Ветерана санл мөңкрүлв

22-04-2023, 09:30 | Общество


Эн долан хонгт мана таңһчд Əрəсəн Өмн үзгин прокуратурин ветеранмудын болн пенсионермүдин VII Крымск форум болв. Терүнə медлд прокуратурин органмудын ветеран, Төрскəн харсгч Алдр дəəнд орлцач Анатолий Кузевановд нерəдгдсн санлын самбр секгдв. Элст балһснд Хоньна Михаилын нертə уульнцд 4-ч тойгта герт Анатолий Александрович бəəсмн, тегəд энд санлын самбр углҗ тəвв. Хальмг Таңһчин прокурорин үүл дааҗадг Эдуард Логвинов санлын керг-үүлдвриг секəд, Алдр Диилврин Өдр угтҗ дөчн һар җилдəн зака күцəлһнд церглҗ йовсн ветерана ач-тусинь темдглҗ эн самбр секгдҗəхнь темдгтə болҗана гив.

Анатолий Кузеванов 1971-ч җилəс авн 1977 җил күртл Хальмг АССР-ин прокурорин дарук болҗ көдлҗ йовсмн. Үнн-чик хəлəцтə, өөдəн мергҗлттə болдг төлəдəн эн мана таңһчд күндтə болн дааврта һардач болҗ тоолгддг билə. Анатолий Александровичин җирһлин хаалһнь адрута болн күнд бəəсмн, эн 16 настаһасн авн сурһмҗлач болҗ күч-көлснə хаалһан эклв. Көдлн бəəҗ эн дунд сурһульд сурч, терүгəн йилһəн сəəнəр төгсəв. 1941-ч җилд Анатолий цергə сурһуль төгсəһəд, төв хадг батальона командир болҗ дəəнд тусв. Залу-зөрмг кевəр дəəлдəд, эн Улан Одн орденəр, Төрскəн харсгч Алдр дəəнə I болн II девсңгүдин, Кенигсберг сулдхсна медаляр ачлгдв.
Мана таңһчур Анатолий Кузеванов Хальмг КПСС-ин обкомин сеглəтр Басан Городовиковин дуудврар ирсмн. Зака батллһна халхар олн җилдəн үнн-чик седклтəһəр көдлсн төлəдəн эн «Күндллһнə темдг» орденəр, «Туурмҗта күч-көлснə төлə» гидг медаляр ачлгдв.
Санлын самбр секлһнд орлцсн Хальмг Таңһчин прокуратурин органмудын ветеранмудын ниицəнə ахлач Илья Аксенов Анатолий Александровичин туск тодлврарн хувалцад, иим керг-үүлдвр баһчудт төрскнч сурһмҗ өглһнд туслх зөвтə гив.
Əрəсəн Өмн үзгин прокуратурин ветеранмудын болн пенсионермүдин VII Крымск форумд ирсн гиичнр эн керг-үүлдврт бас орлцв. Краснодарск крайин прокуратурт һучн һар җилдəн көдлсн Валентина Скоробогатова Хальмг Таңһчур түрүн болҗ ирв, тегəд хальмг тег, Элст балһсн йир таасгдв гив. Төрскəн харсгч Алдр дəəнд орлцачнрин санл тевчҗ эднə нер мөкрүлҗ, дорас өсч йовх баһчудт залу-зөрмгин тускар медүлх кергтə гиҗ ветеран тоолҗана. Анатолий Кузевановиг эс меддг бəəсн болв чигн, дəəнə болн прокуратурин ветерана нериг эс мартҗахнь эндр зака батллһна халхд көдлҗəх баһ наста мергҗлтнрт кергтə гиҗ гиич келв.

ДООҖАН Наталья
ЗУРГТ: прокуратурин ветеран Анатолий Кузевановин санлын самбр секлһнд орлцачнр

Видео