Өдгә цагин баатрмуд

06-05-2023, 09:20 | Общество

Мөрн сарин 29-д арвн негн часин алднд Хальмг Таңһчар үүлддг Әрәсән УФСИН-ә көдләч Эрднь Хаптаев Элст – Чолун Хамр хоорндк хаалһар армрестлингәр давулгдх марһанд орлцхар Ик Буурл темцҗ йовла. Генткн өмнән утан һарчахиг болн шачах машид үзнә.

Тер дарунь гилтә хаалһин хаҗуд көлгән зогсаҗ, машид тал өөрдәд гүүв. Көлврсн нег машинә дотр һурвн кү үзв, тедн дунд насни дигт күрәд уга нег бичкн йовҗ. Шачах машинәс теднд эврән һардг арһ уга бәәсмн. Машин хаһрх гисн әәмшг бәәһәд нег чигн күн өөрдхәсн саглв. Эрднь әмән әрвллго әмтиг машинәс һарһхар адһв. Хөөннь Эрдньд хаҗуһарнь давҗ йовх медәт нөкд болв. Һурвн күүг эдн һал дотрас һарһв. Көдлмшин хөөн гертән хәрҗ йовсн медицинск көдләч шачасн машинәс һарһсн һурвн күүг хәләҗ түрүн дөң болв. Хойр машин бүклдән шатҗ одв, зуг әмтн әмд үлдв.
УФСИН-ә һардвр Эрднь Хаптаевин баатрльг йовдлын тускар хөөннь медв. Эрднин келсәр, шачасн машинәс шоваҗах бичкнә көл үзхлә зүркм «пард» гив, мини ормд күн болһн иим кевәр нөкд болх билә. Нанд нөкд болсн Юрий Эрендженовд ханлтан өргҗәнәв, гиҗ Э.Хаптаев келнә.
Зөргтә кевәр әмтиг харссн хөөн Эрднь Хаптаев Ик Буурлд армрестлингәр болсн марһанд диилвр бәрв.
Таңһчин ФСИН-ә һардвр баахн көдләчин зөргтә, баатрльг йовдлынь өөдәнәр үнлсн болдг.

ОЛЬДАН Цаһан

Видео