Сән эмч болхар седхлә...

22-04-2023, 09:15 | Общество


«Министрлә кесн күүндвр» гидг төсвин йовудт Хальмг ик сурһулин оютнр эрүл-менд харлһна министр Булат Сараевла харһв.

– Тиим керг-үүлдвр таңһчин залврин болн Хальмг ик сурһулин хоорнд батлсн бооцана ул деер күцәгдҗәнә, - гиҗ күүндвриг нүр үгәр секчәһәд Хальмг ик сурһулин һардач Бадм Салаев темдглв.- Тиим кевәр оютнр министрмүдлә күүндҗ эдниг үүмүлҗәх кесг сурврт хәрү авч чадҗана. Тадн эмнлһнә дацңгин негдгч курсин оютнр болҗанат, тегәд эрүл-менд харлһна министрлә харһснь таднд ик туста болхнь лавта.
Тиим күүндврин йовудт тадн альд көдлхән, яһҗ цааранднь сурхан, юунд һол оньган өөхән йилһҗ авхит. Тадн альд болв чигн күцәмҗ бәрҗ үүәлтин, номин шинҗллтин халхар көдлх зөвтәт. Талданар келхлә, хальмг вузд тоолврарн хувалцхин төлә ил күүндвр кегдх зөвтә. Тиим кевәр бидн кезә чигн оютна тоолвриг оньгтан авад бәәхвидн.
Тадн хойрдгч курсас авн дамшлһан авад бәәхит, хөөннь мана таңһчин эмнлһнә бүрдәцст эс гиҗ таңһчин меҗә һатц көдлҗ чадхит. Күн болһна эрүл-менд харлһна туст хамгин түрүнд эмч дааврта болҗана, тер даавран тадн медх зөвтәт.
Одахн бидн Москван вузмудт харһлт бүрдәләвидн, өөрхн иргчд бидн Әрәсән хотл балһсна негдгч болн хойрдгч эмнлһнә ик сурһульмудт бас нөкцлтин туск күүндвр кехвидн. Эднә клиникүдт дамшлт авхин тускар бас үгцхвидн. Үлгүрнь, РУДН ик сурһульд 300 клиник бәәнә, тенд чигн, талдан балһснд чигн, Хальмг Таңһчдан чигн мана оютнр көдлҗ чадх. Түүнә төлә кесг эв-арһ тогтагдҗана.
Түрүн семестрт сәәнәр сурад, шүүврән сән темдгтәһәр өгәд, тадн даавртаһан медүлҗәнәт. Тиим аш мадниг байрлулҗана. Тадн зурһан җилдән сурхит, тер цагин эргцд чигн шүүҗ авсн эрдмдән итклтә, дааврта хәләцән медүләд көдлх кергтә. Түүнә төлә таднд сән таал тогтах кергтә, – гиҗ Б.Салаев ашлв.
Дарунь эрүл-менд харлһна министр Булат Сараев үг авв. «Эн харһлтд ирсндән ик байрта бәәнәв. Бидн олн-әмтнә эрүл-менд харлһна ик керг күцәҗ көдлҗәнәвидн, тернь амр биш көдлмш мөн. Әрәсән эрүл-менд харлһна министерствин медлд баһ наста министрмүдин клуб бәәнә, түүнә нег сүүрт федеральн министр ирв. Эн һардач җирһлин ик дамшлтта, тегәд нәрн кесг юмиг йирин цөөкн үгәр цәәлєҗ чадна. Би чигн министерствин көдлмшин тускар амр кевәр келҗ өгхәр седләв.
Хамгин түрүн кадрин төрин тускар келх кергтә. Болв тиим төр һанцхн Хальмг Таңһчд бәәнә гиҗ санхмн биш. Талдан регионмудт, цуг делкәд тиим юмн бәәнә. Зуг эмчнрин тоог икдүллһәр терүг күцәҗ болшго.
Ода күч-көлснә таал сольгдад бәәнә. Үлгүрнь, найдгч җилмүдт көдлҗәсн эмчд эндрк өдрин таалд көдлхд амр биш болхмн. Кесг цаас ода чигн бичнәвидн. Ода шин УЗИ-кергслмүд өргнәр олзлгдҗана, эдн кемҗәһәрн бичкн болна.
Эмч ода электронн эмнлһнә карт олзлна. Цифровизац өдгә цагт ик йовудтаһар делгрҗәнә, тернь ик туста, әмт меклхд амр биш юмн. Яһад гихлә тооһин бәәдлд орулсн бәәрмт цаасиг оңдарулхд, чиклвр орулхд күнд болна, тер компьютерт белдсн цаасиг дарунь таңһчин, федеральн бүрдәцст йовулна. Тегәд гем-шалтгин туск то-дигиг дарунь федеральн кемҗәнд үзҗ болхмн.
Ода эрүл-менд харлһна халхар даатхлгна эв-арһ олзлгдна. Кемр та гемнсн болхла, даатхлһна бүрдәц тана төлә мөңг өөнә. Тегәд әмтиг олар эмнхлә, ору өснә, эрүл-менд харлһна салврт өөсн мөңгиг даңцаҗ болҗана. Тадн чигн эмнлһнә герт ирҗ көдлхлә, таднд тиим неквр тәвәд бәәх.
Эмнлһнә шин гермүд тосхлһн бас дааврта керг мөн. Терүг министр бүрткнә. Тиим тосхлт федеральн төсвин чинртә болҗана, Әрәсән залвр некврән тәвнә, баһ биш мөңгн һарһгдна. Тернь ик дааврта көдлмш болҗана. Яһад гихлә тосхлтын йовуд болн түүнә чинрнь тосхлтын бүрдәцсин, талдан министерствин үлмәд бәәнә, – гиҗ министр товчлҗ келв.
Дарунь негдгч курсин оютн Нарн Мучкаев «Фельдшерин нөкд» гидг эврә төсвин тускар келҗ өгв. Түрүн дөң күрглһнә кемд ямаран бачм үүлдвр күцәхин тускар йирин әмтн, оютнр тер төсвәс медҗ авна. Булат Сараев тер төсвиг дөңнв, тиим медрлиг өргнәр тархахла туста болх, нег үлү эмнлһнә дацңгин оютнр дунд, тиим кевәр эдн түргәр эмчин көдлмшлә иҗлдәд, кергтә дамшлт хоршаҗ авх гиҗ министр темдглв.
Дарунь Хальмг ик сурһулин болн эрүл-менд харлһна министерствин хоорнд нөкцлтин туск бооцан батлгдв. Күүндврт тер мет эрүл-менд харлһна салврар КалмГУ-н һардачин селвгч Юрий Кикенов, эмнлһнә дацңгин һардачин үүл дааһач Саглр Бадмаева бас орлцв.

ТҮРВӘН Һуна

Видео