр келһнд оньган өгнә.
Өцклдүр Яшкуль селәнә сурһульд одлавидн, бас йир сәәнәр шинрүлгдсн болҗана. Таңһчин Толһач багшнрин болн сурһмҗлачнрин җалвинь, җилин багш марһана нүүрләчнрин мөрәһинь өөдлүллһнә сән керг күцәҗәнә, болв ода чигн хаһлх олн төр бәәнә, тернь медгджәнә. Тиим болв чигн бидн багшин тоомсриг өөдлүлхин, тадниг дөңнхин төлә цугинь кехвидн. Хальмг Таңһчд багш күүг кезә чигн сурһульчнрнь болн теднә эк-эцкнрнь күндлҗәсмн, тернь йир сән.
Би ода тана таңһчин марһана темдг хәләҗәнәв, тернь багшин эрдмин һолучр утхиг медүлҗәнә, багшин болн сурһмҗлгчин неринь цааранднь кезә чигн туурулад бәәх зөвтәвидн гиҗ нанд сангдна. Тегәд чигн күндтә багшнр, таднд бас нег дәкҗ ханлтан өргҗәнәв, цугнь тана үлмәд бәәнә, Хальмг Таңһчин иргчин, мана орн-нутгин иргчин төрмүдиг тана хаһлҗ чадхит», – гиҗ министр үгән төгсәв.
Дарунь Сергей Сергеевич 2023-ч җилин марһана дииләчнрт дипломсинь болн цецгүд бәрүлҗ өгв. Тер тоод йилһән сән багшин нериг Элстин классическ гимназин физикин багш Аркадий Болдунов зүүв. Тер мет «педагогин дебют» әңгд түрүн орм Городовиковск балһсна 3-ч тойгта сурһулин орс келнә болн утх-зокъялын багш Анастасия Луханина эзлв. Цааранднь министр Троицкое селәнә «Золотой ключик» садын сурһмҗлач Ноһала Манджиевад ачлвринь бәрүлҗ өгв. Тер мет таңһчин психолог-багшин, эмнлһнә болн социальн дөң күргдг цутхлңгин педагог-психолог Амелия Манцаева дипломар ачлгдв. СПО-н багшнр дунд болсн «Җилин эрдмч» марһанд ончта диилвриг Хальмг хулдг-гүүлгәнә-технологин колледжин зәңгллһнә кичәлин багш Евгения Джапова бәрв. Эдниг цугтаһинь министр йөрәҗ күцәмҗ дурдв.
– Мини бүл-багшнрин өрк-бүл, мин эк, авальм, эгчм-цугтан багшнр мөн. Эцкм-тосхач, сурһульмудын бәәшңгүд тосхҗана. Эдн цугтан мини түшг. Мини сурһмҗлгчнриг, Элстин классическ гимназин коллективд, энүнә һардач Октябрина Эдуардовнад ханлтан өргхәр седләв. Диилвр бәрсндән ик гидгәр байрлҗанав», - гиҗ Аркадий Болдунов ханлтын үгән келв.
Дарунь тәәз деер таңһчин Толһач Хаска Бату һарч багшнриг йөрәв. «Тана ирлһн, Сергей Сергеевич, эн керг-үүлдврт бүлән, сәәхн седклин бәәдл үүдәҗәнә. Тер мет орн-нутгин һардврт ханлтан өргхәр седләв. Әрәсән Президент болн орн-нутгин залвр мана таңһчин сурһуль-эрдмин болн нань чигн салвриг дөңнхин төлә ик тәвцән теднә шинрүллһнд орулҗана. Цугнь сурһульмудт оңдарҗана, тернь ик чинр зүүнә.

Тиим кевар сурһулин бәәшңгүд йир сәәхн болх зовтә. Җил болһн бидн тиим төриг хаһлнавидн. Давсн җилд 17 гер шинрүлгдлә, эн җилд бас 24 бәәшңд бат ясвр кегдх, дарук җилд болхла 50 сурһуль шинрүлгдх. Цааранднь чигн эн көдлмш йовудтаһар күцәгдх.
