Партиг дөңнҗәх улсиг негдүлхәр

06-05-2023, 09:05 | Общество

Эн долан хонгт Элстд «Негдсн Әрәсә» партин олна дөңнлтин региональн штаб секгдв. Энүнә улд олн зүсн харһлтс, «төгрг ширән» сүүр, талдан керг-үүлдврмүд, буйнч седклин акцс давулгдхмн гиҗ зуралгдҗана. Энд депутатнр суңһачнрла харһҗ, сурһуль-эрдмин, эрүл-менд харлһна, сойлын халхд үүлддг улс, эврә сән дурар үүлддг седвәртә баһчуд эдниг үүмүлҗәх төрмүдәр күүндҗ чадхмн. Энд иим керг-үүлдврмүд давулхин төлә цуг таал бәәнә. Штаб секлһнә байрин керг-үүлдврт Хальмг Таңһчин Толһач Хаска Бату, «Негдсн Әрәсә» партин төв күцәгч комитетин һардач, партин генеральн хүүвин сегләтрин дарук Александр Сидякин болн «Негдсн Әрәсән баһ наста гвардь» олна бүрдәцин ахлач Антон Демидов орлцв.
Ирсн гиичнр түрүләд тод бичг даслһна мастер-класст орлцад, хальмг хуучн бичмрин тууҗар соньмсв. «Хальмг үнн» газетин ах редактор Бембин Евгений тод бичгин тускар келҗ өгәд, ирсн гиичнрт эднә неринь бичҗ белглв. Александр Сидякинә темдглсәр, Хальмг Таңһчд олн келнулс бәәнә. Келн-улсин өвәрциг олзлҗ секгдсн штаб седвәртә, таңһчиннь төлә туста керг күцәх саната, төрскнч седклтә улсиг негдүлхнь маһд уга. Әмтн нааран бийснь ирҗ, эдниг соньмсулҗах төрмүдәрн хувалцх гиҗ санҗанав.
Эндр мана орн-нутг амр биш таалд бәәнә, бидн цуһар күчн-чидлән негдүлҗ, шишлң цергә керг-үүлдврт орлцачнриг дөңнҗ буйнч седклин керг-үүлдврмүд бүрдәнәвидн. Штабд мана цергчнрт нерәдгдсн зургудын һәәхүл бүрдәгдв. Ирсн гиичнр зургуд хәләһәд, таңһчин әмтн цергчнриг дөңнҗ, эн кергт халуч седклән медүлҗәхиг, мана нег һазра улс залу-зөрмгән үзүлҗ баатр кевәр даалһвран күцәҗ йовхиг темдглҗ ханлтын үгән нерәдв. Антон Демидовин келсәр, Әрәсән шин регионмудт партин әңгүд бас бүрдәгдҗәнә. Хальмг Таңһчас волонтерск отряд бас тиигәрән йовҗ, шинәс тосхгдҗах балһсдын босхмҗд болн госпитальмудт дөңгән күргҗ чадҗана гив. Келхд, гиич Әрәсән орн-нутгин Хүүвин депутат Башанкан Бадмин тускар буульмҗтаһар келҗ, эн эврә дурар өрәл җилдән тенд госпитальд көдлҗ, буйнч седклин керг-үүлдврмүд давулна, шав авсн улст түрүн дөң күрглһнә сурһуль бүрдәнә гиҗ темдглснь бахмҗ үүдәв. Шишлң цергә керг-үүлдвр эклсн цагас авн «Негдсн Әрәсә» парть сулдхгдсн регионмудт 44 пункт секҗ, бәәрн улсиг усар, эмәр, хот-хоолар теткв, 800 миңһн дегтр цуглулҗ, сурһульмудт болн дегтрин саңгудт тедниг йилһҗ өгв.
Партин олна дөңнлтин штаб секлһнә керг-үүлдврт таңһчин Улсин Хуралын (Парламентин) болн Элст балһсна Хургин депутатнр, таңһчин залврин гешүд, райодын толһачнр, олна бүрдәцсин элчнр орлцв. «Негдсн Әрәсә» партин төв күцәгч комитетин һардач, партин генеральн хүүвин сегләтрин дарук Александр Сидякин Хальмг Таңһчин Толһач Хаска Бату төрскн һазр-уснаннь делгрлтин тускар ухалҗ, келн-улсин төсвсин болн «Негдсн Әрәсә» партин олна көтлврин керг-үүлдврмүд күцәлһнә төриг хаһлҗана, тегәд намртан таңһчин Улсин Хуралын депутатнрин суңһврт кандидатнриг һардҗ толһалх зөвтә гисн седвәр татв.

ДООҖАН Наталья

Видео