Уйн наста домбрчнрин күцәмҗ

06-05-2023, 10:00 | Общество


Көтчнрә района бичкдүдин билг-эрдмин сурһулин «Байруш» ансамбль кесг наадмд болн марһанд диилвр бәрҗ мана таңһчд бәәтхә, орннутгт билг-эрдмәрн нер һарч йовна. Дорас өсч йовх бичкдүд өвкнриннь сойл, авъяс хадһллһна халхар күцәмҗ бәрҗ, билг-эрдмәрн байр-бахмҗ болна. Одахн эдн XXII Дельфийск нааднд орлцад, таңһчин нер харсв. Эн наадмд ут тоодан хойр дундур миңһн күн орлцв, орн-нутгин 80 субъектин элчнр ирҗ билг-эрдмән үзүлв.

Ансамблин һардач Гилән Тикееван келсәр, мөрн сарин 21-әс авн 26 күртл Шарту балсһнд XXII Дельфийск наадн болв. Мана уйн наста домбрчнр «Әрәсән олн-әмтнә келн-улсин зевсгүд» гидг номинацд орлцв. Күүкд хальмг көгҗмчнрин үүдәврмүд болн хальмг айс жюрин оньгт тусхав. Түрүн девсңгин ашт зуг һурвн коллектив һарв, тедн дунд мана домбрчнр мөн. Марһана ашар «Байруш» ансамбль 3-ч орм эзләд, Күндллһнә һашгар болн күрл мөңгн медаляр ачлгдв.
- Мана ансамбль урзн Пермь балһснд болсн Дельфийск нааднд цаһан мөңгн медаляр, нидн болхла Красноярск балһснд күрл мөңгн медаляр ачлгдсмн. 2020- 2021-ч җилмүдт эн марһанд Манҗин Александр 3-ч орм эзлсн билә, тегәд эн хойр күрл мөңгн медальта. Ансамбльд орлцачнр сольгдна, тегәд зәрм күүкдт эн наадна һурвн, наадкстнь хойр болн нег медаль бәәнә. Эн җил Айса Баркуева, Алтана Кандуева, Альмина Манджиева, Булһн Семенова, Елена Учаева болн Валентина Черняева марһанд орлцв. Күүкд хальмг улсин сойлыг өөдән кевәр олнд медүлҗ, дассан-медсән үзүлв. Энтн мана ансамблин ах баг болна, зәрмнь эн җил сурһулян төгсәҗәнә, болв күүкд цааранднь мана ханьд үлдҗ марһаст орлцх саната. Эдн домбрт дуран өгсн бичкдүд болна, – гиҗ Гилән Алексеевна келнә.
«Байруш» ансамбляс нань Көтчнрә бичкдүдин билг-эрдмин сурһулин элч Баина Энеева (багшнь Н.Кунгаринова) хальмг ду дуулад, орлцачин дипломар ачлгдв. Баһ наста билгтнр Дельфийск нааднд орлцхд таңһчин баһчудын төв дөң-тусан күргв. Марһана өдрмүд сергҗмтә болв, күүкд Шарту балһс һәәхәд, Иҗл һолын көвәд болн Диилврин паркд цаган соньнар давулв.
Дельфийск нааднас хәрҗ ирн маңһдуртнь күүкд Хальмг телеүзлин «Теегин айс» гидг марһанд орлцв. Эн җил марһан нертә көгҗмч Манҗин Аркадин санлд нерәдгдҗәнә. Ансамбль җил болһн эн телемарһанд шунмһаһар орлцҗ, дииләчнрин тоод орна. Мөрн сарин 30-д болхла «Байруш» ансамблин ах болн баһ багмуд Аһш балһснд болсн «Цергә туурмҗин һазрар» гидг үүдәлтин нарт-делкән фестиваль-марһанд орлцад ирв. Энүг бичкдүдин болн баһчудын үүдәлт делгрүллһнә «Салют талантов» гидг АНО бүрдәҗ давулна. Эн марһанд ансамблин хойр баг болн Булһн Семенова диилвр бәрәд, I девсңгин Дипломар ачлгдв. Намртан эдн Санкт-Петербург балһснд болх супер-финалд орлцх зөв авв. Тиигәд бичкн домбрчнр билг-эрдмән үзүлҗ, хальмг улсин сойл делгрүлҗ, күцәмҗ бәрҗ йовна. Хаалһнь цаһан болтха!

ДООҖАН Наталья
ЗУРГТ: «Байруш» ансамблин күүкд-көвүд багш Гилән Тикеевала

Видео