Багшин марһан онц җилин кемд бүрдәгдҗәнә, тегәд цуг орлцачнр бас дииләчнр болҗана. Тадн энүнә йовудт дамшлт хоршаввт, үүдәлтин эв-арһан батрулвт. Тадн таңһчин иргч тосхҗанат. Цуг багшнр эврәннь кергт дурта. Седклин залмҗар багшин эрдм шүүҗ авна, цуг җирһлин туршарт тадн олна тоомр эзлҗ үүлдҗәнәт. Болв эврә медрлән мел гүүдүләд бәәх кергтә. Нег үлү багшин төлә тиим зокал ик чинр зүүнә. Тегәд чигн бидн тиим марһа бүрдәнәвидн, таалынь ясрулнавидн, мөрәһинь өөдлүлнәвидн. Мини эк һазадын келнә багш, би эврән багшин эрдмтәв, тегәд цугнь маднд өөрхн, цугинь бидн меднәвидн, күчр-күнд төриг хаһлад бәәхвидн», – гиҗ Бату Сергеевич келв.
Дәкәд таңһчин Толһач багшнрин марһанд хойрдгч орм эзлсн лауреатнрт дипломинь бәрүлҗ өгв.
Цааранднь Сергей Кравцов таңһчин СМИ-н элчнрлә харһв. «Багшин эрдм һазр деер һоллгч эрдм болҗана.Удл уга сурһулин җил төгсх, тегәд хөн сарин 22-23-д сүл хонх җиңнүлх, тер мет мөчн сарин 23-24-т сурһулян төгсалһнә асхна керг-үүлдвр кех селвг өгләвидн.
Тер мет ода түгдг гем уурулгдсна хөөн цуг эн керг-үүлдвр йирин таалд болхмн. Тегәд ОГЭ болн ЕГЭ шүүвртән дигтә-даратаһар белдтн, тиигхлә цугнь күцгдәд бәәх, үүмән угаһар цугнь давх», – гиҗ Сергей Сергеевич төгсәһәчнрт дурдв.
- Мана таңһчин сурһуль -эрдмин болн талдан чигн салврин таал ясрад, оңдарад йовна. Тер кергт та, Сергей Сергеевич, ик тәвцән орулҗанат, мана орн-нутгин һардврт килмҗ тусхаҗах төлә ханлтан өргхәр седләв. Тиим ик кемҗәтә дөң мана таңһчд урднь күргәд уга билә, - гиҗ брифингин йовудт Бату Сергеевич онц темдглв.
Түүнә хөөн РФ-н гегән-герлин министр Сергей Кравцов болн таңһчин Толһач Хаска Бату Хальмг ик сурһульд көдлмшч гиичллһнд одв.
– Эндр орн-нутгт физикәр болн эсвәр сурһульчнрт медрлинь батруллһнд болн гүүдүллһнд һол оньг өггдҗәнә. Эн туст физикин, эсвин болн зәңгллһнә технологийсин дацң болн бүклдән ик сурһулин коллектив баһ биш үүлдвр күцәҗәнә. Эдн садас авн бичкдүдт болн сурһульчнрт йиртмҗин туск номар медрл өгнә, түүнә төлә бичкдүдин ик сурһуль секгдлә. Тер мет сурһульчнрин төлә тиим белдврин көдлмш күцәгджәнә, эдниг ик сурһулин багшнр олимпиадын даалһвр күцәлһнд дасхна. Тер көдлмшиг эдн 7-8-ч классмудас авн эклҗәнә, багшнрт ЕГЭ-н туск цәәлһвр өглһнә үүлдвр өргәр күцәгдҗәнә, – гиҗ Хальмг ик сурһулин һардач Бадм Салаев келҗ өгв.
«Приоритет – 2030» төсв күцәлһнд, регионла селәнә эдл-ахун болн экономикиг делгрүллһнә нань чигн халхар нөкцлтлһнә, баһчудын лабораторьмуд өргҗүллһнә тускар проректор Кермн Бадмаева келҗ өгв. Лабораторьмудын кергт 2022-ч җилин эргцд Хальмг ик сурһульд 100 сай арслң йовулгдв.
– Би англь болн немш келнә әңгд сурнав, болв Хальмг ик сурһульд орс кел даслһнд бас ик оньган өгнәв, нег үлү Хальмг Таңһчд бәәлһн түүнә төлә сән таал тогтана, тегәд ик сурһулян төгсәснә хөөн би хәрү Китд орн-нутгт ирәд тенд орс кел дасхҗ чадҗанав,- гиҗ Китдин Шинҗәнәс ирсн оютн келҗ өгв.
