Хальмгин Шаҗн Лам баһчудла күүндв

06-05-2023, 10:05 | Общество


Чик седкләр бәәлһн ямаран амр биш болдгин, бурхн-щаҗна номин учр-утхинь медҗ авч җирһлдән олзллһн ямаран туста болдгин тускар Хальмгин Шаҗн Лам баһчудла болсн харһлтд келҗ өгв. Гевш Тендзин Чойдак «Уралан» гидг сурһуль-эрдмин форумин орлцачнрла харһв.

Хальмгин төв хурлын конференц-залд эн харһлт болв. «Хамдан» гидг баһчудын ниицәнә һардачнрла болн седвәртә баһчудла болсн харһлтд бурхн-шаҗна номин һол учр-утхин тускар, шаҗн күүнә җирһлд ямаран нилчән күргдгин тускар тохнята күүндвр болв. Хальмгин Шаҗн Ламин цәәлһвр авхар 60 һар күн хурлд ирв. «Уралан» гидг нертәһәр кегдсн баһчудын сурһуль-эрдмин хургин кемҗәнд эн керг-үүлдвр күцәгдв.
Күүкд-көвүд Шаҗн Ламин келсиг оньган өгч соңсад, сурврмуд өгәд, тодрха цәәлһвр авв. «Цуг әмтә тоотын тускар зальврҗ» бәәлһнә тускар келсн тоот баһчудыг йир икәр соньмсулв. Харһлтын чилгчәр күн болһн Хальмгин Шаҗн Ламин әдст күртәд, соньмсулҗах төрмүдәрн цәәлһвр авсндан седкл төвкнүн хәрв. «Ямаран чигн йовдл учрв чигн күүнд му бичә кетн, чадсарн дөң болҗ йовтн. Мана бурхн-шаҗна номин улыг медҗ, сурһульта-эрдмтә улс болтн. Теслт һарһҗ, ямаран чигн йовдл учрв чигн ухалҗ, тоолврта болн чик шиидвр авдгиг дастн. Кезә чигн ухаһан бичә геетн», – гиҗ гевш Тензин Чойдак эн харһлтыг товчлснь баһчудын уханд орснь маһд уга.

ҖИРҺЛИН Кермн

Видео