Бамб цецгин нəр өргмҗтə

22-04-2023, 09:25 | Общество


Мөрн сарин эклцəс авн мана таңһчд бамб цецгин наадм керг-үүлдврмүд болҗана. Таңһчин хотл балһснд болн райодт наадмин медлд байрин нəр, марһас, мастер-классмуд болн нань чигн соньн харһлтс бүрдəгдҗəнə. Шидр Яшкулин районд Теегин Өдрт нерəдгсдн байрин керг-үүлдвр болв. Нүднə харань тату улсин Элст балһсна олна ниицəнə гешүд буйнч седклтə улсин дөң-тусар терүнд орлцад ирв.

Ут тоодан 33 күн хойр автобусар Улан Эрг поселкин өөр болсн нəəрт орлцад, хаврин тег һəəхҗ, цаган сергмҗтəһəр давулв. Наадм өргмҗтə кевəр давв, бидн района билгтнрин концерт хəлəһəд, селəдин ишкə гермүдт орад, өвкнриннь авъясмудла таньлдад, дөрвн зүсн малын һəəхүлд орлцад, шимтə хальмг хот-хол амсад, хоорндан күүндҗ амрвидн.
Эрмдгтə улс нəр болҗах һазрт күрхин төлə Элстд үүлддг арһлачнр эврə көлгəн йилһҗ өгв, буйнч седклтə улс өгсн мөңгəр эдниг тенд халун хотар тоов. Элст балһсна болн Яшкулин района муниципальн бүрдəцин һардвр гемтə-шалтгта улс сергмҗтəһəр амрхин төлə хаалһин мөңгинь даңцав. Гемин уршгар зəрм улс гертəсн хая нег һарна, тегəд «Теегин Өдр» наадмд одад, хаврин теегин цевр аһар киилҗ, ке-сəəхн бамб цецг һəəхəд ирснь ик омг өгв. Района əмтн ик-бичкн уга нəəрт орлцад, билг-эрдмəн үзүлснь маднд ик байр үүдəв.
Хальмг Таңһчин Толһач Хаска Батун седвəрəр бамб цецгин наадм бүкл сара хонгин туршарт давдг болв. Терүнд орлцхар, мана теегин кеермҗ үзхəр кесг һазрас олн гиичнр ирнə. Тегəд маднд бас терүнд орлцх арһ учрснд бидн демəн күргсн цуг улст зүркни ханлтан өргҗ, хаалһнь цаһан болтха гиҗ дурдҗанавидн. Яшкулин района болн Элст балһсна һардачнр, арһлачнр мана олна ниицəнə гешүдт иим сəəхн амрлһ бүрдəснь үнлҗ болшго белг болв.

БИМБƏН Александр,
нүднə харань тату улсин ниицəнə Элстин бəəрн əңгин ахлач

Видео