Тер мет Ташкентәс ирсн оютн ода эклц классин багшин эрдм дасчана, иргчдән бичкдүдиг дасххар седҗәнә. Хальмг ик сурһульд эн салврар номин шинҗллт кех арһ бәәнә, тер үүлдвриг күцәхдән күүкн бас белн бәәнә. «Медрлән гүүдүлхлә, эрдмән улм сәәнәр медхв», – гиҗ күүкн келв. Тер тоолвриг Сергей Кравцов бас дөңнв.
Хальмг ик сурһулин аспирант, нарт-делкән әңгин һардач Ансельм Хундайи Африкәс мана таңһчд ирәд энд экономик дасла, дәкәд хальмг күүкнлә ханьцад өрк-бүлән өндәлһлә. Африкин болн делкән талдан орн-нутгудт бәәдг оютнрин негдлтин үүлдврт шунмһаһар орлцҗана. Ансельмин намтр Сергей Сергеевичиг икәр соньмсулв, талдан орн-нутгудла нөкцлт делгрүллһнд тана үүлдвртн өргҗәд йовтха гиљ эн дурдв.
СПО-н дацңгин оютнр бас соньн һәәхүлән үзүлв. Эднәс кесгнь волонтерин отрядт орад, цергә керг-үүлдвр болҗах ДНР-т, ЛНР-т одад тенд бәәх әмтиг нүүлһлһнд, тедниг хот-хоолар тетклһнд дөң болна, тер үүлдвр күндтә гиичиг бас соньмсулв. Одахн «Профессионалмуд» гидг Цугәрәсән марһана региона девсңд эдн күцәмҗтәһәр орлцв. Санкт-Петербургд болх ашлгч керг-үүлдврт чигн сән ашт күртн гиҗ Сергей Сергеевич эднд дурдв.
Оютнрин багшин отрядын тускар Сергей Кравцовд болн Хаска Батуд бас тодрхаһар келҗ өгв, Хальмг ик сурһулин оютнр Хар теңгсин көвән «Артек», «Орленок» болн нань чигн лагерьмүдт, тер тод Хальмг Таңһчд, Крым Республикд болн Краснодарск крайд көдлнә, ик дамшлт хоршана, терүнлә үүрмүдләрн хувалцна, тегәд багшан отрядын җисән өсәд-өргҗәд йовна.
Дәкәд РФ-н гегән-герлин министр Сергей Кравцов болн таңһчин Толһач Хаска Бату багшнрла болн оютнрла ик залд харһад, теднә сурврмудт хәрү өгв. ЛНР- әс ода сурчах оютн бийиннь тускар келҗ өгв. Эн англь болн немш кел дасчана, 1-ч курст сурна. Мана таңһчд энүнд цугнь таасдгна.«Хальмг Таңһчд ирәд суртн, гиҗ ЛНР-т бәәдг үүрмүдтән үрвр кеҗ чадҗанач. Эднд ЛНР-іс авсн некврин цаасар сурч болжана. ЛНР-ин һардврла бидн бооца батлхвидн. Дәкәд сурһулян төгсәхлә , хәрү ЛНР-т йовҗ көдлхит»,- гиҗ Бату Сергеевич келв.
Ода багшин мергҗлт өөдлүллһнә күрәлңгүд үүлдҗәнә, тер мет багшин ик сурһульмуд көдлҗәнә. Әрәсән ханьд орсн регионмудт бас багшин ик сурһульмуд бәәнә, сурһулин көтлвриг бидн иргч тавн җилин эргцд Әрәсән көтлврлә ирлцүлхвидн, – гиҗ Сергей Кравцов багшин кадрмудын туск төрәр хәрү өгчәһәд темдглв.
-Тааста эрдмән дасад, таңһчдан, орн-нутгтан туста улс болҗ цааранднь көдлтн гиҗ таднд дурдхар седләв,- гиҗ Хаска Бату харһлтыг ашлад седклән келв.
Тиигҗ Әрәсән гегән герлин министр хойр өдртән мана таңһчд бәәлһн төгсв. Хальмг Таңһчд сурһуль-эрдмин салвриг цааранднь делгрүллһнд ик нилчән эн күргхнь лавта.

ТҮРВӘН Һуна

Видео